زیاتر له (35) ڕێكخراو و كۆمه‌ڵه و سه‌ندیكای پیشه‌یی و هونه‌ری ئیدانه‌ی هێرشه‌كانی سه‌ر كوردستان ده‌كه‌ن .
ده‌قی به‌یاننامه‌كه‌یه
به‌ناوی خودای گه‌وره و میهره‌بان
جه‌ماوه‌ری خۆڕاگری كوردستان
ڕێكخراو و سه‌ندیكا هونه‌ری و پیشه‌ییه‌كان
له‌م سات و دۆخه دژوار و ناهه‌مواره‌ی به‌سه‌ر كه‌ركووك به‌تایبه‌تی و كوردستان به گشتیدا هاتووه، له ئه‌نجامی ئه‌و له‌شكركێشیه‌ی سوپای عێراق و میلیشیاكانی حه‌شدی شه‌عبی، به‌ر له هه‌ر شتێك ئیدانه‌ی هه‌موو ئه‌و كرده‌وه ناڕه‌وایانه ده‌كه‌ین كه كراونه‌ته سه‌ر خه‌ڵكی سڤیل و ماڵ و حاڵیان تاڵانكراوه و سووتێنراوه، هه‌روه‌ها ئیدانه‌ی ئه‌و كوشتار و ئه‌شكه‌نجه و شه‌ڕی ده‌رووونییه ده‌كه‌ین، كه به‌رامبه‌ر به خه‌ڵكی سته‌مدیده‌ی كوردستان گیراوه‌ته به‌ر. له هه‌مان كاتدا و بۆ ڕاوه‌ستاندنی شه‌ڕ و كوشتار و كۆتاییهێنان به ماڵوێرانییه‌كان، هه‌ر بۆیه ئێمه كۆمه‌ڵێك ڕێكخراو و سه‌ندیكای هونه‌ری و پیشه‌یی داوای چاره‌سه‌ریی ئاشتییانه بۆ ئه‌و دۆخه ئاڵۆزه‌ی نێوان عێراق و هه‌رێمی كوردستان ده‌كه‌ین و داواكارین هه‌رچی زووه هه‌ردوولا بكه‌ونه گفتوگۆی جیدی و كۆتایی به‌و نه‌هامه‌تیانه بێنن، ئه‌ویش به گه‌ڕانه‌وه بۆ ده‌ستوور و ئه‌و مافانه‌ی له ده‌ستووری عێراقی فیدڕاڵدا ده‌سته‌به‌ر كراون.
جه‌ماوه‌ری خۆراگری كوردستان
ئازادیخواز و مافپه‌روه‌رانی جیهان
لای كه‌س شاراوه نییه كه له ماوه‌ی سێ ساڵی ڕابردوودا گه‌لی كوردستان و هێزی پێشمه‌رگه‌ی كوردستان شه‌ڕی گه‌وره‌ترین رێكخراوی تیرۆریستی كرد كه (داعش) بوو، وه ئه‌و ئه‌فسانه ترسناكه كه مه‌ترسیی بوو بۆ سه‌ر هه‌موو جیهان، له‌سه‌ر ده‌ستی پێشمه‌رگه قاره‌مانه‌كان و به خوێنی هه‌زاران شه‌هید و بریندار و په‌ككه‌وته و به فرمێسك دایكه جگه‌رسووتاوه‌كان و منداڵه بێ باوك بووه‌كان هاته دی، كوردستانیش بووه په‌ناگه‌ی نزیكه‌ی ٢ ملیۆن ئاواره، كه‌چی ئه‌مڕۆ هه‌مان ئه‌و هێزه كه دونیای له شه‌ڕی ئه‌و ڕێكخراوه تیرۆریستیه پاراست، وا ڕووبه‌ڕووی هێرشی حه‌شدی شه‌عبی و سوپای عێراقی ده‌بێته‌وه، له‌جیاتی ئه‌وه‌ی له لایه‌ن عێراق و كۆمه‌ڵگای نێوده‌وڵه‌تی به باشترین شێوه پاداشت بدرێته‌وه.
بۆیه ئێمه ئه‌و شه‌ڕ و دوژمنكارییه زۆر به ناڕه‌وا ده‌زانین و هه‌ر بۆ ئه‌م مه‌به‌سته‌ش، داوامان له هه‌موو رێكخراو و سه‌ندیكانی ناوخۆیی و عه‌ره‌بی و بیانی و كۆمه‌ڵگای نێو ده‌وڵه‌تی هه‌یه، كه هه‌وڵ و توانای خۆیان بخه‌نه گه‌ڕ و هه‌ڵوێستی روون و ده‌ستبه‌جێ بگرنه به‌ر و فشار بخه‌نه سه‌ر هێزه باڵاده‌سته‌كان و حكومه‌ته‌كانیان بۆ ئه‌وه‌ی هه‌رچی زووه بكه‌ونه نێوان به‌غدا و هه‌ولێر و له‌سه‌ر مێزی گفتوگۆ كۆیانبكه‌نه‌وه و بیانگه‌یه‌ننه ئه‌نجام و هاوڵاتیه ده‌رپه‌ڕێنراوه‌كانیش بگه‌ڕێندرێنه‌وه سه‌ر ماڵ و حاڵی خۆیان و قه‌ره‌بووی هه‌موو ئه‌وانه‌ش بكرێته‌وه كه زیانیان به‌ر كه‌وتووه.
kurdistan tv
