ئەو ساتانەی ناسڕێنەوە, (بەشداریم لە دیالۆگی عەرەبی - كوردی لە قاهیرە كرد).
1-پەیوەندییە مێژووییەكانی نێوان كورد و عەرەب.
2-كوردستانی عێراق لە ئێستاو ئایندەدا.
3- روانگەی عەرەب و كورد بۆ پرسەكانی ئاشتی و سەقامگیریی ناوچەكە.
ئەوە بوو لە كۆبوونەوەكانی پاشتردا رێككەوتن لەسەر كات و شوێنی كۆنگرە و هەموو ئەو شتانەی تەواوكەری كارەكانی كۆنگرەكە بوو. بڕیار درا لە مانگی (ئایار)ی ساڵی(1998)كۆنگرەكە لە قاهیرە لەهۆڵی (سەلاحەددین)ی ئوتێل (شیراتۆن) ببەسترێ و بەشێكیشی لەناوەندی (ئیبن خەلدون).
بە بەشداری (كۆمیتەی میسری بۆ پشتگیری، پارتی دیموكراتی كوردستان، یەكێتی نیشتیمانی كوردستان، هەندێ پارتی میسری و چەند لایەنێكی دیكەی كورد، كەسایەتی میسری و عەرەبی و كوردی).
لەلایەن مەكتەبی سیاسیی پارتییەوە لە رێگای هەڤاڵی شەهید مامۆستا (سامی عەبدولڕەحمان)ـەوە ئاگادار كرام كە یەكێكم لە بەشدارانی ئەو كۆنگرەیە و گوتارم دەبێ. ئەوەی شایەنی باسە شاندەكەی پارتی دیموكراتی كوردستان، لەم هەڤاڵانە پێكهاتبوو:
1- بەڕێز سامی عەبدولڕەحمان- سكرتێری مەكتەبی سیاسی – سەرۆك.
2- بەڕێز هۆشیار زێباری - ئەندامی مەكتەبی سیاسی- ئەندام.
3- بەڕێز جەوهەر نامیق-سەرۆكی پەرلەمانی كوردستان- ئەندام.
4- بەڕێز موحسین دزەیی- نمایندەی سەرۆك بارزانی- ئەندام.
5- بەڕێز د.سەعدی بەرزنجی- نمایندەی یاسایی سەرۆك بارزانی- ئەندام.
6- بەڕێز عومەر بۆتانی- بەرپرسی نووسینگەی پەیوەندییە عەرەبییەكان- ئەندام.
7- بەڕێز ئەحمەد سالار- شانۆكار و نەقیبی سەندیكای هونەرمەندانی كوردستان- ئەندام.
8- بەڕێز عەزیز محەمەد- سكرتێری پێشووی حیزبی شیوعی عێراقی- ئەندام.
9- بەڕێز عەبدولخالق زەنگەنە- سكرتێری بزووتنەوەی میللی كوردستان-ئەندام.
10- بەڕێز یوسف حنا یوسف- سكرتێری پارتی كاری سەربەخۆیی كوردستان-ئەندام.
11- بەڕێز غەفوور تاهیر مەخمووری- سەرۆكی پارتی یەكێتی نەتەوەیی كوردستان- ئەندام.
12- بەڕێز محەمەد فەرەج ئەحمەد - ئەندامی مەكتەبی سیاسی یەكگرتووی ئیسلامی-ئەندام.
بە تەنیا من لەناو شاندەكە بوارەكەم رۆشنبیری بوو، بۆیە بە چاكم زانی لە هەمان بواردا بنووسم و تایبەت بە پەیوەندی كورد و عەرەب لە گۆشەنیگای رۆشنبیرییەوە، هەندێ پرس و راو تەكبیرم بە (دكتۆر كەمال غەمبار )كرد، ئەویش هەر وای بەچاك زانی بە كۆپلەیەكی شعری (چیرۆكی برایەتی)ی (گۆران)ی شاعیری گەورەی نوێخواز دەست پێبكەم، كە لەلایەن (دكتۆر عیزەدین مستەفا)وە كرابوو بە عەرەبی:
((برای عەرەبی چاوڕەشم
تاڵ بوو بەشت، تاڵ بوو بەشم
لەیەك كاسە (تاڵی) نۆشین
برایی كردین بە هەنگوین..))
