ماوەی چەند ساڵێكە (ئیشواریا رای) بۆتە خاوەن جەماوەرێكی زۆر لە سەرتاسەری جیهان، بەتایبەتی دوای ئەوەی لە چەند فیلمێكی هۆڵیۆددا دەركەوت، ئەمەش وایكرد ببێتە مانشێتی رۆژنامە و گۆڤار و میدیاكان، كە تەنانەت بچووكترین هەواڵیشیان لە بواری هونەری و ژیانی تایبەتیدا بڵاو دەكردەوە.
لە ئێستاشدا جارێكی دیكە ئیشواریا بۆتەوە بە بابەتی میدیاكان، بەڵام ئەم جارە پەیوەندیی بە كاری هونەری و گرێبەست و وێنەگرتنی فیلم و بەشداریكردنی لە فیستیڤاڵ و بۆنە هونەرییەكاندا نییە، بەڵكو بەشێوەیەكی جیاوازتر باس دەكرێ، بەتایبەتی لە سۆشیال میدیا، چونكە ئافرەتێكی دیكەی تا راددەیەكی زۆر هاوشێوەی دەركەوتووە، ئەویش كچە مۆدێلی ئێرانی (ماهلاجا جابری)یە، كە لە ئێستادا لە تۆڕە كۆمەڵایەتییەكان و سۆشیال میدیا خاوەن جەماوەرێكی زۆرە، تەنیا لە ئینستاگرام رێژەی گۆڕینەوەی وێنە و ڤیدیۆكانی گەیشتۆتە زیاتر لە سێ ملیۆن، بەپێی چاودێرانی ئەو بوارەش هۆكاری سەرەكیی ئەوەیە كە لە زۆر رووەوە هاوشێوەی ئیشواریا رایە، تەنانەت ماڵپەڕی (Mensxp) لەدوای ئەنجامدانی راپرسییەك وەك جوانترین ئافرەتی جیهانی دەستنیشان كرد.
ئەم لێكچوونەوەی نێوانیان وایكردووە كە زۆر كەس پێیان وایە ماهلاجا دەتوانێت لە داهاتوویەكی نزیكدا عەرشی جوانی بە ئیشواریا چۆڵ بكات.
تاكە جیاوازیی ئاشكرای نێوان ئیشواریا و ماهلاجا ئەوەیە كە ئەو كچە مۆدێلە سەرەڕای جوانییە بێ سنوورەكەی، بە پێچەوانەی ئیشواریا زۆر جار پشت بە وروژاندن و خۆ رووت كردنەوە دەبەستێت، لە كاتێكدا شاجوانی پێشووتری هیندستان و جیهان لەم رووەوە توانیویەتی ناوبانگی خۆی بپارێزێت.