پێدەچێت لە هیندستان مۆسیقای راپ و هیپهۆپ ببێتە هۆكارێكی سەرەكی بۆ دروستكردنی پەیوەندیی نێوان دەنگدەران و لایەنە سیاسییەكان دوای ئەوەی حزبە سیاسییەكان چەندین گۆرانیی میللی و رۆژئاواییان تۆمار كرد، شارۆخانیش بە مەبەستی هۆشیاركردنەوەی هاووڵاتیان لەسەر گرنگیی هەڵبژاردن بۆ یەكەم جار گۆرانییەكی تۆماركرد، شارۆخان لەسەر لاپەڕەی كۆمپانیای بەرهەمهێنانی هونەری خۆی Red Chillies Entertainment لە تۆڕی كۆمەڵایەتیی instagram گۆرانییەكەی بڵاو كردەوە، كە بە ناوی “Karo Matdaan” كە بە زمانی هیندی واتە (دەنگدانت)، لەم گۆرانییەدا شارۆخان هانی جەماوەر و هەوادارانی خۆی دەدات كە رووبكەنە سندوقەكانی دەنگدان و بەگوڕوتینەوە بەشداریی لە هەڵبژاردنەكاندا بكەن.
لە 13ی ئاداری رابردوو (ناریندرا مودی) سەرۆك وەزیرانی هیندستان لە رێگای تویتەرەوە داوای لە هەریەكە لە هونەرمەندان (شارۆخان، ئەمیتاب، كاران جەوهەر) و چەند هونەرمەندێكی دیكە كرد كە پێویستە بەشێوەیەكی رێكوپێك هۆشیارییەكی بەرز لای دەنگدەران درووست بكەن، بۆ ئەوەی بە گوڕوتینەوە بەشداری لە هەڵبژاردنەكاندا بكەن، لە دوای بڵاوبوونەوەی گۆرانییەكە سەرۆك وەزیرانی هیندستان ناریندرا مودی ستایشی شارۆخانی كرد و باسی لە گرنگیی رۆڵی هونەر كرد لە خزمەتكردنی دیموكراسیەت و كۆمەڵگە و ژیان، مودی لەبارەیەوە گوتی: «من دڵنیام كە میللەتی هیندستان بەگشتی و بەتایبەتیش ئەو دەنگدەرانەی یەكەم جارە دەنگ دەدەن، گوێ لە بانگەوازەكەی شارۆخان دەگرن و بە لێشاو دەچن بۆ دەنگدان.