لەم ماوەیەدا هونەرمەند (نامیق عەلی قادر) دواین پیشانگای خۆی بە ناوی (سەردەمی تراژیدیا) لە هۆڵی میدیا لە ناوەندی شاری هەولێر كردەوە. پاڵپشت بە نیو سەدە ئەزموونی ئەم هونەرمەندە، مەبەستمە لە گۆشەنیگای ئەم پیشانگایەوە، قسە لە بارەی دوو لایەن بكەم:

تاریق كارێزی
-دواین ئەزموونی هونەرمەند.
-سیستەم و ریتمی دابەشكردنی بەرهەمەكانی پیشانگاكەی لە نێو هۆڵی نمایشەكەدا.
پێشانگاكە بەرهەمی چوار ساڵ كار كردنی هونەرمەند بوو، ئەو ئەزموونێكی باشی لە هەردوو بواری نیگار و پەیكەردا هەیە، لە نیگاردا زۆرتر هێڵ و كەمتر رەنگ دەكاتە گەردانی كار و ئەفراندنی، لە پەیكەریشدا ئاسن و شیش و مەتریاڵی هەمەجۆری بەكار هێناوە و ئەم جارەیان برۆنزی وەك كەرەستەی پەیكەر بەكار هێناوە، بەكارهێنانی برۆنز وەك كەرەستەیەك بۆ دروستكردنی پەیكەر، ئەرك و زەحمەتییەكی زۆر دەخاتە سەر شانی هونەرمەند. نامیق عەلی ئەم جارەیان ئەم مەتریاڵە رەق و بەهادارەی خستووەتە خزمەت گوتاری سیمبوڵ ئامێز و هێماكارانەی خۆی، هونەرمەند بەم مەتریاڵە رەقە، بە زمانێكی نەرم و ناسك هاتووەتە ئاخاوتن.
یەكێك لەو شتانەی لە رەخنە و بەدواداچوونی رۆژنامەوانی بەكەمی قسەی لە بارەوە كراوە، بابەتی رێكخستن و شێوەی دانانی بەرهەمەكانە لە هەر پیشانگایەكدا، دانانی تابلۆ، یان هەر بەرهەمێكی دیكەی شێوەكاری لە پیشانگادا، بە پێی ریزبەندییەك دەبێت، كە تێیدا (ریتم، گونجان، رووبەر، بۆشایی، رووناكی، قەبارەی بەرهەم و...هتد) رەچاو دەكرێت. هەموو پیشانگایەك لە رووبەر و فەزایەكدا نمایش دەكرێت، وا پێویست دەكات پیشاندان و نمایشكردنی بەرهەمەكانی پیشانگا، كاری باش دیتن و دەركەوتنیان بڕەخسێنێت، چونكە باش تەماشاكردن و بە تێر و تەسەلی روانین و رامان لە بەرهەمی هونەری، خواستێكی سەرەكی و نەبڕاوەی هونەرمەندە لە سازدانی پیشانگا. لێرەوە دەكرێت بڵێین، پەیڕەوكردنی سیستەم و ریزبەندییەكی باش زەمینەی ئەوە دێنێتە پێش كە بینەری بەرهەم و میوانی پیشانگا، بە شێوەیەكی دروست و تا ئەو پەڕی خواست و بڕست و توانا و مەبەستی خۆی، چێژ لە هاتنی بۆ پیشانگاكە و دیتنی بەرهەمەكان ببینێت.
لە راستی دوور ناكەوینەوە ئەگەر بڵێین، هەموو مرۆڤێك خۆڕسكانە حەزی رێكخستن لە ناخ و دەروون و سەلیقەیدا هەیە، ئەوەی هونەرمەندیش لە خەڵكی ئاسایی جیا دەكاتەوە، هونەرێكە كە هەڵگری گوتار و پەیامێكی ستاتیكیی جوانخوازانە و جوان مەبەست پیشان دەدات. ئیدی لێرەوە ئەزموون و شارەزایی هونەرمەند بۆ رەچاوكردنی ریزبەندییەك بۆ تابلۆكانی زۆر گرنگە، كە لەگەڵ شوێنی نمایشەكەدا بگونجێت و باشترین دەرفەتیش بۆ بینەر دەستەبەر بكات.
لەم روانگەیەوە ئەگەر قسە لە بارەی پیشانگاكەی نامیق عەلی قادر بكەین، دەبینین ئەم هونەرمەندە ئەزموونێكی گەورەی لەم بوارەدا هەیە، لە بیریشمان نەچێت سەردەمێك (گەلەریی رۆژ)ی بەڕێوە بردووە. ئیدی هەموو ئەو شارەزایی و ئەزموونە لە رێكخستنی پیشانگاكەیدا خۆیان نواند.
