ئیشواریا رای ئەستێرەی بۆڵیۆد بە یاوەری ئەرادهیای كچی سەردانی شاری ملبۆڕنی ئوستڕاڵیای كرد بۆ بەشداریكردن وەك میوانی شەرەف لە فیستیڤاڵی سینەمای هیندی كە لەو شارە ئەنجام دەدرێ و هاوكاتە لەگەڵ ئاهەنگەكانی حەفتا ساڵەی سەربەخۆیی هیندستان.
ژمارەیەكی زۆر لە هەوادارانی سینەمای هیندی و رەوەندی هیندی لە ئوستڕاڵیا كە ئامادەی ئاهەنگەكە و زۆربەیان هاتبوون بەتایبەتی بۆ بینینی ئیشواریا رای و لە گۆڕەپانێكی تایبەت، ئەوەی زیاتر مایەی سەرنج و دڵخۆشی جەماوەر بوو بەرزكردنەوەی ئاڵای هیندستان بوو لەلایەن ئیشواریاوە، چونكە ئەمە یەكەم جارە ئافرەتێك ئاڵای هیندستان بەرز بكاتەوە لە گۆڕەپانێكی گشتیدا.
لە ئاهەنگەكەدا ئیشواریا سەرەتا جلوبەرگی كەلتووری هیندی سپی و شینی پۆشی بوو، دواتر سەرۆكی حكومەتی ڤیكتۆریای پێشوازی لێكرد، لەوێش جلێكی رەشی پۆشی، بەڵام لە كاتی دەركەوتنی لەسەر فەرشی سوور و وەرگرتنی خەڵاتی (ناوازەی سینەمای جیهانی) جلێكی كەلتووری شینی پۆشی بوو.
ئەمە یەكەم دەركەوتنی ئیشواریایە دوای كۆچی دوایی باوكی و بەر لەوەی سەردانی ئوستڕاڵیا بكات لە رێوڕەسمێكی ئایینی تایبەتی هندۆسەكاندا بە یاوەری ئەبهیشك باتشانی هاوسەری و كچ و خوشكی و دایكی هەستا بە رژاندنی خۆڵەمێشی باوكی لە رووباری گانج كە یەكێكە لە رووبارە پیرۆزەكان لای پەیڕەوانی ئایینی هندۆسی و پێیانوایە دوای سوتاندنی مردوو و رژاندنی خۆڵەمێشەكەی لە ئاوی ئەو رووبارەدا یارمەتی گیانی مردووەكە دەدات بۆ ئاسمان بەرز ببێتەوە.