ئاوڕم لەسەرجەم ئەو بوارە رۆشنبیرییانە دابووەوە كە پتر كورد كاریگەری لەسەر عەرەب بەتایبەتی و ئیسلام وەك زمان و ئایین بەگشتی هەبووە. راستە كارەكە كاری پێدانە و لەهەمان كاتدا لێوەرگرتنە، لەگەڵ ئەوەشدا ئەوان گەلێك قەرداری ئێمەن، ئەوان بە دابونەریتی بیابانییەوە هاتنە ناوەوە، كە كوشتن و بڕین و دەستدرێژی و ئافرەت زەوتكردن، هیچ شتێكی ئەوتۆی ژیاری و شارستانیەتیان شك نەدەبرد، بەڵام من ئەوەندەی مەبەستم بوو تەنها وەبیرخستنەوە بوو نەك خوانەخواستە بەچاودانەوە.
فەرموودەیەكی(ئیمام غەزالی)م هێنابوویەوە كەباسی ئەو چوار كۆڵەكەیە دەكات كە راگری شارستانیەت و ژیاری عەرەب و ئیسلامن، كە سیانیان كوردن.
دەست بە یەكەم دانیشتنی كۆنگرە كرا و یەكەم باس، باسەكەی من بوو، سەرۆكەكانی دانیشتنەكە بریتی بوو لە بەڕێز (مام جەلال تاڵەبانی) و بەڕێز (ئەحمەد حەمروش)، لەلایەن بەڕێز (مام جەلال)ـەوە زۆر بە رێزەوە پێشكەشی كردم، دەبوو بابەتەكەم لە (20) خولەك زیاتر نەخایەنێت، پاش تەواوبوونم بە چەپڵەڕێزان رێزیان لێگرتم و سەرجەم ئەندامانی شاندەكەم دەستخۆشییان لێكردم، سەرەتا (كاك سامی عەبدولڕەحمان) فەرمووی: (لەمن وابوو هەر لەكوردیدا ئەسپت جوان تاودەدەیت و سوارچاكی، بەڵام لەعەرەبیشدا هەر شاسواری). ئەوەش هەر لەگەورەیی مامۆستا بوو.
ئەو چەند رۆژە بە كۆبوونەوەی چڕوپڕەوە كاتمان دەبردە سەر، لەبەری ئەو بەری ئوتێلەكەمان (ماڵی ئۆپرا) هەبوو، لەو رۆژانەشدا گۆرانیبێژی لوبنانی (ماجیدە ئەلرۆمی) كۆنسێرتی هەبوو، منیش یەكێك بووم لەهەوادارانی دەنگ و هونەرەكەی، بەڵام دەرفەتم بۆ نەڕەخسا، تەنیا رۆژێ بەر لە گەڕانەوەمان تاقی بەیانییەكەی ئازاد بووین، لەگەڵ خوالێخۆشبوو (كاكە جەوهەر نامیق) بەرەو (خان الخلیلی) چووین، بۆم باسكرد كە كاتی خۆی بە كاریگەری چیرۆكەكانی (نەجیب مەحفوز) لە لاوێتیما شەیدای نووسینەكانی بووم، پتر چیرۆكی (خان الخلیلی) وای لێكردبووم هەر كە ساڵی (1976) هاتمە قاهیرە دەستبەجێ چوومە سەردانی ئەو بازاڕە ناودارە.
بەرەو بازاڕەكە رێكەوتین، بەڵام ئەوەی من دیبووم، چ بازاڕ و چ شارەكە هیچی لە شوێنی خۆی نەمابوو، پاش بازاڕكردن، (كاك جەوهەر) رووی كردە كۆڵانێكی تەنگەبەر و ملمان پێوەنا، لەدڵی خۆمدا گوتم: هەردوو ناشارەزا داخۆ دەردەچێ، یان نا؟ (كاك جەوهەر) وتی: ها دەڕۆین، قابیلە هەر دەرنەچێ. بەهەر حاڵ كۆڵانەكەمان لێ بووە (توونی بابا) و نە تەكسی هەبوو، نە رێنیشاندەرێ، ئیدی ناو كۆڵانەكان كەوتین.
