ئەحمەد سالار
لە ئاكامی هەڵبژاردندا، پارتی دیموكراتی كوردستان (51%) دەنگەكانی بەرامبەر حیزبەكانی دیكەی كوردستان هێنا، بەڵام هەر چۆن هەمیشە لە پێناوی بەرژەوەندی باڵای نەتەوەكەماندا، كردیە (50%) بە (50%) بەمەش هەنگاوێكی دیكەی پێشڕەوایەتی نواند.
دەستنیشانی پەرلەمانتاران كراو، كاتی دیاریكراویان بۆ سوێند خواردنی یاسایی ئەندامەكان دانا، لەو رۆژانەدا سەرقاڵی فیلمی سینەمایی (شێرۆ) بووم، ئەوە بوو بەر لە رۆژی دیاری كراوی سوێند خواردن، بۆ وێنە گرتن و دەستنیشانكردنی شوێنەكانی وێنەگرتن روومان لە شارۆچكەی (حەریر) كرد. ماڵی خوالێخۆشبوو (مەلا غەفار) كە ئاشنایەكی دێرینی (مامۆستا نەوزاد مەجید) بوو، كرایە نیمچە ئۆفیس و چەند بینراوێكیشمان لە ماڵ و سەربانەكەیان تۆمار كرد، لەو ناوە گوندی (گولەك) مان هەڵبژارد، كە لە داوێنی گەلێك دابوو، تابڵێی جوان و دڵگیر بوو، گوڵاڵە سوورە و گوڵە زەردە و حاجیلە لە باوەشی مێرگەكانیدا قاقا لێدانیان بوو. بۆ بەیانی كە رۆژی سوێند خواردنی پەرلەمان بوو، هەر زوو ئامادەی وێنەگرتن بووین و بینراوێكی گرنگی من هەبوو، كە لە ناو ئاهەنگی خەتەنەسورانەكەدا، فێ دەمگرێ و دەكەوم بە ئەرزا و پاشان سەلكێ پیازی گەورە بە زەوییە چیمەنتۆرێژەكە دەدەن و لەسەر و چاومی هەڵدەسوون، ئەوەی جێگای سەرنج بوو هەر لەگەڵ زرمەی كەوتنەكەمدا خانمێكی ئیتاڵی كە بەڕێوەبەری وێنەگرتن بوو، شپرزە بوو پەلاماری دام، وای زانیبوو بە راست وام بەسەر هاتووە.
بە هەرحاڵ لە كەوتنەكەوە ئازارێكی كەمی مەچەك و چۆكم كەوتبوو، ووتم: ئەمجارەش نەمردم. چونكە بەر لە چەند رۆژێ لە نزیك (تاسڵووجە) بینراوێكمان هەبوو، لە دوو ژوور و هەیوانێكی وازلێهێنراودا وێنە دەگیرا، ئەو ژوورەی بۆ من تەرخان كرابوو پتر لە بیست دەبە بەنزینی پیاداكرابوو، ئاگری تێبەردەدرا، دەرهێنەر ووتی: تۆ لە ژوورەوە بە كە ئاگرەكەی تێبەر دەدەن، ئەو كاتە هاوسەرەكەم كە ئامادەبوو، لێی تووڕەبوو ووتی: كاك هونەر نیازت نییە بە كوشتنی بدەی؟ ئەوە بەنزینە و دەتەقێتەوە، قوڕ بەسەرت ئەگەر موویەكی سمێڵی هەڵكروزێ. ئەوسا ئیتاڵیەكان كەوتنە مشتومڕو، ووتیان: راست دەكات دەیكوژێ. ئەوسا چوومە هەیوانەكەوە، بەڵام وا دەردەكەوێ كە لە ژوورەكەدا، ئاگرنرا بە ژوورەكەوە و گرمەی كرد و ئەو پەنجەرە ئاسنینەی لە ژوورەكەدا بوو، بە چوارچێوەكەیەوە دەرپەڕی، منیش لە هەمان كاتدا بە شپرزەی دەرپەڕیمە دەرەوە. گەر وانەبووایە، ئەوە دەبووە دوا بینراو لە ژیانمدا. بەهەرحاڵ ئەو رۆژە لە (هەریر) دوا بینراوی ئەو شوێنە وێنە گیراو منیش پەلەی سوێند خواردنەكەم بوو، ئەو رووداوێكی هەرە گرنگی نەك ژیانی من، بگرە ژیانی گەلەكەم، دەرهێنەریش، مێش میوانی نەبوو، ئەو تەنها خەمی