خانمە ئەكتەری ناسراوی بۆڵیۆد عەلیا بەهات كە ئێستا پەیوەندیی خۆشەویستیی و هاوسەرگیری هەیە لەگەڵ ئەستێرەی بۆڵیۆد رانبیر كاپۆرهەیە، رایگەیاند كەوا هاوسەری دواڕۆژ بە هیچ شێوەیەك ناچاری ناكات واز لە كاری نواندن بهێنێت لە دوای پێكهێنانی ژیانی هاوسەری كە بڕیاریان داوە لە ساڵی 2020 ئەنجامی بدەن.
عەلیا بەوە ناسراوە كە بەردەوام لە پەیوەندیدایە لەگەڵ جەماوەر و هەوادارانی خۆی و ئەم وتانەشی لە میانەی پرسیاری یەكێك لە هەوادارانی لە رێگای تۆڕی كۆمەڵایەتی ئەنستگرامەوە بوو، كاتێك لێی پرسی: ئایا واز لە كاری هونەری دەهێنیت لە پێناو هاوسەرگیری؟ لە وەڵامدا عەلیا گوتی: لە پێناو هاوسەرگیری پێویست ناكات واز لە هیچ كارێك بهێنم، بەتایبەتی كاری هونەری، چونكە هونەری نواندن لەگەڵ خوێنم تێكەڵ بووە، ئەوەشتان بیر نەچێت كە من و رانبیر لە رێگای هونەرەوە یەكتریمان ناسیوە و هەر لە رێگای هونەریشەوە بوو ئەو پەیوەندییە خۆشەویستییەی نێوانمان درووست بوو، بۆیە بە هیچ شێوەیەك رێگام لێناگرێت و بەردەوام دەبم لە كاری هونەری، بەپێچەوانەوە لەمەودوا دڵنیام كە زیاتر هاوكاریم دەكات بۆ ئەوەی لە كارەكانمدا سەركەوتوو بم.
چەند سەرچاوەیەكی نزیك لە عەلیا بە (هند تودای)یان راگەیاند: ئێستا عەلیا لە قۆناغێكی گەورەی ژیانیدایە، لە حاڵەتێكی خۆشەویستیدا دەژیت و خۆی خۆشەویستەكەی باشتر لە یەكتری و سرووشتی كاری یەكتری دەگەن، هەرچەندە بڕیارە لە ساڵی 2020 ژیانی هاوسەری پێك بهێنن، بەڵام عەلیا رایگەیاند لەوانەیە سوپرازێك رووبدات و زووتر ببنە هاوسەری فەرمی، بەتایبەتی ئەگەر كەسوكاری رانبیر داوا بكەن.