دوای ئەو سەركەوتنەی لە كارە هونەرییەكانیاند بەدەستیان هێنان، بەم دواییە لە تۆڕە كۆمەڵایەتییەكانی وڵاتی هیندستان ژمارەیەك وێنەی هەردوو ئەستێرەی بۆڵیۆد شروتی حەسەن و شاهید كاپۆر بڵاوكرایەوە وەك دوو نوێنەری براندێكی بازرگانی ناسراوی هیندستان .
ریكلامەكە سەركەوتنێكی بەرچاوی بەدەستهێنا، بەڵام دوای بڵاوبوونەوەی ئەم وێنانە لە زۆر لاوە رەخنەیەكی زۆر ئاراستەی شاروتی كرا، لەلای خۆیەوە شروتی وەڵامی ئەو كەسانەی دایەوە كە رەخنەیان ئاراستەی كردبوو و وتی: هەر براند یان كۆمپانیایەكی جیهانی بەر لەوەی دەست بە ریكلام بكات و كەسێكی شایستە هەڵبژێرێت بۆ كاڵاكانی، بە دوای كەسێكدا دەگەڕێت كە لە رووی بازرگانییەوە سەركەوتنی كاڵاكەی مسۆگەر بكات بۆیە كەسێك دەستنیشان دەكات كە لەلایەنی جەماوەرییەوە سەركەوتوو بێت.
شروتی زیاتر وتی: من سوپاسی ئەو براندە دەكەم كە متمانەیان بە من هەبوو و شانازیشیان پێوە دەكەم، من نامەوێ باسی خۆم بكەم، بەڵام دەستنیشان كردنی هەر كەسێك بۆ ئەم كارە نیشانەی خۆشەویستی جەماوەر و سەركەوتنیەتی لە بوارەكەی خۆیدا جا ئەو كەسە ئەكتەر بێت گۆرانیبێژ یان یاریزان، چونكە مەبەستی ئەوان سەركەوتنی فرۆشتنی كاڵاكەی خۆیان و پەیدا كردنی ناوبانگی زیاترە و لەم رووەوە دەیانەوێ سوود لە ناوبانگی كەسایەتییە ناسراوەكانی نێو كۆمەڵگا هەیە.