موزیکا سلاڤا کۆماری یا دەولەتا کوردستانا سەربخۆ ژ لایێ موزیکڤانێ مەزنێ کورد مامۆستا دلشاد محەمەد سەعیدی ڤە هاتەچێکرن و دگەل راگەهاندنا سەرخوەبوونا
کوردستانێ، دێ لسەر هەموو بالەفڕخانێن جیهانێ هێتە بەلاڤکرن.

ل دەسپێکێ مامۆستای نۆتێن ڤێ سلاڤێ (کو ئاوازا سروودا نیشتمانی ئەی رەقیبە) بۆ ئۆرکێسترایێ نڤیسین و پشت را ل گەل تیپا نیشتمانی یا سەمفونی یا چیکی ل پراگ ب رەنگەکێ گەلەك جوان و سەرکەفتی ئەنجامدا، داکو بگونجیت دگەل نمونێن ستانداردێن گروپێن موزیکی ێین سەربازی – ئۆرکێسترایی سەمفونی دا. دەمێ سلاڤێ ژی 51 سانیەیە و ئەڤە چەند مەهەکە هاتیە ئەنجامدان و ل ڤان نێزیکان دێ ب ئاوایێ سی دی و دیزاینەك جوان دگەل دەفتەرکا نۆتان هێتە بەرهەڤکرن.
ئەڤ کارە هەموو ب ئاگەهداری و پشتەڤانیا حکومەتا هەرێما کوردستانێ هاتەکرن و بڕیارە دگەل راگەهاندنا دەولەتا سەربخۆیا کوردستانێ لسەر هەموو بالەفڕخانێن جیهانی و ناڤخۆیی بهێتە بەلاڤکرن. بەری چەند مەهان مامۆستا دلشاد ب خۆ ژی لسەر ڤی کارێ خۆ بۆ کەنالێ رووداو راگەهاند و پارچەکا وێ موزیکێ ل وی کەنالی بەلاڤکربوو. ئەڤە رەنگێ ئێکێیە ژ ڤێ سلاڤێ و تایبەتە بۆ پێشوازیا سەرۆکێ دەولەتا کوردستانێ ل بالەفڕخانان، ڤی رەنگی ئامیرێن بایی پتر تێدا هەنە رەنگێن دویێ و سیێ دێ ب ئاوایەك دی بن و کێمتر ئامیرێن بایی تیدا بن، چونکی پڕۆژێ مامۆستا دلشادی ئەوە کو ل پاشەڕۆژەك نیزیك وان دو رەنگان ژی ب ڤی ئاوایێ ژێری ئەنجامبدەت :
ئێك: دانەیەکا تایبەت بۆ یاریگەهێن ناڤدەولەتی یێن وەرزشێ، چاخێ تیما کوردستانێ پشکداری یاری یێن ناڤدەولەتی دبیت.
دوو : موزیکا ڤێ سروودا نیشتمانی (ئەی رەقیب) دگەل دەنگێ چەند نمۆنێن بژارە ژ هونەرمەندێن هەر چار ئالی یێن کوردستانێ، دێ هێتە تۆمارکرن. پێشنیار ئەوە ژی کو پەیڤێن سروودا ئەی رەقیب ب هەردو زاراڤێن سووررانی و کرمانجی (نیڤ ب نیڤ) بهێنە تۆمارکرن، لەوا ئەز رابووم و من پەیڤێن سروودا ئەی رەقیبب ب ئاوایەکێ گەلەك جوان و ب هەمان سەرواو کێشا هەلبەستا نەمر دلداری دانای کرە کرمانجی ژی. لێ نها تنێ رەنگێ ئێکێ هاتە ئەنجامدان و ئەڤێن دی مانە بۆ پاشەڕۆژێ.
چیڕۆکا بەرهەڤکرنا ڤی کاری : ل دەسپێکا مەها ئیلۆنا سالا چوویی، گاردێ کۆماری یێ سەرۆکاتیا کۆمارا فرەنسا ب رێکا ئەنستیتوتا کوردی ل پاریس، داخواز ژ موزیکڤانێ کورد دلشاد محەمەد سەعیدی کر کو نۆتێن سروودا نیشتمانی یا کوردستانێ بۆ فڕێکەن، داکو تیپا موزیکا گاردا کۆماری یا فرەنسا، وێ موزیکێ ل رێورەسمێن پێشوازیکرنا سەرۆك مسعود بارزانی ب ئاوایەکێ فەرمی ل 7/9/2016 ل قەسرا ئەلیزێ ل پاریس لێبدەت. مخابن کو دەم گەلەك کێم مابوو، و وی دەمی نەیا ئامادەبوو، لەوا نەهاتە لێخستن، پشتی هنگی مامۆستا دلشادی حکومەتا هەرێمێ ئاگەهدارکرو وێ ژی ب سوپاسی ڤە داخواز ژ مامۆستا دلشادی کر کو ئامادەکەت. و بەری چەند هەیڤان ئامادەکرو تنێ چێکرنا دیزاینی مایە بۆ جوانکرنا کاری.