رۆژی چوارشەممەی رێكەوتی 30/5/2018 ئەستێرەی تەلەفەزیۆنی واقعی ئەمریكی كیم كارداشیان لە كۆشكی سپی ئەمریكادا چاوی بە دۆناڵد ترەمپی سەرۆكی ئەمریكا كەوت بە ئامادەبوونی پارێزەری تایبەتی خۆی بۆ باسكردنی چەند بابەتێكی تایبەت بە پرسی زیندانییەكان لە ئەمریكا.
دیداری نێوان ترەمپ و كارداشیان نزیكەی یەك كاتژمێری خایاند و تێیدا كارداشیان باسی لە رەوشی بەندكراوەكان و حوكمی دادگاكانی ئەمریكا بۆ سەرۆكی وڵاتەكەی كرد، ترەمپیش گرنگییەكی زۆری بەم دیدارە دا، بۆ ئەم مەبەستەش وێنەیەكی خۆی و كارداشیان لە نووسینگەی تایبەتی خۆی لەسەر تۆڕی كۆمەڵایەتی تویتەر بڵاو كردەوە و بە كۆبوونەوەیەكی باش وەسفی كرد، هەر لەم بارەوە كیم ئەم دیدارەی قۆزتەوە و داوای لە ترەمپ كرد كە لێبووردنێك رابگەیەنێت بۆ ئافرەتێك بە ناوی ئەلیس مارییە و تەمەنی 62 ساڵ كە بە هەتا هەتا سزا دراوە دوای تێوەگلانی بە كاركردن لەگەڵ تۆڕێكی بازرگانیكردن بە ماددە هۆشبەرەكانەوە.
دوای دیداری لەگەڵ سەرۆك ترەمپ، كیم چاوی بە ئیڤانكای كچی و زاواكەیشی كەوت و بە دوورودرێژی باسیان لەو ئافرەتە كرد كە بە تۆمەتی بازرگانیكردن بە ماددە هۆشبەرەكان سزا دراوە، لەم بارەوە كچ و زاواكەی ترەمپ پشتگیریی خۆیان بۆ داواكەی كیم دەربڕی.
شایەنی باسە كیم یەكێك بوو لە لایەنگرانی ترەمپ و پەیوەندییەكی بەهێزی لەگەڵ كچەكەی ترەمپ هەیە كە رۆڵی هەبوو لە رێكخستنی ئەو چاوپێكەوتنە.