پیشانگای مامۆستایانی هونەر
ئا/ تاریق كارێزی
لە رووی ژمارەوە بەشدارانی پیشانگاكە زۆر بوون، لە رووی ئاستی هونەری و كوالێتیی بەرهەم و تابلۆكانیشەوە، لە پاڵ هەندێك بەرهەمی ئاست و كوالێتی مامناوەند، ئێمە بەرهەمی بەرز و داهێنانی جوانمان بەدی كرد. لە هەر پیشانگایەكی هاوبەشدا ئەم شتە چاوەڕوان كراوە، لە پاڵ ئەوەشدا چاكتر وا بوو، ئەگەر (لیژنەی رێكخستنی پیشانگاكە) جەخت بكاتە سەر ئەوەی كە مامۆستایان بە بەرهەمی تازەی خۆیان، نەك هی ساڵانی رابردوو، بەشداری بكەن. خۆ ئەگەر پێوانە و مەرجیش بۆ بەشداریكردن دیاری بكرێت، پێمان وایە پیشانگاكە لە ئاستێكی چاكتردا دەبێت. بۆ جۆشدانی گیانی كێبڕكێ و داهێنانیش، بۆ ئەوەی خەڵات بە بەرهەمی نایاب و براوە بدرێت، دەكرێ لیژنەیەك بۆ هەڵسەنگاندنی بەرهەمەكان دابندرێت، رێزنامەش بە تێكڕای بەشدارانی پیشانگاكە بدرێت. ئەم پیشانگایە هەنگاوێكی لەبار بوو بۆ پیشاندانی توانای مامۆستایان لە بواری هونەری شێوەكاری (نیگار، پەیكەر و سیرامیك)، وەك دەردەكەوێت دەرچووانی كۆلیژ و پەیمانگاكانی هونەری جوان، ئەمڕۆ لە نێو دەزگاكانی وەزارەتی پەروەردەدا جێی شایستەی خۆیان هەیە و توانایەكی زۆری هونەری لە نێو مامۆستایانی وەزارەتدا هەیە.
رەنگە بە هۆی ئەوەی مامۆستایان لە دامەزراوەیەكی پەروەردە (قوتابخانە)دا كار دەكەن، بەشێكی بەرچاو لە تابلۆكانی پیشانگاكە لە بارەی سروشت و ستیلاف (بێگیان)ـەوە بووبن، ئەمە وێڕای ئەوەی بابەتی هەمەجۆری مۆدێل و بابەتی كەلەپووری كوردەواری و هونەری مۆدێرنیش لەپیشانگاكەدا بەدی دەكرا، لەگەڵ ژمارەیەك بەرهەمی پەیكەر و سیرامیك. لە پیشانگاكەدا تابلۆی سەرنجراكێش دەكەوتە بەر دیدە و نیگای بینەران، مامۆستایان ستاتیكای وڵاتی شاخاویی خۆیان بە زمانی رەنگ و فۆرم چنیوەتەوە. لەم وڵاتەدا، هەر چۆنێك مرۆڤی كوردستانی چاو بكاتەوە، چیا و سروشتی رازاوەی وەرزەكانی ساڵ خۆی دەنوێنێ، جگە لەوەی كێشانی نیگاری سروشت لە رووی رەنگ و فۆرم و فیگەر و پێكهاتە و داڕشتنەوە، فرەیی دەوڵەمەندییەكی زۆر دەخاتە بەر دەست، بوارێكی زۆر بۆ سەلیقەی جوانخوازانەی مرۆڤیش دەڕەخسێنێ، كە هونەر ئارایی و نیگار بكات، جگە لەوەی سروشت بۆ خۆی ئامێز و ژینگەی مرۆڤە، هەر چۆنێكی هونەرمەند چاو هەڵبڕێت، جوانی و دەوڵەمەندیی سروشت بە رەنگ و فیگەرییەوە، خۆی دەنوێنێ. وەك نەریتێكی ئەكادیمی و فێركارانەی هونەری نیگار، هەردەم ستیلاف (بێگیان) نموونەیەكی ئامادە و بەردەستە بۆ مەشق و خۆ تاقی كردنەوە، هەر بۆیە دەبینین سروشت و ستیلاف لە (پیشانگای شێوەكاریی مامۆستایانی پەروەردەی پارێزگاكان)دا، بە سەر بابەتەكانی دیكەدا زاڵن.
سەرنجێك كە لێرەدا جێی خۆیەتی بیخەینەڕوو، ئەوەیە كە تا ئێستا لە قوتابخانەكانی كوردستاندا پرۆگرام بۆ وانەی هونەر نییە، ئەمەش بۆشاییەكی گەورەیە، چونكە هونەر لە ژیانی مرۆڤدا نەخشێكی كارا و ئامادە بوونێكی هەمیشەیی هەیە و ناتكرێت لە پرۆگرامی پەروەردە و خوێندندا بەم جۆرە پەراوێز بخرێت. رەنگە لە جێی خۆیدا بێت، ئەگەر وەزارەتی بەڕێزی پەروەردە لە حكوومەتی هەرێمی كوردستان ئەم دوو سەرنجەمان لێ قبووڵ بفەرمووێت:
یەك: بۆ وانەی هونەر، پرۆگرامێكی خوێندن وەك هەر وانەیەكی دیكە دابندرێت.
دوو: پێویستە وانەی هونەر تەنیا لە هونەری نیگاردا قەتیس نەكرێت، بەڵكوو پرۆگرامی پەروەردەی هونەر بە پێی قوتاغەكانی خوێندنی (بنەڕەت و ئامادەیی)، تێكڕای هونەرەكان (مووزیك، نیگار، پەیكەر، سیرامیك، شانۆ، تەلارسازی، سینەما) بگرێتەوە.