ئەنجامدانی كارەكەی بوو، هەر چۆن بێ تەنها سەعاتێكی مابوو، بە شوفێرەكەم گووت: ئەگەر باڵت بە ئۆتۆمبێلەكە گرتووە، دەبێ بەر لەوادە بگەینە هەولێر، هێندە پەلەم بوو فریای خۆگۆڕین نەكەوت، بگرە بەو جل و بەرگی كوێخایەتییەوە و قایش و قرو شكانمەوە كەوتنە رێ، هێندە نەبرد گەیشتینە هەورازێك بەر لە شەقڵاوە، ئۆتۆمبێل دەیبڕی و كەوتە نزرگەلێدان و جاروبار پژمین، لەپرا جوڵەی لە خۆی بری و ئیستەرەمی پەككەوتنی كرد، ناچار بەو پۆشاك و سەرو سیمایەوە سەر رێگام گرت و بە هەردوو دەست ئاماژەی وەستانم بۆ ئۆتۆمبێلەكان دەكرد، بە گەڵابەش دەمژەنی، ئەوا چاوێكیشم بە سەعاتەكەم بربووە، خوا كردی تەكسیەكی بەتاڵ پەیدابوو، سەركەوتم و خواحافیزیم لە (نەورۆز كاكەیی) شوفێرم كرد، ئیتر تا گەیشتمە بەر دەرگای دەرەوەی پەرلەمان جگە لە سەعاتەكەم و خێرایی بژێری ئۆتۆمبێلەكە هیچم نەبینی. دابەزیم و خۆم كرد بە ژوورا لە بەردەم پرسگەكەدا، برادەرێكی خەڵكی سلێمانی كە لە هەولێر فەرمانبەر بوو، ناوی (كاك فەهمی) بوو لە سلێمانی بە (فەهمی قژ رەش قژ لوول) ناسرابوو، بەڵام دیاربوو تەمەن گەنجێتیەكەی جاری جارانی لێگۆڕی بوو، بۆیە پێیان دەووت (فەهمی سەرسپی) بەهەر حاڵ چەك و قایش و قروشكەی لێوەرگرتم و خێرا گەیاندمیانە هۆڵی پەرلەمان و فریای سوێند خواردن كەوتم.
بەڕێزان سەرۆك بارزانی و سەرۆك تاڵەبانی ئامادەبوون، ئەوەی پێویست بوو كرا، دوایی چەند رۆژێ فراكسیۆنەكەمان لە پیرمام كە زۆربەیان لە ئوتێل (كارۆخ)ی نزیك (م.س) دابەزیبووین بە سەرۆكایەتی كاك (جوهر نامیق سالم) لە باخچەكەی كۆبووینەوە و باسی لە ئەركە مێژووییەكەمان كرا، ئەوسا باس لە لیژنەكانی پەرلەمانەوە كرا، سەبارەت بە لیژنەی (رۆشنبیری و پەیوەندییەكان) داواكرا ئەندام بۆ سەرۆكییەكەی كاندید كرێ، خوالێخۆشبوو (كاك فلك الدین كاكەی) ناونووسكراو، خوالێخۆشبوو (مامۆستا عەفان نەقشبەندی)ش ناوی منی دا، پاش ئەوەی هەڵبژاردنی بۆ كرا، زۆربەی دەنگیان بە من دابوو، هەروەها بۆ دەستەی سەرۆكایەتی فراكسیۆنی پارتی دیموكراتی كوردستان بەختبووی رێبازی بارزانی (فەرەنسۆ هەریری) بە سەرۆك دانرا بەڕێز (مامۆستا شێخ عەدنان نەقشبەندی) بەیاریدەدەر و منیش بە بڕیاردەر. دەتوانم بڵێم هەر بۆ ماوەی دوو ساڵی هێندەی بیست ساڵ پەرلەمان یاسا و بڕیاری گرنگی ئەنجامدا، بەتایبەت یاساكانی رێكخستنی كاروباری حكومەت و سەرجەم وەزارەتەكانی، رۆژ بە رۆژ كارمان گرانتر دەبوو، هەر چەندە ئەندامانی جگە لە رێز و خۆشەویستی هیچ شتێكی دیكەمان شك نەدەبرد، بەڵام دیاربوو باری حیزبایەتی كنەی لە زۆر شتدا دەكرد، ئەوەی لە شاخ لە هەگبەیاندا بوو، نایانەوە سەر سفرە. بۆیە چەلەحانێی (سیرە و نەخێر پیازە) كاتی زۆر لێدەبردین.
