خانمە ئەكتەری ناسراوی ئەمریكی سكارلێت جوهانسون بە فەرمی توانیی ژمارەیەكی پێوانەیی لە مێژووی سینەمای ئەمریكیدا تۆمار بكات، كاتێك بوو بە ئەو خانمە ئەكتەرەی كە دوای بەشداری كردنی لە دوایین فیلمی جیهانی مارڤیل (Avengers: Endgame) زۆرترین قازانجی لە مێژوودا بەدەستهێنا.
لە لایەكی دیكەوە سكارلیتی تەمەن (34) ساڵ دەستی كرد بە وێنەگرتنی فیلمێكی نوێ بە ناوی (Black Widow) و بڕیارە لە بەرامبەر بەشداریكردنی لەو فیلمە دا، بڕی بیست ملیۆن دۆلاری ئەمریكی وەربگرێت، هەرچەندە پێشتر خۆی داوای بڕی بیست و پێنج ملیۆنی كردبوو بۆ بەشداری كردن، ئەگەر لە كۆتاییدا توانیی ئەم بڕە پارەیە وەربگرێت ئەوا دەبێتە یەكەم ئافرەت لە مێژووی سینەمای ئەمریكیدا كە زۆرترین كرێ وەربگرێت. (بێوەژنە رەشەكە) نازناوی كچە سیخوڕی ناسراو (ناتاشا رۆمانۆڤ)ە كە لە ساڵی 1928 لە دایكبووە و یەكێكە لە كەسایەتییە بەهێزەكان و خاوەن جەماوەرێكی زۆرە، بەتایبەتی دوای دەركەوتنی لە فیلمی (Iron Man 2) و لە ساڵی 2012 لە فیلمی (The Avengers)دا دەركەوت، سكارلیت رۆڵەكەی بینی، دواتریش لە گشت فیلمەكانی كۆمپانیای (مارڤل) دەركەوت، بەڵام لە هیچ فیلمێكی سەربەخۆیدا دەرنەكەوت تا بەم دواییە كۆمپانیای ناوبراو بڕیاریدا بە شێوەیەكی سەربەخۆ دەركەوێت.
دوایین بەشی فیلمی (The Avengers) كە ئێستاش لە هۆڵەكانی سینەمای جیهانیدا بەردەوامە توانیویەتی سەركەوتنێكی بێ وێنە بەدەست بهێنێت و داهاتەكانی گەیشتە ئاستێكی پێوانەیی.