ژمارەیەكی زۆر لە كچانی رۆژهەڵاتی كوردستان رۆڵێكی بەرچاویان هەیە لە كارە هونەرییەكان، بەتایبەتی نواندن و نمایشكاری جلوبەرگ و توانیویانە لە بوارەكەی خۆیاندا سەركەوتوو بن. سەحەر تەها یەكێكە لەو كچە رۆژهەڵاتییانەی كە پەیمانگەی كۆمپیوتەری لە مەهاباد تەواو كردووە، دواتر هەوڵدەدات خەونی منداڵیی خۆی بێنێتەدی، بۆیە دەچێتە كۆلیژی هونەر، بەڵام لەبەر چەند هۆكارێكی تایبەت ناتوانێت كۆلیژ تەواو بكات، لەبەر ئەوەی روودەكاتە هونەری وەرزشكردن، دەبێتە راهێنەری لەشجوانی، بەڵام پاشان بەهۆی بەشداریكردن لە چەند كارێكی هونەری لە رۆژهەڵاتی كوردستان ناودەردەكات، دواتر بەهۆی رێگری لە ژنان بۆ كاری هونەری روودەكاتە باشووری كورستان، ماوەی دوو ساڵیشە لە باشووری كوردستان كاری هونەری دەكات، گوڵان لەسەر پڕۆژەكانی داهاتووی ئەم هەڤپیڤینەی لەگەڵ كردووە.

* نوێترین كاری هونەریت چی بووە؟
-نوێترین بەشداریكردنم لە كاری سینەمایی فیلمێك بوو، كە لە شاری كۆیە بەرهەمهات، فیلمەكە باس لە مێژووی كریستیانەكان لە عێراق و مەینەتییەكانی ئەوان دەكات، لەم فیلمەدا من بەهۆی ئەوەی توركییەكی باشم دەزانی، رۆڵی دادوەرێكی توركم دەبینی، پێمواییە یەكێك بوو لەو فیلمە سینەماییە بەهێزانەی كە دوای تەواوبوونی لە فێستیڤاڵەكان پێشوازییەكی باشی لێ دەكرێت.
* داواكاری زۆرت لەلایەن دەرهێنەرەكانەوە بۆ دێت؟
- بێگومان داواكاری زۆرم بۆ دێت، بەڵام هەوڵدەدەم لەگەڵ باشترین دەرهێنەر كار بكەم، بۆ رەمەزانی ئەمساڵ بەشداریم لە درامایەكی توركمانی لە هەولێر كرد، كە لە كەناڵێكی عێراقی پەخش دەكرا، من هەوڵدەدەم رۆڵی خۆم بە باشی لە فیلم و درامایەكان ببینم.
* ماوەیەكە شانۆگەری كۆمیدی لە باشووری كوردستان پێشكەش دەكرێت و بینەری زۆری هەیە، ئێوش لە چەند شانۆگەرییەكی كۆمیدی بەشداریتان كردووە، ئاستی ئەم شانۆگەرییانە چۆن دەبینی؟
- پێموایە لەو بارودۆخەی ئێستای كوردستان كۆمیدیا بە گشتی زۆر گرنگ و پێویستە، ئەم خەڵكە پێویستە لە رێگەی شانۆگەریی كۆمیدی زەردەخەنە و پێكەنین بگەڕێنینەوە سەر لێوانیان.
* خەڵك رەخنەی زۆر لەو كارانە دەگرن كە ئێستا بە ناوی كۆمیدیاوە پێشكەش دەكرێن، سەبارەت بەو رەخنانە رات چییە و ئایا لە جێی خۆیاندان؟
- بێگومان هەموو كارێك لایەنی باش و خراپی هەیە، بەڵام من دووبارە دەیڵێمەوە كۆمیدیا لەم بارودۆخە زۆر پێویستە، گرنگە خەڵك روو لە هۆڵەكانی شانۆ بكات و تێكەڵی كاری هونەری بێت، پێموایە ئێستا شانۆی كۆمیدی جەماوەرێكی زۆری هەیە.
* سەرەڕای ئەو ئازادییەی ئێستا هەیە، بەڵام ژمارەی ئافرەتان لە بواری هونەریدا كەمە، هۆكاری ئەمە بۆچی دەگەڕێنیتەوە؟
- هۆكاری كەمیی خانمە شانۆكاری بواری كۆمیدی ئەوەیە، كە لە كۆمەڵگەی ئێمە هەموو شتێك بە عەیب و شەرم دەزانن، بۆیە شانۆكارەكان زۆر خۆیان لە بواری كۆمیدی نادەن، بۆ ئەوەی دوور بن لە توانج و گلەیی خەڵكی، زۆر كچ هەیە حەز دەكەن ببنە شانۆكاری كۆمیدی، بەڵام بنەماڵەكەیان رێگایان پێنادەن و ئەم كارە بە شەرم دەزانن، لەگەڵ ئەوەشدا كچانی رۆژهەڵات ئەو كۆت و بەندەیان شكاندووە و لەم بوارە كاری باش دەكەن، بەڵام هەمیشەش توانج لە كچانی رۆژهەڵات دەدەن.
