لوقمان غەریب: لە رووی ناوەڕۆك و شێوازی بەرهەمهێنانەوە هەنگاوێكی گەورەیە لە مێژووی درامای كوردی
لوقمان غەریب دەرهێنەری درامای (دوابڕیاری یاقوب) لە بارەی بەرهەمەكەیەوە دەڵێت: ئەو ستایلەی كارم لەسەر كردووە، ستایلێكی رەخنەگرانەی كۆمەڵایەتی یا كۆمیدیە، لەو بەرهەمەشدا هەنگاوێكی تازەم هاوێشتووە، ئەویش كارم لەسەر دەقێكی تازە كردووەو لە نووسینی ئەو دەقەدا هەوڵمداوە ئەم جارە رەخنەیەكی واقیعییانەو كەمتر كۆمیدیا بەكار بهێنم، چەند روویەكی دیكەی دیاردەكانی ئەمڕۆی كۆمەڵگەی خۆمان لەو درامایەدا بخەمەڕوو، كە لە ئێستادا بەشێكی زۆری خەڵك بە دەست ئەو دیاردە نالەبارانەوە دەناڵێنن و پێویستە لە رێگەی دراما نیشانی بینەری بدەین. لەم درامایەدا تەنیا ناوەندی «گاڤ» بۆ بەرهەمهێنانی هونەریی لەپشت كارەكەم بووە، ئەویش ناوەندێكی ئەهلی و سەربەخۆیە، هەر بەرهەمێكمان بەرهەم هێنابێت، خۆمان پارەمان بۆ دابین كردووە، پاشان لەگەڵ تەلەفزیۆنێك، یان كۆمپانیایەك رێك كەوتووین و بڵاومان كردۆتەوە، بۆیە لەگەڵ رێزم بۆ وەزارەتی رۆشنیری من لە ئێستادا تەنیا لەگەڵ تەلەفزیۆنەكان مامەڵە دەكەم».
دەربارەی شێوازی كاركردن لەو درامایە و جیاوازیی لەگەڵ كارەكانی پێشوی لوقمان غەریب دەڵێ: ئەو درامایە لە رووی ناوەرۆك و شێوازی بەرهەمهێنان و تەنانەت وێنەگرتنیشەوە، هەنگاوێكی گەورەیە لە كارەكانی من و هەنگاوەكانی ئێستای درامای كوردی، بەو فۆرمەی پێشووم كارم نەكردووە، چونكە من ئەگەر كار لە دوای كار، نەزانم شتێكی تازەم هێناوەتە بوون، دڵنیام كاری تێدا ناكەم، لە دوای نمایشەكەی ئیتر پێموایە بینەران و چاودێرانی هونەریی ئەو هەنگاوە دەبینن». گوتیشی: «بێگومان ئەوە ئەركێكی زۆر گرانە، بەڵام لە كاتێكدا دەبینن لەكوردستان، تا ئێستا سیناریۆنووس و نووسەری ئەوەندە زۆرمان نییە، بەردەوام پشتیان پێ ببەستین، ئەگەر هەشبێت رەنگە نەتوانێ ئەوەی ئێمەی دەرهێنەر، یاخود من دەمەوێ بۆم بنووسێت، چونكە دەرهێنەر زۆرجار بەدەست دەقێكەوە دەناڵێنێت و نازانێت چی لێ بكات و چۆن مامەڵەی لەگەڵ بكات، ئەگەرنا چی لەوە خۆشترە من تەنیا كاری دەرهێنان ئەنجام بدەم و خەریكی كاری خۆم بم».
دەربارەی ئەكتەرەكانی دراماكە لوقمان غەریب دەڵێ: هەندێكیان لەو ئەكتەرانەی لە هەردوو بەرهەمی (نامەكانی ئەشرەف و رەیحانە) بەشدار بوون، لەو بەرهەمەشدا بەشدارن، بەڵام ژمارەیەكی بەرچاو لە ئەكتەری تازە بەشدارن لەو درامایە، كە بەشێكی زۆریان تازە هاتوونەتە ناو كاری دراما، بۆ نموونە زیاتر لە (٦) ئافرەت هاتوون لەو درامایە نواندن ئەنجام دەدەن، كە ئەوەشیان هەنگاوێكی باشە بۆ پێشەوە چوونی ئاستی درامای كوردی».
دەربارەی ئەوەش كە زیاتر پشت بە كەسانی شارەزا لە كوردستان، یان لە دەرەوە دەبەستێت، گوتی: «من لەوەتەی كارم كردووە لە بەرهەمهێنانی دراماكانم، پشتم بە خەڵكی خۆمان بەستووە، لە (٤) درامای رابردوومدا پشتم بە خەڵكی خۆمان بەستووە، بەڵام وەك ئەزموونێكی تازە ویستم لەگەڵ ستافێكی دەرەوە ئەم كارە بكەم، بۆ ئەوەی بۆ منیش روون ببێتەوە كەموكوڕییەكانی ئێمە چییە بە بەراورد لەگەڵ وێنەگرێك، یا كەسانێكی پشت كامێرا، كە لە وڵاتێكی وەكو ئێرانەوە هاتوون و ئەوە چەند مانگێكە لەگەڵ من كار دەكەن، دیارە ئەوانەی من هێناومن، خاوەنی چەندین كاری باشن و ئەزموونێكی دەوڵەمەندیان هەیە، بۆیە لەكاتی نیشاندانی دراماكە بۆتان دەردەكەوێ ئەم جارە گۆڕانكارییەكانی ئەو ستافە چی بووە».
دەربارەی ناوەڕۆكی دراماكە و ئەكتەرە بەشداربووەكانی دراماكەش دەڵێ: «ناوەرۆكی دراماكە بریتییە لە كۆمەڵێك رووداوی كۆمەڵایەتی سەردەم كە تێیدا زیاتر لە ١٠٠ ئەكتەری ناودار و دیار و ناسراوی كورد بەرجەستەی رۆڵەكان دەكەن، لەوانە (حەمە رشید هەرەس، فرمێسك مستەفا، ئەحمەد جۆڵا، مستەفا ئەحمەد، سەمیعە ئەحمەد، قادر مستەفا، غەفوور عەبدوڵا، حەمە سەعید برایم) و كۆمەڵێك هونەرمەندی ناوداری تر. كارە هونەرییەكانیش ستاڤێكی تەكنیكی و خاوەن ئەزموون و شارەزای بیانی جێبەجێیان كردووە كە لە وڵاتی ئێرانەوە هێنرابوون، لەوانە (نەسوڵا كەبیری كامیرامان، جەمشید ئازموودە ساوند، فەرشاد شاحوسەینی لایتین ) و چەند تە كنیككارێكی تر .
جێی ئاماژەیە دراماكە لە شەوان و رۆژانی رەمەزان لە ٣ كاتی جیاوازدا لە كەناڵی كۆرەك پەخش دەكرێت (١٠ی شەو، ٢ی پارشێو، ٢ی پاش نیوەڕوو) ئەم درامایە سەرجەم بینراوەكانی لە ناو شاری سلێمانی و دەوروبەری وێنەی گیراون و لە ئاستێكی تەكنیكی بەرزدا بەرهەمهێنراوە.
