زۆر هونەرمەندی كورد هەن كە بە زمانی نەتەوەكانی دیكە گۆرانییان وتووە و تا راددەیەكی زۆر سەركەوتوو بوون، جا لە ئاهەنگ و بۆنە تایبەتییەكان گۆرانییان وتبێت كە پێشتر وتراون، یان لە نێو ئەلبوومەكانی خۆیان ئەو گۆرانییانەیان وتبێت، بەتایبەتی گۆرانیی نەتەوە هاوسێكانی كوردستان وەك: عەرەب، فارس، تورك، لە بەرامبەردا زۆر هونەرمەندی بیانییش هەن بە هەمان شێوە بە زمانی كوردی گۆرانییان وتووە، خانمە گۆرانیبێژی فارس، كەتایون، كە ئەندازیارە و مامۆستای زانكۆیە، لە رێی گوتنی گۆرانی بە زمانی كوردی، لەنێو هەوادارانی میوزیك و گۆرانیی كوردیدا ناسراوە و تا ئێستا چەندین گۆرانی بە زمانی كوردی وتووە. كەتایون بەهۆی ئەوەی هاوژینەكەی كوردە، فێری زمانی كوردی بووە، ئێمەش بە هەلمان زانی كە لەدەرفەتێكدا دیمانەیەكی لەگەڵ سازبكەین وچەند پرسیارێكی ئاراستە بكەین.

* سەرەتا پێمان خۆشە زیاتر خۆت بە خوێنەران بناسێنین؟
- من لە ئێران لەدایكبووم و لە بنەماڵەیەكی شەش كەسیدا گەورە بووم، دوو خوشك و برایەكم هەیە، دەرچووی بەشی ئەندازیاریم، هاوژینەكەم كوردە و خەڵكی شاری سنەیە، بەو هۆیەوە چەند ساڵێك لە سنە ژیاوم، بەهۆی خوێندن و كاركردنەوە 10 ساڵ لە شاری ئیسفەهان نیشتەجێ بووم. ئەندامی سەندیكای ئەندازیارانی ئیسفەهان و مامۆستای زانكۆ بووم، هاوكات لەگەڵ ئەم كارانەدا كاری میوزیكم كردووە و ئێستاش لەگەڵ هاوژین و كچەكەم (رۆنیا) لە ئەڵمانیا نیشتەجێم و لێرە درێژە بە كارە هونەرییەكانم دەدەم.
* وەك دیارە زۆر بە باشی بە كوردی گۆرانی دەڵێی، نهێنیی ئەمە لە چیدایە؟
- لە ئێران لە خولی فێربوونی ئاوازە ئێرانییەكان بەشداریم دەكرد و لەسەر رەدیفگەلی ئێرانی كارم دەكرد، هاوكات گوێم لە مەقاماتی كوردی دەگرت و پرۆڤەی ئەو مەقامانەشم دەكرد، گۆرانییە كوردییەكانم زۆر جوان و پڕسۆزتر دەگوتنەوە. كاتێك كە گۆرانیی كوردیم بۆ مامۆستاكانم دەگوتەوە، پێیان دەگوتم لە چاو گۆرانییەكانی دیكە گۆرانییە كوردییەكان باشتر و پڕهەستتر دەچڕیت، وەكو بڵێی ژنێكی كوردی. لەلایەكی دیكەوە كاتێك گۆرانیی كوردیم دەچڕی، هەستێكی جیاواز و خۆشم هەبوو، بەجۆرێك كە ئەو هەستەم بۆ گۆرانی فارسی و ئینگلیزی نەبوو.
* چۆن بەو شێوەیە فێری زمانی كوردی بووی تا بگاتە ئەو ئاستەی گۆرانی بە زمانی كوردی بڵێی؟
- هاوژینەكەم كوردە و لەگەڵ كولتوور و سوننەتە كوردییەكان ئاشنام، ئەمەش زۆر یارمەتیدەرم بوو، بەڵام بەدواداچوونم بۆ میوزیكی كلاسیكی كوردی دەكرد و گوێم لێدەگرت، یان لە كەسانێك كە شارەزای میوزیكی كوردی بوون، پرسیارم دەكرد كە ئەم وشە، یان ئەم دێڕە چ واتایەكی هەیە، ئەم بەدواداچوونەی من هۆكارێك بوو بۆ ئەوەی بە زۆر لە نووسەران و شاعیرانی كورد ئاشنا ببم و وردەوردە فێری زمانی كوردی ببم. لێرەدا حەز دەكەم ئاماژە بەوە بكەم كە گوتنی گۆرانی بە زمانی كوردی لە سەرەتادا بۆ من زۆر قورس بوو، بەڵام چونكە بڕیارم دابوو لەسەر میوزیكی كوردی كار بكەم، رۆژ بە رۆژ پێداگری و بەدواداچوونی زۆرترم بۆ فێربوونی زمانی كوردی دەكرد و خۆشەویستیم بۆ زمان و میوزیكی كوردی ئەم كارەی بۆ ئاسانتر كردم. مێژووی كوردم خوێندەوە و ژیان و مێژووی ئەم نەتەوەیە سەرنجی راكێشام، میوزیكی كوردی پڕە لە وزە و شادومانی.
* تا چەند لەگەڵ هونەر وهونەرمەندانی كورد ئاشنایەتیت هەیە؟
زۆر لە هونەرمەندانی ناوداری وەكو خوالێخۆشبوو (سەید عەلی ئەسغەری كوردستانی، عەلی مەردان، حەسەن زیرەك، تایەر تۆفیق، كەریم كابان و مەرزیە فەریقی، ناسر رەزازی، مەزهەر خالقی، لەیلا فەریقی، كانی، هانی، چۆپی فەتاح و كیژان) گوێیان بۆ دەگرم و زۆر هۆگری دەنگی ئەم هونەرمەندانەم و شارەزاییەكی زۆرم لەسەر گۆرانییەكانیان هەیە.
* تێڕوانینت بۆ هونەر بە گشتی و هونەرمەندانی ئافرەتی كورد چۆنە؟
- چێژێكی زۆر لەدەنگیان وەردەگرم، ئەوان لە بواری هونەر و كولتوور و زانستەوە پێشكەوتنی زۆر بەرچاویان كردووە. وەكو سیمبوڵی خۆڕاگری و هێزن بۆ هەموو ژنانی جیهان. هونەرمەندانی ئافرەتی كورد پڕهەست و سۆز گۆرانی دەچڕن و مانای شیعرەكان بە باشی بۆ نەوەكانی دوای خۆیان دەگوازنەوە.
* چێژی مەقام بۆ هونەرمەند چۆنە و تا چەند گرنگیی پێدەدەی؟
- بێگومان مەقام بەشێكی سەرەكی و رەسەنی هونەری گۆرانیوتنە، من ماوەیەك لەسەر ئامێری سازی باغڵەمە كارم كردووە، ئەم سازەم زۆر خۆشدەوێت، بەڵام بەداخەوە بە بۆنەی سەرقاڵیم بە خوێندن و كارەوە نەمتوانی بەشێوەی پڕۆفیشناڵ درێژەی پێ بدەم، زۆریش حەز بە مەقامەكانی مامۆستا تایەر تۆفیق دەكەم و مەقامێكیشی بە باشی دەڵێمەوە.