دوای هێرشەكانی تیرۆریستانی داعش بۆ سەر كوردستان خانمە هونەرمەندی رۆژئاوای كوردستان ئالین ژمارەیەك گۆرانی و سروودی نیشتمانی پێشكەش كرد، لەوانەش گۆرانیی (پێشمەرگە) كە یەكێك بوو لە گۆرانییە سەركەوتووەكان لە رووی جەماوەرییەوە بەتایبەتی لەسەر تۆڕە كۆمەڵایەتییەكان.
لەسەر تۆڕی كۆمەڵایەتی یوتیۆب گۆرانی (پێشمەرگە) ژمارەی بینەرانی لە حەوت ملیۆن بینەر تێپەڕ كردووە، ئەمەش ژمارەیەكی پێوانەییە و بەردەوام لە زیادبووندایە، چونكە بەپێی چەند سەرچاوەیەك لە دوای رووداوەكانی كەركوك گۆرانی (پێشمەرگە)ی ئالین یەكێك بووە لەو گۆرانیانەی كە بە زۆرترین شێوە لەلایەن گەنجانی شاری كەركوك و ناوچەكانی ترەوە گوتراوەتەوە.
هەر لەم بارەیەوە و لە لێدوانێكی تایبەتدا ئالین رایگەیاند: خۆشەویستی هونەرمەند بۆ هونەر و وڵاتەكەی گەورەترین هاندەری بەردەوامبوونیەتی لە هونەر و كاركردنی بەردەوام بۆ پێشكەش كردنی كاری جوان بە جەماوەرەكەی و خزمەتگەیاندن بە كوردستان لە رێگای هونەرەوە بەتایبەتی لەو قۆناغە مێژووییەی ئێستا میللەت كورد پێیدا تێپەڕ دەبێت و ئەو پیلانە هەمە لایەنانەی كە دژی گەیشتن بە ئاواتەكان لەلایەن دوژمنانەوە دەدرێن، دیارە هونەر و هونەرمەندانی كورد رۆڵێكی سەرەكییان هەبووە لە دەوڵەمەند كردنی كەلتووری كوردستان و پاراستنی ناسنامە و زمانی میللەتی كورد، چونكە دوژمنان بەر لەوەی خاكمان داگیر بكەن هەوڵیانداوە زمان و كەلتوورەكەی لە ناو ببەن و بیشێوێنن، بۆیە پێویستە لەسەر ئێمەی نەوەی ئێستای هونەرمەندان كە درێژەپێدەری خەباتی هونەرمەندانی پێش هۆمان بین و رێگا نەدەین دوژمنان بە مەرامی خۆیان بگەن.