ئازەر قوبادی، لە بانەی رۆژهەڵاتی کوردستان لەدایکبووە، خوێندنی سەرەتایی و ئامادەیی لە بانە تەواو کردووە، دواتر لەگەڵ خانەوادەکەی چووەتە تاران، خوێندنی ماستەری لەتاران تەواو کردووە، لە ساڵی 2001 لەگەڵ ماڵباتەکەی چوونەتە ئەمریکا هەر لەوێ ژیانی هاوسەریی پێکهێناوە، ئەلبوومێکی گۆرانی لە ساڵی 2011 بڵاوکردووەتەوە، لە دەرفەتێکدا چەند پرسیارێکمان ئاراستەی کردو بەم شێوەیە وەڵامی داینەوە.

* ئێوە لە خانەوادەیەكی ناسراون لە بواری سینەما لە ئاستی جیهان و خۆت چۆن لەو جیهانەدا بینیەەوە؟
- هەر لە منداڵییەوە من عاشقی سینەما و تەلەفزیۆن و وێنەگرتن بووم، بەڵام هەر لەو كاتیشەوە من گۆرانیم وتووە لە تەمەنێكی زوودا، تەنانەت كاتێك یەكەم گۆرانیم تۆمار كرد، هاوڕێیەكم لە ئوسترالیا پەیامێكی بۆ ناردم و وتی: لە كۆتاییدا ئەو كارەی حەزت لێی دەكرد ئەنجامت دا، منیش پێم سەیر بوو و لە بیرم نەمابوو، كاتێك پێم وت: تۆ چۆن دەزانی، وتی: لە بیرمە لە 12 ساڵیدا جارێك وتت لە دڵەوە حەز دەكەم ببمە گۆرانیبێژ، بەڵام پێش گۆرانی حەزم لە سینەما بوو، سەبارەت بەوەی بۆچی نەچووم بۆ بواری سینەما، ئەو كاتەی كاك بەهمەنی برا گەورەم رووی لە سینەما كرد، من ئەو كات قوتابی بووم لە بوارێكی جیاواز لە سینەما، هەروەها لە ئێران ئەو كات بۆ ئافرەت ئەستەم بوو ئەو كارەی هەڵیبژێرێت، ئەنجامی بدات، بەتایبەتی كاری هونەری و سینەما، بۆیە نەچوومە بواری سینەما، هەرچەندە لەبەر ئەوەی حەزم لەو بوارە بووە و شارەزاییم لە فكری سینەما هەبوو، كتێبم دەربارەی سینەما دەخوێندەوە، دڵنیام كە تێیدا سەركەوتوو دەبووم.
* تا چەند سوودت لە ئەزموونەكانی بەهمەن قوبادی لە سینەما و گۆرانی و مۆسیقادا وەرگرتووە؟
- بەهمەن خۆی كەسێكە عاشقی مۆسیقایە و زۆر جار دەڵێ لە دوای سینەما مۆسیقا عەشقی دووەممە، تەنانەت لە دوو فیلمی خۆیدا گۆرانی وتووە و گوێ لە مۆسیقا دەگرێت و هەر كاتێك من گۆرانییەك ئامادە بكەم، پێش ئەوەی بڵاوی بكەمەوە و كاری لەسەر بكەم، بۆی دەنێرم بۆ ئەوەی بزانم رای چۆنە لەسەری، چونكە دەزانم شارەزایە و بۆچوونی ئەویش زۆر گرنگە بۆ من و یەكەم كەسە كە من رای ئەو وەرگرم.
* موزیكی سوننەتی زۆر پێشكەوتووە لە ئێران، ئایا لە كارەكانتدا هیچ سوودت لێی بینیوە؟
- من هەر لە منداڵییەوە كە دەستم بە گۆرانیوتن كرد، گۆرانی سوننەتیم دەوتەوە، وەك گۆرانییەكانی شەجەریان و مەرزیە و دڵكەش، هەرچەندە منداڵیش بووم، پێموایە گۆرانی سوننەتی ئێرانی تێكەڵ بە خەمێكی كۆمەڵایەتی و سیاسی و مێژووییە، بەڵام من بە تێپەڕبوونی كات لەو جۆرە مۆسیقایە هاتمە دەرەوە و زیاتر حەزم لە مۆسیقای شار و شادی و دانس كرد، بەشێوەیەكی گشتی زۆر حەز بە مۆسیقای هێمن ناكەم.