لە شوێنێكدا دەرچووین، دیاربوو بۆ چەندین سەدەی پێشتر دەگەڕایەوە، كەرەسەی خانووەكان و شێوازەكانیان وایان دەگەیاند، چەند سەعاتێكمان پێچوو، هەتا دەروومان لێكرایەوە و تەكسییەكمان لێ پەیدا بوو و گەڕاینەوە. ئەو چەند رۆژەی بردمانەسەر هیچ كەسێ هەستی نەك بە شەڕ و ئاشووبی نێوانمان، بەڵكو هەستیان بە گرفتێك لەنێوانماندا نەدەكرد، ئەوەی مەبەست و پەیامی كوردستانییانەمان بوو، گەیاندمان و لە رێگای سووریاوە گەیشتینەوە فیشخابوور و بە سواری گەمییە پەڕینەوە باشوور.
پاش ماوەیەك كتێبێك بە ناوی (الحوار) بە زمانی عەرەبی بڵاوبوویەوە، ئەو بەڕێزە دانەیەكی بە دیاری بۆ منیش ناردبوو، پاش سەیركردنی ناوەڕۆكەكەی باسەكەی منی تیادا نەبوو، منیش سەردانی (كاك جەوهەر)م كرد و بۆم باسكرد و وتم: تەنیا باسێ كە بایەخێكی رۆشنبیری هەبوو لەلایەن میسرییەكانیشەوە بەباشی لێوەی دەدوان، چۆن دەبێ یەكەم باسی لەبیر بكات؟ ئەوەی بەسەر كابرایەكی سلێمانی هاتبوو، پاش ئەوەی چارەكە سەدەیەك كاری (مەساح)ی دەكات لە ئاكامی تاقیكردنەوەیەك لە بەغدا بۆی دەنووسن (بینە و بین المساحة مساحة) نامەوێ بڵێم ئەمیش (بینە و بین العلاقات قارات) واتە لەنێوانی ئەم و پەیوەندییەكاندا كیشوەرەكان هەیە.
دوای ئەوەی (كاك جەوهەر) گلەیی لێكرد، بەپەلە داوای لێبوردنی لێكردم، كە بە دەستی ئەنقەست نەبووە.
ئەوەی جێگای سەرنج و تێڕامان بوو، ئەو هەڵسوكەوت و رەفتارەی حكومەتی میسر بوو،كە كپكردنێكی تەواوی خستبووە سەر كۆنگرەكە، دیار بوو لەنێوانی حكومەتەكەیان و بیرئازاداندا شورایەكی بەرزی پۆڵایینی هەبوو، بەتایبەت (عەمر موسا) هەر دەتگوت پۆلیسی (سەدام)ـە، تەنیا هەشت نۆ وشەی بە بچووكترین (فۆنت) لە رۆژنامەی (الاهرام)دا وەك كورتە هەواڵێكی شەرمن بڵاوكرابوویەوە، لەبەر دەرگای هۆڵی كۆنگرەش چەند (كۆنتڕۆڵ)ێك دانرابوو، نەبادا یەكێ ئامێرەكانی تۆماری دەنگ و وێنەگرتنیان پێ بێ..!
لەمەیانەی ئەو چەند رۆژەدا سەردان دەكراین و ئێمەش سەردانی لایەنە سیاسییەكانی ئەوانمان دەكرد، لەیەكێ لەو سەردانانەدا سەردانی سیاسەتمەداری میسری (خالید محێدین) سەرۆكی پێكهاتە نیشتمانییەكانی (میسر)مان كرد، ئەو بەڕێزە لەكاتی (جەمال عبدولناسر)دا لە كەسایەتییە هەرە دیارەكانی ئەو دەمە بووە، لەكاتی یەكتر ناسیندا هەڤاڵی شەهید (سامی عەبدولڕەحمان) منی پێ ناساند كە هونەرمەندم، بەگەرمی دەستی كردە ملم و پێی وتم: بەخودا ئێوە خاڵوانی منن، دایكم كورد و لە بنەماڵەی نەقشەبەندییەكانە، ئێمە كەسی یەكدین...)
