رۆژانێكی هەرە ناشیرین و رووڕەش لەمێژووی گەلەكەماندا، ئەو رۆژانەن كورد دەست دەنێتە ملی كورد بەقەستی لەناوبردن، بەوەش مێژووی دوور و درێژمان رەش دەچێتەوە بەو رووڕەشییە. بەش بەحاڵی خۆم بێزم لەخۆم دەبێتەوە گەر بمەوێ بیرم كەوێتەوە.
بەداخەوە راپەڕین كۆمەڵێ لاپەڕەی پێشووی هەڵدایەوە كە ئێمە بە لاپەڕە رۆشنەكانمان دەبینی، ئەو درمەی لە رۆژانی با ناوی بنێین شاخ، ئیدی خوا دەكات نەك لە شاخ -چۆڵی قوڵفەش دەبوو، كە پڕی بوو بە دوژمنایەتی یەكدی و لەسەر چی؟! دیارە هەتا فیشەكە چروكێكیان بە دوژمنەوە ناوە، هەزارەها فیشەكی گڕداریان بە سینە و كەللەی یەكدییەوە ناوە...بڕواو نەیەتەوە، بە راستی وێنە روون و رەوانە ئاوێنە بێگەردئاسایان، لێكردین بە جەرەتاو.. جاڕی شەڕ دراو فتوای(قەتڵ و عام) و رەشبگیری درا و تەپڵ و دەهۆڵی جەنگ و ئاشووب گوێی ئاسمانی كەڕ كرد.
ئەوە بوو پەرلەمانی كوردستان هەر زوو هەستی بە مەترسیی ئەم شەڕی(خۆتڕێنییە)كرد.
رۆژی (22/2/1994) بۆ زەنگلێدانی ئەم نالەبارییە كۆبوویەوە، لە رۆژی (23/2/1994)یشدا (59) ئەندامی پەرلەمان لە فراكسیۆنی زەرد و كەسك و مۆر(پەناگیری-الاعتصام)یان راگەیاند، منیش دووەم ناوی ئەم لیستە بووم.
لەتەلاری پەرلەمان هۆڵێكی گەورە تەرخانكرا بۆ دانیشتنی پەرلەمانتارە پەناگیرەكان و هەمان ناوی هۆڵی پەناگیریان لێنا، رۆژانە كۆبوونەوه دەكرا و بڕیاری پێكهێنانی لێژنەیەكی سەرپەرشتی كرا، بە سەرۆكایەتی بەڕێز(شێخ عەدنان نەقشبەندی)و منیش یەكێك بووم لە ئەندامەكانی ئەو لیژنەیە، بە راستی ئەو ماوەی (101) رۆژە نە خەومان هەبوو، نە ئارامی. نامەوێ زۆری لەسەر بڕۆم، چونكە هەڵدانەوەی قەتماغەی برینە ساڕێژ نەكراوەكانە، ئەوە بوو لەلایەكەوە ماڵ و منداڵ پەرەوازە بوون و دەستی تاڵانچییەكان لە ماڵەكانماندا دزییەكیان دەكرد، ئەوانەی كلی چاوانیان دەدزیک لەچاو ئەوانەدا دز نەبوون. من بەش بەحاڵی خۆم ئەوەی زیاتر پێوەی خەمبار بووم ئەو كتێبخانەیەم بوو كە دەیان دەستنووسی دانسقە و دەگمەنی تیادا بوو، بەهەرحاڵ ئاكام زانیم پتر لە هەزار بابەتیان تاڵان كردبوو، لەگەڵ گەلێك كاسێتی دەنگ كە یەكێك لەو كاسێتانە دیمانەیەك بوو لەگەڵ رابەری شانۆی عێراقی و دۆستی ئازیزی كورد مامۆستا (حەقی شبلی) كە خۆشەویستم بوو، ساڵانە چ لە بەغداد و چ لە سلێمانی بە خزمەتی دەگەیشتم، ریكۆردێكی(پاناسۆنیكی) زۆر چاكی گچكەم هەبوو، دیمانەكانم پێ تۆمار كردبوو، پڕ لە بەسەرهاتی خۆش و سەرجەم سەردانەكان بوو بۆ سلێمانی لەسەرەتای بیستەكانی سەدەی پێشووەوە و هەروەها یادكردنەوەی میری شاعیرانی عەرەب(ئەحمەد شەوقی) و سەربوردەی كوردبوونی و خۆزگەكانی بۆ سەردانی سلێمانی كە وتبووی شاری باو و باپیرانمە.