* هیچ لێك نزیكبوونەیەوەیەكی بەرچاو لە نێوان مۆسیقای كوردی و فارسی بەدی دەكەی؟
- بێگومان پێوەندییەكی زۆر هەیە لە نێوان مۆسیقای كوردی و مۆسیقای سوننەتی ئێرانی، هەروەك چۆن لە رووی سیاسی و كۆمەڵایەتی و مێژووییش ئەو پێوەندییە هەیە، ئەمەش وایكردووە كە پێوەندییەكی بەهێز لە نێوان هونەر و هونەرمەندانی هەردوولاشدا هەبێت، هەروەك چۆن پێوەندی لە نێوان هونەری عەرەبی و كوردی لە عێراق و سووریا، هەروەها توركی و كوردی لە توركیا هەیە.
* زۆر لە هونەرمەندانی كوردی رۆژهەڵات شارەزاییان لە مۆسیقای فارسی هەیە و گۆرانییان بە فارسی گوتووە، تۆ تا چەند شارەزاییت هەیە و ئایا گۆرانیت بە زمانی فارسی هەیە؟
- یەكەم زمان كە فێری بوو فارسی بوو، بۆیە شارەزاییشم لە زمانی فارسی هەیە، چونكە یەكەم جار كە لە قوتابخانە گۆرانیم وت، بە فارسی بوو.. وەك گۆتم ئاشنایەتیم بە مۆسیقای كلاسیكی فارسی هەیە، لەبەر ئەوەی لەگەڵی گەورە بووین، حەزم لە گۆرانی فارسی بووە و چەند گۆرانییەكیشم بە فارسی هەیە.
* بە حوكمی ئەوەی لە ئەمریكا دەژی، تاچەند كاری هونەری لەو وڵاتە ئاستەنگی بۆتان دروست كردووە؟
- نەك هاتنی من بۆ ئەمریكا و غوربەت بەڵكو بۆ هەموو كەسێك كە زێدی باب و باپیرانی جێدەهێڵێت و كۆچ دەكات هەموو شتێك بۆی سەخت دەبێت، ئەمەش تەنیا لە بواری هونەر و ژیاندا وانییە، دایكم هەمیشە دەڵێ بەرد لە شوێنی خۆی بە سەنگە و كاتێك دەگوازرێتەوە بۆ هەر شوێنێكی دیكە ئەو سەنگ و بەهایەی نامینێت، بۆ منیش كاری هونەری بە حوكمی دووری و درەنگ دەست پێكردن و بوونی دوو منداڵ و نەبوونی سەرچاوەی هونەریی گرنگ لە شیعر و مۆسیقا زۆر زۆر سەختە، هەر بۆیەش غوربەت بە هەموو ناخۆشییەكانی بەربەستێكی گەورە بوون لە بەردەمم بۆ پێشخستنی هونەری خۆم.
* تا ئێستا چەند جار سەردانی باشووری كوردستان كردووە و پێوەندیت لەگەڵ هونەرمەندانی باشووری چۆنە؟
- زۆر جار سەردانی كورستانم كردووە و ماوەی سێ ساڵ لە هەولێر نیشتەجێ بووم و ئەو شارەم زۆر خۆشدەوێ، سەبارەت بە ئاشنایەتی بە هونەرمەندان من هەر لە منداڵییەوە بە دەنگی هونەرمەندە گەورەكانی باشووری كوردستان ئاشنا بووم، وەك تەحسین تەها و كەریم كابان و قادر كابان و حەزم لە دەنگیان كردووە، بەڵام لە نزیكەوە نەمبینیون بە هەمان شێوە هونەرمەندە كلاسیكەكانیش، بەشێوەیەكی گشتی من زیاتر لە مۆسیقای رۆژئاواییەوە نزیكم لەوەی لە مۆسیقای رۆژهەڵاتی.
* دوایین كار و بەرهەمی هونەریت چییە؟
- پێش چەند ساڵێك ئەلبوومی یەكەمم بڵاوكردەوە، بەداخەوە نەمانتوانی وەك پێویست بیفرۆشین، ئێستاش هەر خەریكم پارە خەرج دەكەم لەسەر كارەكانم و كاری داهاتووم گۆرانییەكی شاییە بە ناوی (بۆنی عەتر) لەگەڵ بەرهەمێكی دیكە كە لە بەرنامەدایە بیڵێم، تێكەڵێكە لە نێوان مۆسیقای كوردی و ئەفریقایی و هێمن هەژار خەریكی دانانی تێكستەكەیەتی، هەروەها خەریكی ئەنجامدانی كارێكم لەگەڵ هونەرمەندی گەورەی فارس ئاندی كە من زۆر حەز لە كارەكانی دەكەم.