* زیاتر حەز لە بواری سینەما، یان شانۆ دەكەی؟
- سینەما حەزو خولیا و هیوایەتی من بووە، دوای سینەماش زۆر حەزم لە كاری مۆدێلینگە و دواتر شانۆ، من پێموایە هەریەكەو تام و چێژی تایبەت بە خۆی هەیە، بەتایبەتی كاتێك لەسەر شانۆ بەرامبەر كۆمەڵێك خەڵك نواندن دەكەم، زۆر هەست بە شانازی دەكەم، ئەمە خۆشترین هەستم پێ دەبەخشێت.
* چی وای لێكردی كە كاری نمایشكاری جلوبەرگ هەڵبژێری، مەرجەكانی كچی نمایشكار چین؟
- هەڵبەتە هەموو كەسێك بۆ كاری مۆدێل و نمایشی جلوبەرگ ناگونجێت، دەبێت هەندێ مەرج و تایبەتمەندی وەك كێشی لەش و بەژن وباڵا و پێوەری دیكە بۆ مۆدێلی هەیە، پێموایە بەشێكی زۆر لە مەرجەكان لە مندا هەیە، بۆیە بەشداری لە زۆربەی نمایشەكانی كوردستانم كردووە، هاوكات سەما ئیسماعیلی، مۆدێلی ناودار زۆر هاوكارم بووە بۆ كاری هونەری و مۆدێلی.
* شارەزاییت لە سەماكردن هەیە؟
- بێگومان حەزم لە هەموو سەماكانە، من چەندین جۆر هەڵپەڕكێی كوردی دەزانم، لەگەڵ ئەوەشدا سەمای ئێرانی و تانگۆ، سالسە، ئازەری، سەمای عەرەبی، بەڕاستی زۆر زۆر شەیدای سەمای عەرەبیم، لەگەڵ ئەوەشدا یەكێك لە خەونەكانم ئەوە بووە ببمە راهێنەری سەما، بەڵام هێشتا ئەو خەونەم نەهاتووەتەدی.
* نەشتەرگەری جوانكاری تا چەند بۆ هونەرمەند پێویستە و ئایا تۆش ئەنجامت داوە؟
- تا ئێستا هیچ نەشتەرگەرییەكی جوانكاریم نەكردووە، هەموو خەڵك كاتێك وێنەكانم دەبینن، دەڵێن تۆ نەشتەرگەری جوانكاریت كردووە، بەڵام من دڵنیایان دەكەمەوە نەمكردووە. ئەگەر نەشتەرگەری جوانكاری بكەم، یەكەمجار بۆ لووتم دەكەم، چونكە هەست دەكەم تەنیا لووتم كەمێك پێویستی بە نەشتەرگەریی جوانكاری هەیە، هەرچەندە برادەرەكانم زۆر پێم دەڵێن تۆ هیچ شوێنێكت پێویستی بە نەشتەرگەری جوانكاری نییە.
* رات چییە بەرامبەر بە سۆشیال میدیا كە ئێستا بووەتە بەشێكی گرنگی ژیانی هونەرمەندان؟
- تەنیا ئینستاگرامم هەیەو گرنگی زۆری پێدەدەم، فێسبووكم نییە، بەڵام چەندین ئەكاونت و لاپەڕە بەناوی منەوە كراونەتەوەو بەناوی من قسە لەگەڵ خەڵك دەكەن، بۆیە لە رێگەی ئێوەوە رایدەگەیێنم كە جگە لە ئینستاگرام هیچ لاپەڕەیەكی دیكەم لە سۆشیال میدیا نییە.
* سەبارەت بە رزگاربوون لە رەبەنی و پێكهێنانی ژیانی هاوسەریی چی دەڵێی؟
- تاوەكو ئێستا بیرم لە شووكردن نەكردووەتەوە، حەز دەكەم جارێ گرنگی بە كارە هونەرییەكانم بدەم، چونكە ئەگەر شوو بكەم، رەنگە نەتوانم لە كارە هونەرییەكانم بەردەوام بم، بۆیە جارێ بیری لێ ناكەمەوە، چونكە ئێستا خیانەتكردن گەلێك زۆر بووە.