كاتی خۆی من پێكەنینم بە مشتومرە بەردەوامەكانی (كۆڕی زانیاری كورد) دەهات، كە كاتێكی زۆریان بە فیرۆدا بە (ناڵی)نییە (نالی) بەیان ئەوەتا (پیتە)نییە بەڵكو (تیپ)ە بەلای (حەرف) ئەوە، یان بردنەوەی كاری زمانەوانی بۆ عەرەبی و مەلایەتی و گەلێك زرمەزلێ لەسەر جەستەی زمان و ئەدەبی كوردی، تەنانەت رێنووسی بەسەر و بۆری عەرەبییەوە، لای ئێمەش (ژنەو ئافرەت نییە)و، (قوتابی نییە و خوێندكارە)، ( لیژنەیە و كۆمیتە نییە).. جگە لە بەیەكدی فرۆشتنی (ئەمە بكرێ و ئەمە نەكرێ) دیار بوو لە پشت هەر حاڵەتێكەوە چەوتە مەبەستێكی حیزبایەتی هەبوو.
بۆ مێژوو دەڵێم خودا شایەت، هەركاتێ بە دیداری سەرۆك بارزانی دەگەیشتین، جارەها جەختی لەسەر ئەوە دەكردەوە: ((بەر لەوەی نوێنەری پارتی بن، دەبێ بزانن نوێنەری گەلی كوردستانن، ئاگاداربن كە هەرگیز جڵەو بۆ دەمارگیریی حیزبایەتی شل نەكەن...)). پاش ماوەیەك، لە پێناوی توند و تۆڵكردنی پەیوەندی ناوخۆمان و ئاگادار بوون لە رەوتی ئەزموونەكەمان لیژنەیەكی هاوبەش لە حكومەت و مەكتەبی سیاسی و سەرۆكایەتی فراكسیۆنەكەمان پێكهێنرا و شەهید (سامی عەبدولڕەحمان) سەرپەرشتی دەكرد، كرام بە بڕیاردەری ئەو لیژنەی سەرۆكایەتییە، شەهید (سامی عەبدولرەحمان) پیاوێك بوو هەتا سەر ئێسك كوردپەروەر و لێوان لێوی (جدی)یەت لە كاركردندا، ئەوەی سەرنجی منی راكێشابوو، ئەوە بوو لە تەك هەر كۆبوونەوەیەكی نوێدا لە كۆبوونەوەی پێشتردا چیمان باسكردبوو، هەر هەمووی لە نووكەوە بەیان دەكرد، لەگەڵ سەرانسەری بڕیارەكانیدا، كاتێ سەرنجی تۆماری دانیشتنەكانم دەدا، بە موو لێی لانە دابوو، واتە تیژترین زەینی هەبوو، بۆیە سات بە ساتی شۆڕشی (ئەیلوول) و سەرجەم رووداوەكان لەبیربا هەرچۆن نەقشی سەر بەرد بوو. هەر سەبارەت بەو تێكۆشەرە لە سەرەتای راپەریندا بوو، ئێمە ژمارەیەك لە هونەرمەندان (كۆمەڵەی هونەرمەندانی كوردستان) مانە هێنایە ئاراوە، بۆ ئەو مەبەستە سەردانی زۆربەی حیزبەكانمان كرد لە چوارچێوەی ئەو گەشتەدا، ئێوارەیەك سەردانی بارەگای پارتی گەلمان كرد و چووینە دیداری (كاك سامی)، برای ئازیزمان (كاك مەجید رزگاری) لەوێ بوو، زۆر بە جوانی گوێی لە مەبەستەكەمان گرت و پشتیوانی بەڕێزیانی بۆ دەربڕین. تاریكی كرد و نیازی هەستانمان بوو. فەرمووی ئەوە نابێ و خودا چی دابێ دەبێ لەگەڵمان بەشداربن.
هەر بە شێوازە پێشمەرگایەتییەكە لەبری مافور و دۆشەك بەتانی لەمبەرو ئەوبەر داخرابوو، بەدەم گفتوگۆوە لەسەر ئایندەی هونەری كوردی، دەروێنە شیوێكمان خوارد، لەپرا دونیا تاریك بوو لە هەموو لایەكەوە كرا بە تەقە و جەنگی مەغڵوبە، هاواری كرد بۆ پێشمەرگەیەكی، كە بەبێ تەلەكە سۆراغی ئەو هەرایە بكات، تووڕە بوو ووتی:(ئا ئەمە ئەو رۆژەیە كە بێ (بەرزانی نەمرمان پێوە دیارە، ئای بۆ ئەو مەزنە سەركردەیەی كە بە نەمانی، ئەو كەلێنە گەورەیەی لە بوونماندا درووست كرد، كە هەرگیز پێمان پڕناكرێتەوە)، بارزانی مستەفا، ئەو چەترە مەزنەبوو، هەر هەموو خەڵكی كوردستان، بە گشت بیرو بۆچوون و ناوچەیەكەوە لە سامیدا ئارام و دڵنیابوون)).