جگە لەوەی یادگارەكانی لەگەڵ ئەو هونەرمەندە عەرەبانەی كە كاری لەگەڵدا كردبوون و دەیان كوردی وەك (رەشۆڵ) و كەسانی دیكە و بەسەرهاتی رەشەباكانی سلێمانی، لەپاڵ ئەمانەشدا بەسەركردنەوەی مێژووی شانۆی عێراقی، ئەو دیمانەیە بایەخێكی گەورەی هەبوو، بەر لەهەمووان بەدەنگی خودی(شبلی) و پاشان وەگ گەواهێكی زیندوو لەسەر شانۆی عێراقی و باری گەلی كورد. حەز دەكەم لێرەدا ئەوە بێنمەوە یاد لەدواسەردانەكانیدا بوو، حەزی كرد سەردانی لای هەورامان و شارەزوور بكات، ئێمەش بە بەشداری خوالێخۆشبوو كاكە جەلال عەزیز و ئەنوەر قەرەداغی و كاوە ئەحمەد میرزا سەیرانێكمان رێكخست، كاتی سۆراغی شوێنەكانی كرد، پێمان وت: سەراپایان لەلایەن رژێمەوه خاپوور كراون، خەڵكەكەشی یان جینۆساید كراون، یان راگوێزراون، یان...
ئەوسا چاویلكە تۆخەكەی داگرت و دایە پڕمەی گریانێ ئەو پیاوە رابەرە، هەر دەتگوت ساوایەكە و لە بەرۆكی دایكی كراوەتەوە.
بەهەر حاڵ رەنگە ئەو كاسێتە گرانبەهایانە، یان فڕێدراون، یان چ بالۆرەیەكی ناسازیان لەسەر تۆماركراوە. بەهەرحاڵ من چیم هەیە لەماڵی دونیا جگە لە خۆشەویستیی كورد و كتێب و شانۆ؟ بۆیە هێندە پیشم خواردەوە تا دەردی گران كردم و ئازاری بەو دڵە پڕ جۆش و خرۆشەم گەیاند، ناهەقم نەبوو، چونكە من خۆم قەدری ئەو شتانەم دەزانی، لەناو دەستنووسەكەندا(مەسنەوییەكی مەولانا نورەدین جامی) تێدا بوو، كە مەولانا لە (25 ەز) لە (هورات) كۆچی كردووە و بە جوانترین دەستخەت نووسرابوو، پاشان بە مۆم داپۆشرابوو، جارێكیان كڕیارێكی ئێرانی(100000)سەد هەزار دیناری سویسری پێدام، نەمدا، كە ئەو بڕی پارەیە خانوویەكی چاكی پێ دەكڕا. حەز دەكەم ئەوەش بۆ مێژوو بگێڕمەوە پاش چەند رۆژێك خزمانی (هەمەوەند)م لە (مەلا هۆمەر)ەوە نێردراوێكیان ناردە لام پێی راگەیاندم كە بارەكە خراپ دەكەوێتەوە و رێگا بدە، یان منداڵەكانت دەبەینە لای خۆمان، یان چەند كەسێكمان پاسەوانی ماڵ و منداڵت دەكەین، لەو بڕوایەدا نەبووم ئەوەی روویدا، رووبدات، بۆیە لەگەڵ سوپاس ناردمنەوە، دەشمزانی ئەو خزمانەم هی ئەوەن سەریان پێبسپێری و ئازاشن و دەتوانن بەرەنگاری سوپایەكی گەورە ببنەوە، بەڵام من لەگەڵ خوێن و كوشتاردا نەبووم، لەسەر ئەو خزمانەم شتێكم وەبیر دەهاتەوە، باوكی خوالێخۆشبووم بیستبووی لەسەردەمی باپیرە گەورەمدا لەسەر زەوی و زار كێشەیەك لەنێوان ئێمە و هۆزێكی دیدا روودەدات، خوالێخۆشبوو(حەمە زەرد)كە سەرهۆزی (هەمەوند) بوو،(سێتەبەسەر) بوو، جگە لەوەش لەگەڵماندا بەرەبابێك بوو، بەخۆی و دە سواری هەمەوەند دەگاتە جێ، دەڵێن:كاكە حەمە ئەوانە لەشكرێكی بەتوانا و بێشووماریان هەیە، تۆش بە دە سوار هاتوویت، وەرامی دابوونەوە: بەو دە سوارەوە دەتوانم نەك لەوانە بگره زریكە و زاق لە سوڵتانی عوسمانلییەوە هەڵبێنم.
بەهەر حاڵ پاش ماوەی سەدویەك رۆژ كە مەترسی تەواوەتی گەیشتە سەر گیانمان، بە فەرمانی سەرۆك بارزانی و بە چاودێری چەند لایەك گواستیانینەوە بۆ پیرمام.
بۆ خوا دەڵێم ئەو ماوەیە هەر هەموو خوشك و برا بووین و پەتای دەرەوە نەگەیشتە ناو پەرلەمان.