فرمێسک حافیز، خانمە گۆرانیبێژی کورد، نوێترین ئەلبوومی خۆی بە ناوی (ئارەزووی فڕین) بڵاو دەکاتەوە, فرمێسک لە ھەژماری تایبەتیی خۆی، لە تۆڕی کۆمەڵایەتیی (ئینستاگرام)، لەمبارەیەوە ڕوونکردنەوەیەکی بڵاو کردووەتەوە و ئاماژەی بەوە داوە، کە سەرجەم کارەکانی ئەلبوومەکە تەواو بووە و لە ھەفتەکانی داھاتوودا بڵاو دەبێتەوە.

ئەو خانمە گۆرانیبێژە، لە بەشێکی پەیامەکەیدا دەڵێت: "زۆر بەم ئەلبوومە ماندوو بووم، ھەوڵم داوە چ لە ڕووی ماددی، چ مەعنەوی ئەوەی لە دەستم ھاتبێ کردوومە، ھیوادارم جێگای لەناو دڵی گوێگران بکاتەوە و ببێتە یادگارییەکی شیرین".

ئارەزووی فڕین، یەکێکە لەو گۆرانییانەی کە فرمێسک کاری کلیپی بۆ کردووە و پاش بڵاوکردنەوەی ئەلبوومەکەی، بڵاوی دەکاتەوە, فرمێسک خەڵکی ڕۆژھەڵاتی کوردستانە، خاوەنی چەند گۆرانی و ڤیدیۆ کلیپێکە، چەند ساڵێکە لە ئەورووپا دەژی.