دوای سەركەوتنی زەنجیرە درامای (بوكی ئەستەنبوڵ) هەریەكە لە ئۆزگان دینیز و ئاسلی ئانفری پاڵەوانی زنجیرەی ناوبراو رایانگەیاند كە ئاهەنگێك لە ئیسرائیل ساز دەكەن، ئەمەش وایكرد كە رووبەڕووی رەخنەیەكی زۆر ببنەوە، بەتایبەتی لە تۆڕە كۆمەڵایەتییەكان. ئەگەرچی بەشێك لە هەوادارانیانیشیان رەخنەیان لێ گرتبوون بۆ سازكردنی ئەم ئاهەنگە، بەڵام گوێیان بە رەخنەكان نەدا و بڕیاریان دا ئاهەنگەكە ساز بكەن كە یەكێك بوو لە ئاهەنگە سەركەوتووەكان و جەماوەرێكی زۆر ئامادەی بوون، بەر لە دەستپێكردنی ئاهەنگەكە ئۆزگان وتی: «ئەوەی سیاسییەكان نەیانتوانی ئەنجامی بدەن، ئێمە ئەنجاممان دا، هونەر سەركەوتنە، سوپاسی هەمووتان دەكەم، هیوادارم هونەر زیاتر یەكمان بخات».
دوای سەركەوتنی ئاهەنگەكە هێرشی سەر ئۆزگان و ئاسلی لەسەر تۆڕە كۆمەڵایەتییەكان بەردەوام بوو، تەنانەت بەشێك لە چالاكان داوایان كرد كە پێویستە بایكۆتی كارە هونەرییەكانی ئەم دوو هونەرمەندە بكەن.
نرخی بلیتی ئاهەنگەكە گەیشتە (300) دۆلار و گشت بلیتەكان ماوەیەك بەر لە ئاهەنگەكە فرۆشرابوون، لە ئەنجامدا ئۆزگار بڕی یەك ملیۆن دۆلاری دەستكەوت و ئاسلیش بڕی (350) هەزار دۆلاری دەستكەوت.
شایەنی باسە بەر لە ماوەیەك میدیاكانی توركیا رایانگەیاند كە ئاسلی تووشی نەخۆشییەكی دەگمەن بۆتەوە كە بە (دسلكسیا) ناسراوە و دەبێتە هۆی لاوازی و نەبوونی توانای خوێندنەوە و نووسین و لەبەركردنی بابەتەكان. ئاسلی هەرچەندە بۆ رزگاربوون لەو نەخۆشییە پشتی بە چەند پزیشكێكی تایبەت بەست، بەڵام تا ئێستاش بە تەواوی چاك نەبۆتەوە و بە زەحمەت دەتوانێت ئەو دەقانە لەبەر بكات كە پێی دەسپێردرێت.