هەر لەو رۆژانەوەی باسی پێكهاتنی وەزارەت هاتەئاراوە، بەڕێز (كاكە نێچیرڤان بارزانی) فەرمووی: ئەگەر خواكردی و وەزارەتی رۆشنبیری بەر ئێمە كەوت، ئەوا ئێمە تەنیا تۆمان دەستنیشان كردووە بۆ پۆستی وەزیری، بەڵام وا دەرنەچوو، ئەو پۆستە بەر برایانی یەكێتی كەوت و ئەوانیش شاعیری گەورەو دۆستی دێرینم (كاكە شێركۆ بێكەس)یان بۆ دانا. من خۆم لە پەرلەمان، جگە لەوەی بڕیاردەری فراكسیۆنی پارتی بووم، سەرۆكی لیژنەی رۆشنبیری و پەیوەندییەكانی پەرلەمان بووم. هەر لەو رۆژانەدا بوو، بەڕێز (كاكە نێچیرڤان بارزانی) ناردی بە دوامدا و لەو دیمانەیەدا فەرمووی: ئێمە بڕیارمان دا تۆ وەزیر بیت، ئێستاش بۆ ئێمە هەیە دەستنیشانی جێگرەكەی بكەین، دەبێ ئەوەش بزانی، تۆمان بۆ وەزیری دەویست، ئێستاش نەچووە، بچێ، هەموو شتێ بە رێككەوتنە، بۆیە تۆش چون وەزیری، حەزدەكەم بڕیار بدە، هەتا ناوت پێشكەش بە لایەنانی پەیوەندیدار بكەین كە تۆ كاندیدی ئێمەی لە پەرلەمان و حكومەت.. هەر لە بارەی ئەم هەواڵەوە، برای هونەرمەندم (كاكە شێخ كەمالی هەنجیرە) و (شەهید كاكە فەرەنسۆ هەریری) و (كاكە سەرباز نادر هەورامی) و كەسانی دیكە ئاگادارن. هەندێ لە دۆستانی دڵسۆزم گوتیان: خێری پێوەیە، مادام هەڵبژارەی ئەو براگەورەیەیت. بڕیارم دا و لە رۆژی دیاریكراودا، لە تەلاری پەرلەمان، لە بەردەم سەرۆكی پەرلامان و سەرۆكایەتی حكومەتدا سوێندی یاساییمان خوارد و پاشان دەست بە كاربووم. كاكە شێركۆ بێكەس زۆر بە خۆشی و پەرۆشەوە پێشوازی گەرمی لێكردم و بەر لە چوونم، شوێنی بۆ ئامادەكردبووم و دەستبەجێ زۆر لە دەسەڵاتەكانی خۆی دابوومێ. یەكەم كەسێ كە سەردانی كردم بە گوڵ و دیارییەوە هەڤاڵی شەهید (كاكە عەلی حەسۆ میرخان) بوو، كە یەكێك بوو لە پێشمەرەگە هەر رۆشنبیرەكان. لێرەدا دەبێ ئەوە بڵێم: سەرەتا ئەو بڕیارەی بۆمان دەرچوو، وەك یەكەم كابینەی حكومەتی كوردستان، بە ناوی جێگری وەزیرەوە بووم، ئیدی نازانم بۆ گۆڕا بە بریكار و لە بەرچی!؟ چونكە دوو كار و ئەرك و پلەی جیاوازن، هەرچەندە وشەی (بریكار) داتاشراوە و مەبەستەكە ناگەیەنێ. ئەوەندەی بزانم (خوالێخۆشبوو شوكور مستەفا) لە دواتری وەرگێڕانی رۆمانی (تەنەكە)ی (یەشار كەمال) بۆ جێگری (قایمقام) بە كاری هێنابوو. ئەو بەرهەمە لە لایەن (فوئاد مەجید میسری)یەوە بۆ شانۆ ئامادەكرابوو، منیش بۆ شانۆ دەرمهێنا و لە تەلەفزیۆنیش تۆمارمان كرد. بە هەرحاڵ ئەو زاراوەیەی (بریكار) بووە باو، تەنانەت ئەوانەی ئارد و ئازووقەشیان دابەش دەكرد، ناوی (بریكار)یان لێنرا.. دیارە هەر دەتگوت كورد واتەنی «هەنگوینی شەمەتلێنگەیان لە كلۆرەداردا دیوەتەوە.»
