رێبوار سەعید (مامۆستای شێوەكاری لە كۆلێژی هونەرە جوانەكان، زانكۆی سلێمانی) یەكێكە لەو هونەرمەندانەی بە پلان و پڕۆژە كار دەكات. گەورەترین پڕۆژەی ئەو دەربارەی كیمیابارانی هەڵەبجە بوو. لەو كاتەی لە بەریتانیا دەژیا، بە ژمارەی شەهیدانی 16/3/1988ی هەڵەبجە، (تابلۆ تابووت)ی دروست كرد. بەرهەمەكانی ئەو پڕۆژە گەورەیە، رێبوار سەعیدی هونەرمەند پێشكەش بە یادگای هەڵەبجەی كردن، لە لەندەنەوە هێندرانەوە كوردستان. زۆر بەداخەوە، لەگەڵ سووتاندنی چەند ساڵ بەر لە ئێستای یادگارەكەدا، ئەو گەنجینە هونەرییەش لەدەست چوو.
ئەم هونەرمەندە بە هەستێكی بەرزی مرۆڤدۆستییەوە، ژیانی هونەریی خۆی بەسەر دەبات. هەر لەم سۆنگەیەوە بۆ داستانی شكۆداری بەرخودانەكەی كۆبانێ، پیشانگایەكی تایبەتی كردەوە. لەو پیشانگەیەدا بە زمانی جوانی گوزارشتی لە رەوش و رۆژگارێكی دژواری نەتەوەیەك و خۆڕاگرییەكەی كرد، كە وێڕای شاڵاوی هەمەلایەنەی نەیاران، قارەمانانە داكۆكیی لە خاك و شكۆی خۆی كرد.
عەفرین دوایین برینی جەستە و رۆحی نەتەوە هەرە دێرینەكەی رۆژهەڵاتی ناوەڕاستە. هەرێمی عەفرینی رووپۆش بە زەیتوون، نەیتوانی رێ لە شاڵاوی تیرۆركردنی ئەو بەهەشتەی كوردستان بگرێت، وەك شوێنانی دیكەی ئەم وڵات گوڵستانە، تیخی كول و ژەنگنی داگیركەر، دڵی ئاشتیخوازانە و ژیاندۆستانەی ئەوی سمی. بەهای مرۆڤانە پاشەكشەی كرد، بەرژەوەندیی وڵاتان رێی دا، چەتەی توندڕەو بە نوێژی نیوەڕۆ، بە پاڵپشتیی تانك و تۆپ و فڕۆكەی زلهێزێكی هەرێمی، خاك و شكۆی هەرێمێكی ئارام پێشێل بكەن، كە لە هەر بستە خاكێكیدا، نەك چڵە زەیتوون، بەڵكوو دار زەیتوونێك گەردنی بەرەو ئاسمان هەڵبڕیوە. بە دروشمی (چڵە زەیتوون)ێكی نامۆشەوە، ئەو هەرێمە خرایە نێو دۆزەخ و سووتماكی داگیركەری فرە رەنگەوە.
ئەم مەرگەساتە مرۆییە، ئەگەرچی سات بە سات لە رێی شاشە و كەناڵەكانەوە دەخرایە بەر دیدەیخەڵكی سەرانسەری جیهانەوە، كەچی ویژدانی مرۆڤایەتی لە ئاست تراژیدیای زەیتوونستانی وڵاتەكەم، كوێر و سارد و سڕ بوو. ئەم تراژیدیایە دڵی گەرم و زیندووی هەموو كوردێكی هێنایە جۆش، ئاخر برینی جەستە و رۆحی ئێمە، هەر خۆمان لە ناخەوە هەستی پێ دەكەین، بۆیە دەبینین ئەگەرچی هونەرمەند بە جووتە زمانێك هاوار دەكات، كە هەموو جیهان تێی دەگات، بە هونەر و ئینگلیزی دەڵێ: فریای عەفرین بكەون (SAVE AFRIN)، مەلی رەنگاوڕەنگی ئاشتیستانی عەفرین بە ئاگری تازەترین چەكی زەوی و ئاسمانی ئەم سەردەمە دەسووتێت. كەچی جیهان كەڕ و كوند خۆی نواند. وەی لەو حەشرە!
رێبوار سەعید ئەم بەرهەمانەی بە شێوازی دیجیتاڵ هونەر (دیجیتاڵ ئارت) گەڵاڵە كردوون. لەم ستایلەی هونەری شێوەكاریدا، هونەرمەند لە پای سوودوەرگرتن لە تەكنیكی كۆمپیۆتەر و بەرنامەی جۆراوجۆری، بۆ دەوڵەمەندكردنی رووبەری تابلۆكانی بە رەنگ و فۆرم و ئەتمۆسفیری سەرنج راكێش و جۆشدانی گوتاری دیدەییانەی خۆی، دەست كراوەیە. تابلۆی دیجیتاڵ هونەر لە دوو لاوە (دەست و كارامەیی هونەرمەند + دیجیتاڵ تەكنیك) دێتە بەرهەم.
لەم پڕۆژەی (عەفرین رزگار بكەن)ـەدا، رێبوار سەعید بۆ گەڵاڵەكردنی پڕۆژەكەی دوو هێما (مرۆڤ و باڵندە)ی بە چڕی بەكار هێناوە. ئەگەرچی هەمیشە مرۆڤ كرۆك و مەبەستی گوتاری دیدەییانەی ئەوە، وێڕای ئەوە بابەتی گەرم و گوڕی رۆژگار و دۆخی مرۆییانەی نێو درامای رووداوەكان، دەبێتە هەوێنی بەرهەمهێنانی تابلۆ و خەمڵینی پڕۆژەی هونەری لە لای ئەم هونەرمەندە.

ئا/تاریق كارێزی