ئێوارەی (1/7/1989)بوو، دوو رۆژ بوو، پەروەردگاری مەزن (هونەرمەند)ی كوڕمی پێ رەوا فەرمووبووین، ئەو رۆژە لە ماڵ نەچووبوومە دەرێ، تاریكی كرد و ئەلەكتریك كوژابوویەوەـ كش و بێدەنگ و كەس بە كوچە و كۆڵانەوە نەبوو، بۆ دووجار بەخێرایی لە دەرگا درا، هەر چەندە ئێمە وەك بنەماڵە هەر لە باووباپیرانەوە ئامۆژگاری كرابووین و بۆمان مابوویەوە، هەر كە تاریكی كرد پیاو دەرگا نەكاتەوە، واچاكتر منداڵێ یان ئافرەتێ دەرگا بكاتەوە، بەڵام هەر چەند لێدانی دەرگاكە كەمێك شپرزانە بوو، هەمیشەش بەر لە روودانی رووداوێك هەستم هۆشیارم ئەكاتەوە، بۆیە بەر لە دەرگاكردنەوە سەیری ئەملاولای دەرگا سێ تاكییەكەی خۆمانم كرد، ئەو چەپەچاغەی بۆ كاتی پێویست دامنابوو، دیارنەبوو، گوێم پێنەداو دەرگام خستە سەرپشت، روانیم دوو گەنجی تەمەن نزیكی هەژدەو نۆزدە ساڵانی شەرواڵ و كراس لەبەری چڵكنەی كەمێك ریش هاتووی رەنگ هەڵپڕووسكا و راست و چەپیان لێگرتم و هەر یەكەیان دەستی راستی ئاخنیبوویە گیرفانی شەرواڵەكەیان، دیاربوو لە شتێكیان توند كردبوو، بە گومان و تێڕوانینەوە سەیرم كردن: فەرموون؟
: ئەرێ كامە ماڵی شێخ عەلییە؟
: ئەمەی دەست راستم شێخ عەلییەو ئەوەی سەری كۆڵانەكەش هەر شێخ عەلییەو هەردووكیان سیسرینین، كامەیانتان ئەوێ؟
ئەوەی دەستم چەپم هەنگاوێ چووە دواوە و بەوەی كەی وت: خێرا پێوەی بنێ.
بە رەنگی زەردو دەستی لەرزۆكیەوە، دەمانچەیەكی دەرهێناو نزیكی كەللەی سەری كردمەوە و نەچركا. نەخێر ئەمجارەش بە پەلە رایكێشاو فیشەكی سواركرد، هەر نەتەقی.
ئەوەی دەستە چەپم پڕیدایە گیرفانی و ئەویش دەمانچەكەی دەرهێنا. ئاراستەی كردم هەر نەتەقی، بۆ چەند جارێ هەوڵیداو هەر نەتەقی.
ئەوەی لەو كاتەوە بەدەستمەوە هات، تەنیا دەنگم، ئەو دەنگە شانۆییەی ساڵەها بوو دڕی بە هۆڵی بینەران ئەدا، خستمە كار و نەڕانم: ئادەی فریاكەون ئەم دوو خوێڕییە خوانەناسەم بۆ بتۆپێنن. هەر ئەوەندەی دەنگدانەوە ببیستیتەوە دەیان دەرگا لەمبەر و لەوبەر، لەمسەرو ئەوسەر خرانە سەر گازەرەی پشت و بە لێشاو رژانە چەقی كۆڵانەكە و ئاماژەی شوێنی تێقوچانە حەیاچوونەكەیانم بۆ كردن، ژن و پیاو و منداڵ كەوتنە دوویان، وابزانم ئەو دوو مرۆڤكوژە كونە مشكیان لێببوو بە (تاقی كسرا) و لە پشت مزگەوتی (عەلی كەمال)ـەوە لەچاو ونبوون.
: كێ بوون، نەتناسین؟ چییان ئەویست؟ لەسەر چی؟
سەرم ئەهێناو سەرم ئەبرد، خوایە خراپەم بۆ كەس نەبووە، نە ماڵ، نە شەرفی خەڵكی! ئەوانە بۆ هاتبوونە سەرم بەقەستی كوشتن؟!
تومەس دراوسێكانم تەلەفۆنیان بۆ پۆلیس كردبوو، مفەوزێك و چەند پۆلیسێ پەیدابوون، حاڵ و حیسابەكەم بۆ بەیانكردن و خوا خوام بوو كپكرێ و نەبێتە باسی شار و بنێشتەخۆشەی ناو دەمی ئەم و ئەو و هەزارشتی بەنە پاڵ و گەلێك حەقایەتی لەسەر بهۆننەوە.
ئەو دراوسێیانەم زۆربەیان خەڵكی دەرەوە ببوون و بەر راگوێزی كەوتبوون و ماڵ و گوندەكانیان كاول و خاپوور كرابوو، بۆیە وەك كوردە رەسەنەكان دڵسۆزییان نواند، دوایی وتیان:
ئامادەین لە خزمەتدا بین، ئێمە دراوسێین و ئەركی سەرشانمانە پاسەوانیت لێبكەین..
