لوقمان غەریب *

لە یازدە ساڵی رابردوودا، هەوڵ و تەقەلایەكی زۆرمان دا كە پێگە سەرەكییەكانی ئەم بوارە گرنگەی هونەر (سینەما و تەلەفزیۆن) بە سروشتی خۆی و وەك دنیای پێشكەوتوو بەرجەستە بكەین. ئەم كۆششەمان لە وڵاتێكدا دەست پێكرد، كە خۆی لە زۆر لە بوارەكانی تری ژیاندا لە سەرەتای دۆزینەوەی شوناسی خۆیدا بوو. سەرەتایەكی تازە و هەنگاوی بە سروشتی كردنی كایە و كاركردنی بوارێك كە دەخوازێت رێچكەی ئاسایی خوی وەك هەر جێگەیەكی تری ئەم دنیایە بدۆزێتەوە. توانیمان تا ئەندازە و قۆناغێك سەركەوتوو بین.
ئەگەر حوكمی رۆژگار و جەوری زەمانە نەبووایە، ئیستا چەند گاڤێكی تر لە پێشەوە بووین. بەڵام لە هەموو حاڵەتێكدا و بە هەموو ئەو دۆخە ناخۆشەی كە بەسەر وڵات و بەسەر هەموواندا هات، ئێمە لە (GAV) و لە كایەی كاركردنی خۆماندا، خۆشبەختین بەوەی كە چەندین ئەزموونی گەورە و ناوازەمان پێشكەش بە بینەری كورد و بوارە هونەرییەكەی كوردستان كرد. لە دیارترین كەناڵەكانی كورستان بەرهەمەكانمان نمایش كران (كوردستان تیڤی، نەورۆز تیڤی، كەناڵ 4، كۆرەك تیڤی، زاگرۆس تیڤی، هەرێم تیڤی، گەلی كوردستان، كەركووك تیڤی و ...هتد) . زۆرترین و دیارترین و ناسراوترین هونەرمەندی كوردستانمان كۆكردەوە. رەنگ و دەنگی جیاواز و مۆزایكی بیر و بۆچوونە جیاجیاكانی كوردستانمان ئاوێتەی یەكتر كرد و خەسڵەتی كوردستانی بوونمان بەخشییە بەرهەمە هونەرییەكان، دەستپێشخەر بووین لە داهینانی چەمكی فەند و سپۆنسەری سەپۆرتی بازرگانی بۆ بەرهەمەكانمان و گواستنەوەی ئەركی بەرهەمهێنان لە كەرتی گشتی و میرییەوە بۆ كەرتی تایبەت و كۆمپانیا. هاوكات بە دامەزراوەكردنی بواری بەرهەمهینانی هونەریمان كردە مەرجی كاركردن و دیسپلین و رێكخستنی گرێبەستی كاركردنی هونەریمان داهێنا كە زەمانی پێش كاركردنی ئیمە (سپۆنسەر و گرێبەست و ئیدارەی بەرهەمهینان) بوارگەلێكی غایب و نادیار بوون. هەوڵ و تەقەلامان دا و توانیمان كۆمپانیا بازرگانییە گەورەكانی وەك (ئاسیا سێڵ، كۆرەك تیلیكۆم، بابیلۆن میدیا، فۆنێكس، فامیڵی مۆڵ، یوبی هۆڵدین و چەند كۆمپانیای مام ناوەند و بچووكی تریش) قایل بكەین بە سەپۆرتكردن و سپۆنسەری بەرهەكانمان و سەرنج و بایەخدانی ئەوانمان بۆ بەرهەمی هونەریی خۆماڵی راكێشا. لە جێی ساخكردنەوە بەرهەم و دراما بیانییە كۆن و ئیكساپەیارەكانی وڵاتان! دڵسۆز و دەست و دڵكراوە و دڵپاك كاری زۆر باشمان كرد كە بایی ئەوەن شانازی بەخۆمان و ئەو مێژووەوە بكەین، ئەمڕۆش مخابن ئیمەی پیشەوەرانی ئەم بوارە و هونەرمەندان بەگشتی، هەست بە پاشەكشەیەكی مەترسیدار و پەراوێزخستن و نیگەرانییەكی زۆر دەكەین. لە كاتێكدا كە دەبینین كایەی هونەر بەگشتی و بواری بەرهەمهینانی خوماڵی بەتایبەتی لەم سێ و چوار ساڵەی دواییدا، تەواو پشتگوێ خراوە و لە بیرچۆتەوە. نە حكومەت و دەسەڵاتداران، نە دەوڵەمەند و كەرتی تایبەت و كۆمپانیاكان، نە هیچ خەمخۆرێك بایەخێكی ئەوتۆ بەم بوارە گرنگە كەلتورییە نادەن و ئاگایان لێی نەماوە. ئەمڕۆ هونەرمەندان بێنازن و كار و داهینان و بەخشش و بەرهەمەكانیان بێ بازاڕ و بێ ئەرزش و بێ نرخ بووه، لە كاتێكدا و لە بارێكدا كە دەبینین، چەندین دامودەزگا و كەناڵی میدیایی گەورە و زەبەلاح و دەوڵەمەند و خاوەن دەسەڵات بوونەتە مەیدان و دوكان و بازاڕی ساخكردنەوەی بەرهەمی بیانی لە جۆری (دراما و پڕۆگرام و بڕگەی جۆراوجۆر)ی وڵاتانی توركیا و ئیران و چین و كۆریا و چەندین وڵاتی تری دوور و نامۆ بە چێژی راستەقینەی هونەریی لای بینەری كورد، ئەمەش جگە لە زیانی ماڵی و دارایی، كێشە و ئاریشەی كۆمەڵایەتی و خێزانی گەورەشیان لە وڵاتدا خوڵقاندووە. بێ ئەوەی لایەنیك، یان دەزگایەكی میریی هەبێت كە رێوشوێنی پێویست بۆ ئەو فەوزا و بەهەدەردانی ماڵی و شێواندنی كهلتوورییە دابنێت، كە خوڵقێنەر و تاوانباری سەرەكی، خاوەن و كاربەدەستانی ئەو دەزگایانەن كە لە كەسانی كاڵفام و هەرزە و بەرژەوەندیخواز و ماڵپەست و بێ ئینتیما پێكهاتوون.
هونەرمەندان و پیشەوەرانی ئەم بوارە داوادەكەن و بەپێویستی دەزانن كە دەسەڵاتداران و لێپرسراوانی هونەری و كەلتووریی كوردستان، خەمێك لەم كێشە گەورەیە بخۆن و سنوورێك بۆ ئەو پاشاگەردانی و بێ سەروبەرییە دابنێن كە بەشێكی كەم نییە لە گرفت و ئاڵۆزییەكانی كوردستان. هەر هیچ نەبێ و لایەنیكەم خەمێك نە(لەبەرەو پێشبردن)، بەڵكو لە پارێزگاریكردن لە كەلتوور و هونەری ئەم وڵاتە بخۆن.
لەم بۆنە پڕشكۆیەدا، پیرۆزبایی لە خۆم و هاوكارانم و هونەرمەندانی دڵسۆزی كوردستان دەكەم كە بەردەوام بە تاسە و خەمخۆرییەوە چاوەڕێی كاری نوێ و بەرهەمی تر و خزمەتی زیاتری هونەر و كەلتووری كوردستان دەكەن.

* بەڕێوەبەری ناوەندی (GAV KURD ART)