پیشانگاكە بریتی بوو لە كۆمەڵێك تابلۆی شێوە چوارگۆشە، هەندێكیان بە لاری كێشرا بوون، هەندێكیشیان بە شێوەی چوارگۆشەیی ئاسایی خۆیان لەگەڵ كۆمەڵێك پەیكەری لە برۆنز داڕێژراو بوون. سەرەتا و كۆتایی هۆڵەكە كە لای راست و چەپی دەرگای هۆڵەكە دەگرێتەوە، بە دوو تابلۆی قەبارە گەورە پڕ كرا بوونەوە. دوو رووبەری بچووك بە دوو بەرهەمی گەورە پڕ كرا بوونەوە. دیواری دووەم بە لای راستدا، ئەم سەر و ئەو سەری تابلۆی قەبارە گەورە لە شێوەی چوارگۆشەی لار بوو، لە نێوانی هەردوو تابلۆكەش پێنچ پەیكەری برۆنز هەڵواسرا بوون. سێ پەیكەری یەكەم سێیەكی (ئافرەت و كورسی و دەمە مانگ) بوون، بڕێك گۆڕان لە شێوەی مانگەكە و جەستەی ئافرەتەكە لە تابلۆكاندا بەدی دەكرا، دوای ئەوان پەیكەرێكی برۆنز لە شێوەی پەرستگەی ئێزدی بوو، پاشان پەیكەری ئافرەتێكی دیكە. رەنگە هەموو ئەمانە هێما بن بۆ ئەو هەزاران ئافرەتە ئێزدییەی لە لایەن داعشەوە رفێندران.
كۆتایی دیواری دووەم تابلۆیەكی چوارگۆشە لارە، بەرانبەری لە سەرەتای دیواری سێیەمیش، ریزە پەیكەرێكی برۆنز داندرا بوون. لە گۆشەی نێوان هەردوو دیوارەكەش، پەیكەرێكی قەبارە گەورەی برۆنز بوو، كە هەردوو دیوی بە جووتە پەیكەرێكی بچووك تەندرا بوون. پەیكەرەكانی دیواری سێیەم بریتی بوون لە (مرۆڤێكی گرمۆڵە، كەسێكی دۆژداماوی سەر كورسی، كەڵەشێر لە بانكداندا، گیاندارێكی نامۆ). هەموو ئەمانە هێمان بۆ رەخنە گرتنی هونەرمەند لە مەرگەسات و تراژیدیا، داوا دەكات بە قوولەی كەڵەشێر (ئەمڕۆ میدیا و مۆبایل و ئینتەرنێت، جێی كەڵەشێریان گرتووەتەوە)، خەڵك بە خەبەر بێن و بێدار ببنەوە.
سێیەمین گۆشەی پیشانگاكە تابلۆیەكی چوارگۆشە بوو، ئەم دیو و ئەو دیوی دوو پەیكەری بچووك بوون. ئەم تابلۆ چوارگۆشەیە پێمان دەڵێیت، هونەرمەند لە زمانی رەخنەوە بەرەو زمانی پێشنیار دەچێت. تابلۆیەك یەك پارچە كێلی گۆڕە، ئەمە چڕترین دەربڕینە بۆ وڵاتی ئێمە و دەوروبەری ئێمەش، كە كراونەتە مەرگستان. لە ناوەڕاستی تابلۆكەشدا كەڵەشێرێك گەردنی هەڵبڕیوە و بانگ دەدات: مەرگە تراژیدیا بەس نەبێت؟ پەیكەری پێش تابلۆكە گردی مەرگە (گردی مشتەنوور، گردی یوونس پێغەمبەر بە نموونە) كە كرانە خاك و خۆڵ، دوای تابلۆكەش ئاسك (مامز)ێكی گەردنكەشە، پشتی لە مەرگستان كردووە، ئێمەی مرۆڤ بەرەو دنیای ژیان بانگ دەكات. لە ئەفسانەی كوردیدا زۆر جار ئاسك رۆڵی تایبەتی هەیە، كاراكتەرێكی دەگمەنە.
لە چوارەمین دیواری هۆڵەكەش، سەرەتا دوو باڵندە دەبینین، نیشانەی ئازادی و سەرفرازین، دیسان تابلۆیەكی چوارگۆشە لار دێتە پێش كە گۆڕستانە. سێ برۆنز پەیكەری ئاسك دەبینین، دوانیان سەر بەرەو خوار و مەرگن، سێیەمیان گەردنكەش سەری بەرز كردووەتەوە. ئەمە دنیایە، ململانێیەكی نەبڕاوە لە نێوان هێزی تاریكی رووناكی، خاس و خراو، رەش و سپی، بووە بە قەدەری مرۆڤی ئەم سەرزەمینە. پاشان تابلۆیەكی چوارگۆشە لاری دیكە دێت، یەك پارچە رەش، بەڵام ترووسكاییەكی رووناكی خۆی نواندووە، دنیا هەرچەندە تاریك و نووتەك بێت، تیشكی رووناكی نەبڕاوەیە. دواین بەرهەمی دیواری چوارەم جووتە میدالیایەكی برۆنزن.
دواین تابلۆش نیگاری سێ پەرستگایە (مزگەوت، كڵیسە، پەرستگەی ئێزدی)، ئەو شوێنانەی خودا پەرستی بەدەم یەكەوەن، بەدەم ئاسمانی شین و كەشی لێبوردەیی و ژینگەی ئاشتیخوازییەوە، ئایینەكان و پەیڕەوانیان دەكرێ بێ كێشە و ئاسوودە لەگەڵ یەكدا بژین. ئەمەیە چڕە پەیامی نامیق عەلی قادر.