عینایەت عەتار هونەرێكی ناسك بە ئەندازەی مێ
ئێمە بە گشتی رەنگ و سیمای كولتوور و لایەنی شارستانییەت و كۆمەڵایەتیی كوردستانی سووریا، لە تابلۆ و بەرهەمی شێوەكارانی ئەم بەشەی كوردستاندا دەبینین. دەڤەرەكانی كوردنشین لە سووریا كەتوونەتە باكووری ئەو وڵاتەوە، رۆژاڤای كوردستان هەر لە دێرك و جزیرەوە تا دەگاتە عەنتاب و ئەسكەندرۆنە، جوگرافیایەكی هاوسنووری ناوچەكانی باكووری كوردستانە. یەك سەدە لە یەكدی دابڕاندنی باكوور و رۆژاڤای كوردستان، بنخەتی خستە بن كاریگەریی سیاسەت و كولتووری دیمەشق، سەر خەتیش درێژەی بە پەیوەندی چوار سەدەی پێشتری لەگەڵ ئەستەمبووڵ و كولتووری توركدا. ئەگەرچی پەیوەندیی كولتووریی نێوان ئەم دوو بەشەی كوردستان بۆ ماوەی نزیكەی 100 ساڵ سنوورێكی سامناك لە یەكی دابڕین، بەڵام بنەماكانی كولتووری كوردەواری لە هەردوو لا بە گەشی و زیندوویی مانەوە، ئەگەرچی بنخەت و سەرخەت كەوتنە بەر لێشاوی كولتووری دوو نەتەوەی جیا، هەردووكیشیان هەوڵی سرینەوەی كولتووری كوردیان دا، دەرەنجام كولتووری كورد لە هەردوو بەشەكە، ناسنامەی خۆی پاراست. بەرهەمی شێوەكارانی كوردستانیش، ستاتیكا و بەڵگەی دیدەیی لە بارەی زیندوو مانەوەی كولتوور و شارستانییبەتی كورد دەخەنەڕوو.
عینایەت عەتار (1948 لە عەفرین هاتووەتە دنیاوە) بە هەمان شێوەی شێوەكارانی دیكەی كوردستانی سووریا، ئافرەت نەخشێكی كارای لە نێو بەرهەمەكانیدا هەیە. مێ كە بە چەندین چەمك و رایەڵ بە نێرەوە گرێ دراوە، بە دایك دەست پێ دەكات و بە هاوژین و كچ كۆتایی دێت، بۆ خۆی هێمای نیشتمانە. زۆربەی شێوەكارانی كوردستانی رۆژاڤا مەبەستیان بوو بێت، یان نا ئافرەت وەك فیگەر و ستاتیكا و بەها بە چڕی لە نێو بەرهەمەكانی ئەواندا ئامادە بووە. ئافرەت هێمای دایك و نیشتمان بووە، دیارترین رواڵەتەكانی كولتوور و شارستانییەتی كوردی لە نێو ماڵ و بە بەژنی چنارئاسای خۆیدا نواندووە.
تابلۆی نیگاركێشانی رۆژاڤا لە رووی رەنگ و تەكنیك و فیگەرەوە، خاوەن خەسڵەتێكی تایبەتە، ئەوان تابلۆ بە تەكنیكی بەرز گەڵاڵە دەكەن، لە بەكارهێنانی رەنگدا دەوڵەمەندن، بە فڵچەیەكی سرك، نەترسانە دەكەونە چنین و نەخشاندنی رووبەری تابلۆ، شوێنی بەركەوتی فڵچە بەدی ناكەیت، فۆرم و فیگەر زۆر بەرجەستە و ئازادانە گەڵاڵە دەبن، كەش و ژینگەی كوردەواری بە رەنگ و پۆشاك و ژینگەی دیمەنی تابلۆوە خۆی دەنوێنێ. عینایەت عەتار بە چڕی ئافرەتی كردووەتە شا فیگەری كارەكانی، زۆر جاریش جووتێ ئافرەت دوو بە دوو، یان زیاتر، بەرەو رووی بینەر تەكان دەدەن، ناز و عیشوە و جوانیی خۆیان دەنوێنن و دەبنە چەقی تابلۆكە و، چاوی بینەر لە كەناری چواردەوری تابلۆ بێ ئاگا دەمێنێت. عەتاری نیگاركێش وە نەبێ كەناری تابلۆش فەرامۆش بكات، بەڵكوو زۆر ورد و بە سەلیقەیەكی باڵاوە، كەناری تابلۆش بە رەنگ دەچنێت.
شادییەكی زۆر بە سیمای تابلۆكانی ئەم هونەرمەندەوە دیارە. كورد نەتەوەی كولتووری شادییە و ژیانی نقومی نێو دەریای رەنگە، ئەم شادی و دەریای رەنگە، بەشێكی بۆ سروشتی سیحراویی كوردستان دەگەڕێتەوە، كە ژینگەیەكی فێنكە، زستانی سەرما و بەفر و بەستەڵەكە، هاوینی گەرم و تێر خۆرە، بەهاری لە ئەو پەڕی رازاوەییدایە. ئەم خەنەبەندانی رەنگ و شێوەیە، بە درێژایی هەزاران ساڵ كاری لە سایكۆلۆژیای مرۆڤی كوردستانی كردووە و كولتووری شادی لەو وڵاتەدا ئەفراندووە، لە تابلۆكانی عینایەت عەتاردا چەمكی ئەم كولتوورە باڵا و مرۆڤانەیە، زۆر روون، زۆر رەوان دەخوێندرێتەوە.