لەو ماوەیەدا هەستم كرد گشت وەزیرەكان، بە ناكۆكییەكانیانەوە، بوونە یەك و دژی بریكارەكان كۆك بوون و ناوی (رێگر)یان لێنابووین. تەنانەت چاویان بەرایی نەدەهێنا مووچەشمان بۆ دەستنیشان بكەن. ماوەی ئەو ساڵەی (جێگر) بووم، مووچەم بە گیرفان و بەرباخەڵەوە نەبینی و هەر بە ئۆتۆمبێلە (كراون)ـەكەی خۆم هاتۆچۆم دەكردو خۆیشم بەنزینم بۆ دەكڕی، پاش چەند مانگێگ برادەرانی ژمێریاری (كاك بەكر مەعرووف و كاك سدیق) لەگەڵ بەڕێوەبەر (كاك فاروق)، هاتن و پێشنیاری (پێشینە)یەكی مانگانەیان بۆكردم، هەتا ئەو دەمەی مووچەكەمان بۆ دیاری دەكەن، ئەوە بوو پاش دوو ساڵ مووچەی جێگرییەكەم وەرگرت.
هەر لەو رۆژانەدا بوو، بیستم، پەیمانگای هونەرە جوانەكانی سلێمانی دەیانەوێ وەك جاران ڤیستیڤاڵەكەیان بكەن، بەڵام پارەیان نییە، چوومە لای (بەڕێز دكتۆر فوئاد مەعسووم) كە ئەو كات سەرۆك وەزیران بوو، داوام كرد، یارمەتییان بۆ بنێرێ، خواهەڵناگرێ ئەو پیاوە بەڕێزە خۆشەویستیی خۆی نواندو فەرمانی دا، پارەیان بۆ بنێرێ، كە بریتی بوو لە بڕی (25.000) دیناری سویسری.
رۆژێكیان (كاك شێركۆ بێكەس) خۆی كرد بە ژوورەكەمدا و وتی: بە قوربان، ئەوا خۆم هاتووم پێت بڵێم، ئەمڕۆ كاتژمێر: (3)ی پاش نیوەرۆ دەبێ وەزیر و جێگرەكانیان بچینە بارەگای بەڕێز (مام جەلال) و لەگەڵمان كۆدەبێتەوە، تكایە بیرت نەچێت. وتم: كاكە شێركۆ گیان، ئەوەندەی من بزانم، ناو بە ناو هەر لایەك بە جودا كۆدەبنەوە، ئەوە هەر تایبەتی برایانی (یەكێتی)یە، من ناگرێتەوە.
: نەء وەرە، من وا ئاگادار كراومەتەوە.
: باشە بەهەر حاڵ با بزانین.
لە وادەی خۆیدا چوومە سكرتارییەتی (بەڕێز مام جەلال) هەر كە لە ئۆتۆمبێلەكەم دابەزیم، سەیرم كرد، بەڕێزیان لە پێشوازیدایە و من و جێگری وەزیری (ئەوقاف) پێكەوە گەیشتین. مامە بە رووی خۆشەوە دەستی گوشین و فەرمووی چوونەژوورەوەی لێكردین.
كاتێ خۆم كرد بە هۆڵەكەدا، بینیم هەر هەموویان وەزیر و جێگری وەزیرن لە برایانی یەكێتی، ماوەیەكی برد و هەروا ماینەوە، پاشان مامە تەشریفی هێنا و فەرمووی: تەواون، دە كەواتە فەرموون بۆسەر مێزە بازنەییەكە. ئیتر بەرەو (كاك شێركۆ) چووم..
-: كاكە پێم نەوتی ئەوە هەر بۆخۆتانە؟
-: كاكە سالار دەزانی ئیشێكی قۆڕم كردووە، داوای لێبوردن دەكەم. برادەران گوێیان لەومشتومڕەمان بوو.
-: دە مامۆستا تۆش فەرموو.
-: سوپاستان دەكەم بە دوعا.
هاتمە دەرێ و چوومەوە ماڵێ. بەپێی رێككەوتنم لەگەڵ (كاك شێركۆ) لەگەڵ سەرپەرشتیكردنی لایەنی راگەیاندن، بەتایبەتی ئەوانەی پوخت سەر بە وەزارەت بوون، وەك رۆژنامەی (هەرێم) و گۆڤاری (كاروان) و (القافلة) كە بە زمانی عەربی دەرچوو، هەروەها رادیۆی (هەرێم) دەبوو سەرپەرشتی بەڕێوەبەرایەتییەكانی وەزارەت، چ لە هەولێر، چ لە شوێنەكانی دیكە. بۆ سەردانی (دهۆك) رێكەوتم. ئەو دەمە پردی قەندیل نەبوو، دەبوو بە كەڵەك لە زێ بپەڕینەوە، دیاربوو شۆفێرەكەم نەشارەزا بوو، سەد جار رێگامان بزركرد، چونكە هیچ جۆرە رێنماییەكی هاتوچۆ لەو رێگەوبانە نەبوو. جارێكیان هەر دەڕۆیشتین، هیچ شتێ دیار نەبوو، ئۆتۆمبێلەكەم راگرت و بە پاسەوانەكانم وت: هەر ئۆتۆمبێلێ هات، پرسیاری لێبكەن.
