ئەستێرەی هۆڵیوود (لیۆناردو دیكاپریۆ)ی تەمەن 44 ساڵ, هاوكاری وڵاتی بەرازیل دەكات, وەك یارمەتی و پاراستنی ژینگە, ئەم ناودارە بڕی پێنج ملیۆن دۆلاری ئەمەریكی دەبەخشێت بۆ كوژاندنەوەی ئاگرەكەی (ئەمەزۆن), كە بەم دواییە ئاگرێكی بەرفراوان ئەو ناوچەیەی گرتەوە و بە هۆیەوە چەندین سەوزایی تێدا سووتا و چەندین خێزان شوێنەكانیان بەجێهێشت .

ئەم ئەستێرەیە ئەگەرچی لە كارە هونەرییەكەی نواندن دەكات, بەڵام لە ڕۆژگارەكانی ژیانیدا بە شێوازێكی تر دەردەكەوێت, وەك چالاكوانێكی ژینگە پاررێز و هاوخەمی سرووشت لە درەخت و ئاو و هەوا, وە بەرگری لەو ئاژەڵانەی وا مەترسی لەناوچوونیان لەسەرە .

لەلایەكی تریشەوە ئەم ناودارە ئۆتۆمبێلی (Tesla Roadster) و(Fisker Karma) بەكار دەهێنێت كە بە ووزەی كارەبا كاردەكەن, هەروەها لە بەشی سەرەوەی خانووەكەی چەند خانەیەكی ووزەی خۆری دەبینرێت كە كردوویەتی بە سەرچاوەی كارەبا بۆ ماڵەكەی, ئەویش لە پێناو پاك ڕاگرتنی ژینگە .