سوپاسی یەكە بە یەكەیانم كرد و ماڵئاواییم لێكردن و نزای خێرو پاداشت دانەوەی خوام بۆ كردن.
هاوسەرەكەم حەزی نەكرد ئەو شەوە لە ماڵی خۆمان ببەینە سەر، منیش دەڵێم نەشكاندو چووینە ماڵی خوشكم و ماڵی (لواء بەهادین عەلی رەشە)، كە لەو دیومانەوە بوو.
ئەو شەوە هەتا رۆژ بوویەوە من لە غایلە و مەراقی ئەو رووداوەدا بووم، سەرم لێی دەر نەئەكرد، ئیتر لێی گەڕام و دامنە دەست خوا.
چەند رۆژێ رابوردو هەواڵی برینداركردنی مامۆستا (كەریم زەند)م بیست، پیاوێكی كوردپەروەرو دڵسۆزە و شارەزای مێژووی كوردو جوگرافیای كوردستانە، چوومە سەردانی، پرسیارم لێكرد:
مامۆستا گیان ئەمە چۆن بوو؟
: بەیانی بوو، لە دەرگایان دا، دووانی شەرواڵ كراس لەبەر راست و چەپیان لێگرتم و دەستیان لە گیرفانی شەرواڵەكانیاندا بوو.
: ئەرێ مامۆستا مەزگەوتی حاجی حان لە كوێدایە؟
: هەر تۆزی سەركەون ئەوەتا لە دەستە راستانە؟
هەر ئەمەندەم وتوو، یەكێكیان بەوی دیكەیانی وت، ئادەی پێوەی نێ، ئیدی تێیانتەقاندو دیارنەمان، لەو فیشەكانەی تەقاندیان یەكێكیان بەر دەموچاوم كەوت، بەڵام خوا رەحمی كرد كوشندە نەبوو، تیخی كرد و زامدارییەكم جێگای ترس نەبوو. گوایە لەبەر ئەوەی (ئینجیل)ی كردووە بە كوردی.
لە دڵی خۆمدا وتم: بەخوا هەبێ و نەبێ ئەو دوو كافرە هەر ئەو دوو مشتەرییە خوا نەناسەی من بوون.
هەمیشە لەلای خۆمەوە ئەچووم سەرو سیمایان لەوانە ئەچوو كە لە خوا تەولا بوون و بەناوی ئایینەوە مرۆڤكوژی ئەكەن.
رۆژانی رابوردوو ساڵی (91) راپەڕینە مێژووییەكە بوو، پاش چەند ساڵێ، پاش ئەوەی شەڕ لە نێوانی (یەكێتی نیشتمانی كوردستان) و (بزووتنەوە) روویدا، یەكێتی شكاندنی و دەستی بەسەر بارەگاكانی سەركردایەتییان لە بێتواتە و سەر ئەشكەوتان گرت، گشت بەڵگەكانی ئەو لایەنەی كەوتە دەست و هەندێكیانی لە رۆژنامەی (كوردستانی نوێ) و سەرجەم كەناڵەكانی بینراو و بیستراویدا بڵاوكردەوە، لە یەكێ لەو بڵاوكراوانەدا هاتبوو. كە ئەمیری سلێمانییان واژووی لەسەر كردبوو، كە ئەو ژمارە رۆشنبیرەی شاری سلێمانییان كوشتووەو بریندار كردووە، لەناو ئەوانەدا ناوی من هاتبوو، گوایە ئەهلی كوفرم، بۆیە هاتبوون بمكوژن، بەڵام خوا نەیوستبوو بكوژرێم، چونكە لە دوو دەمانچە هیچیان نەتەقیبوون.
پاشان هەر لەو رۆژانەدا بوو، لە دوتۆی وتارێكی (بەڕێز جەنابی مام جەلال)دا كە لەناو مزگەوتی گەورەی سلێمانی دابووی، هاتبوو: باشە ئەبێ كوشتنی هونەرمەندێكی وەك مامۆستا ئەحمەد سالار لە پای چیدا بێ؟! لەبەر ئەوەی هونەرمەندە؟
بەهەر حاڵ مادامەكی خوا نەیكوشتم، ئەوانەشم هەر هەواڵەی لای خوای گەورە كرد، ئەگەر مابن ئەوا بیانخاتە سەر رێگای چاكەو هیدایەتیان بدات.. ئامین
زۆر جار مەرگ رووبەڕووم بۆتەوە، بەڵام خوا پاراستوومی، دیارە هەرگیز دڵی خوام لە خۆم نەڕەنجاندووە، خوا چاوی میهرو نەوای لە خۆم و ئەو كوڕە مەلۆتكە تەمەن دوو رۆژەمەوە بوو.. سوپاس بۆ خوا، هەرگیز نەشمداوەتە رووی ئەو لایەنە و ناشیكەم.