پاش ماوەیەك (جێبێك) بەرەو روومان هات، شوفێری ئۆتۆمبێلەكە دابەزی و لێم پرسی: ئەم رێگایە بۆ كوێ دەچێ؟
-: كاكە ئەوە دەبینن؟
-:بەڵێ.
-: ئەوە بازگەی موسڵە. نەڕۆن بۆ خاتری خوا. هەمووی شەش حەوت خولەكتان ماوە بیگەنێ.
گەڕاینەوە سەر راستەڕێگاكە و وتم: ئەمجارە تا دڵنیا نەبین، لەخۆتەوە ملی رێگا مەگرەبەر.
بە هەر حاڵ بوو، گەیشتینە (دهۆك) و سەردانی بەڕێز پارێزگارم كرد، كە ئەوكات (مامۆستا عەبدولعەزیز تەیب) بوو، سەبارەت بە ناوی شانۆی شارەكەش، پێشنیاری ناوی هۆڵی (عومەر عارفی جەزیرە)م كردبوو، ئەویش جێگیر بوو، پاش سەردانی دامودەزگاكانی وەزارەتی رۆشنبیری، كە سوپاس بۆ شارەكە، دەستی تاڵانچییانی ریسوای نەگەیشتبوویە، بۆ رۆژی دوایی، كە رۆژێكی بەفر و زریان و تووش بوو، بە نیازی گەڕانەوە كەوتینە رێ، كاتێكمان زانی روومان بە رووی (ئامێدی)دا تەقییەوە و ئەمجارەش گەڕاینەوە (دهۆك) و سەرلەنوێ كەوتینەوە رێ. كاتێ گەیشتینە سەر زێ و ریزمان بۆ كەلەك گرت، ئەو رۆژە ئاوەكە توغیانی بوو، شەپۆلەكانی هەڵبەز و دابەزیان بوو، ئاسمانیش بە هەورێكی رەش و چڵكن تەنرابوو. ئیدی ئۆتۆمبێلەكەم خرایە سەر كەڵەك و لەوەدا بوو ببزوێ، كاتێكمان زانی ئۆتۆمبێلێكی گەورەی (ئەمبلانس)یان سەرخست، ئیدی كەڵەكەكە شلۆق بوو، سێ چوار چەكداریشی بەدواوە بوو، وتم: كاكە باری كەڵەكەكە گرانە و ئەوە ناتوانێ، ئارامتان بێ. دەم رووتێكیان هەروەك چەتە چڵكنەكانی جاران، لۆزی كردەوە حەوا و وتی: ئەمە هی (مام جەلال)ـە. دانم بە خۆمداگرت و پێموت: باشە تۆ بە چ هەقێ ئەمانەتی جەنابیان ئەخەیتە مەترسییەوە؟ چەندوچوون تاوی سەند و پاسەوانەكانم كە كوری گەڕەكەكەمان بوون، میلی تفەنگەكانیان لێڕاكێشان. ناچار كەوتمە نێوانیانەوە. تومەس زەبری ئەو ئۆتۆمبێلە زەبەلاحە خراپ كاری خۆی كردووە، بۆیە هەر چەند مەترێ رۆیشت، كەوتە هەلەكەسەماو، كەڵەك بووە گەمەی دەست شەپۆڵە شێتگیرییەكان، تومەس، زنجیرەكانی پێشووی كە پەیوەستە بە كەناری ئەو سەرەوە پساوە، ئیدی شەپۆلەكان كەڵەكەكەیان بە تەوژمەوە بەرەو خوارەوە دەبرد و جار و باریش بۆ سەرەوە رایاندەژاند، پاسەوانەكانیشم هەر بەدەور و خولمان دەهاتن و دەچوون: مامۆستا گیان بە قوربانت بین، چی بكەین؟
-: كوڕەكانم نە بوار هەیە نە مەلەوانییش دەكرێ، بڕواتان بە خوداتان هەبێ و بڵێن ((قل لن یصیبنا الاما كتب للە لنا)) ئەوەی خودا نەیكات نابێ.
ئەم هێنان و بردنەی ناو گەرووی مەرگە، نزیكەی یەك سەعاتی خایاند، هەتا ئەو كاتەی بە بەلەم زنجیرەیان گرتەوە و گەیشتینەوە كەناری (مان) و ئەمجارەش خودا داینیەوە.