وابزانم نەك تەنیا دواڕۆژی خۆكاندیدكردن بۆ ئەندامێتی پەرلەمانی كوردستان بوو، بگرە تەنیا یەك دوو كاتژمێر بە دەستەوە مابوو. نامەیەكم نووسی و پێشكەشی هەڤاڵ (قادر قادر)ی بەرپرسی لقی (4)ی پارتی دیموكراتی كوردستان كرد، بە روویەكی خۆشەوە پێشوازییان لێكردم، هەر كە گەڕامەوە ماڵەوە، كە ماڵەكەمان لە گەڕەكی (تووی مەلیك) بوو، زەنگێكیان بۆ لێدام، تەلەفۆنەكەم هەڵگرت، پێیانگوتم: تكایە هەر ئێستا پاش ئەوەی نامەكەتمان بە مەكتەبی سیاسی گەیاند، داوای وێنەیەكی بڕوانامەی زانكۆ و رەگەزنامەی عێراقیتان لێدەكەن، دەست و بردی لێبكە، منیش هەردوو بەڵگەكەم لەبەر دەستا بوو، بردم و پێشكەشم كرد. پاش چەند رۆژێ كە بۆ كارێكی تەلەفزیۆن چوومە (پیرمام) و سەردانی سەركردایەتیم كرد، هەڤاڵان پیرۆزباییان لێكردم و ئاگادار بووم لەناو لیستەكەدا چوارەمین ناو بووم. وادەی ریكلامی هەڵبژاردن هاتە پێشەوە، ئێمەش وەك تەلەفزیۆنی خۆمان دەستمان بە پەخشی ریكلامكردن كرد لە هەڤاڵ (د. رۆژ شاوەیس)ـەوە تا سەرجەمی كاندیدكراوەكان. ئەو شەوەی وادەی ریكلامی خۆم بوو، تەنیا بە چەند وشەیەك خۆم تیادا ناساند، هەرچەندە هەموو كورد منی دەناسی، هەر لەتەك كۆتایی وشەكاندا، زەنگی تەلەفۆن لێی داو، كاكە (نوری وەشتی) بوو، پیرۆزبایی لێكردم. هەر چەند رۆژێكمان خۆش و ئاسایی بوو، بەرە بەرە بارەكە رووی لە گرژی و ئاڵۆزی كرد، درزیان خستە نێوانەكانەوە، ئەوەی لە چیا رووی دەدا، بە هەمووان نەدەگەیشت، بەڵام ئەو ناكۆكی و دوژمنایەتییە تەشەنەی كردە نێوان خەڵكەكەوە، خەڵكەكەش جگە لەوانەی بەسەربەرزی مابوونەوە و سەریان بۆ زەبرو زەنگی رژێم نەوی نەكردبوو، شەرەف و كەرامەتە كوردایەتییەكانیان پاراستبوو. دەنا زۆربەیەك رۆچووبوون، پێشمەرگەش واتە پێشمەرگەی راستەقینە ئەوانەی لەسەر خاكی كوردستان لەبەرەنگاربوونەوەدا بوون، هێندە نەبوون، ئەویش وەك زانرا هێندەی سەرقاڵی بەرەنگاربوونەوەی رژێم بوون، دە ئەوەندە بە رووی یەكدا دەتەقینەوە، دەنا ئەگەر یەك دڵ و یەك خەبات بوونایە، ئەوا دەمێك بوو چۆكیان بە رژێم و بابی رژێم دادابوو. بە داخەوە، ئەو پەتاو درمی ناكۆكییە هەمووانی گرتەوە، ئەوەش كوێرەوەری حیزبایەتی، بۆیە لەدڵەوە بڕوام بە راو بۆچوونەكەی رابەر و رزگاركەری گەلی ئەمریكی (جۆرج واشنتن) كرد، كە بڕوای وابوو حیزبایەتی نەتەوە كەرت كەرت دەكات و دوژمنی سەرسەختی بوونی نەتەوەیە، بۆیە لەسەرەتاوە رێگای بە درووستبوونی حیزب نەدەدا. گرنگترین بایەخ و هێزی شۆڕشی (ئەیلوول)ی مەزن لە بوونی یەك سەركردایەتی و یەك دڵیدابوو، دەڵێن: (كوێخا زۆر بوو، گوند وێران بوو)، بەش بە حاڵی خۆم بۆ دیموكراتییەت تێدەكۆشم و پەروەردەی پارتێكی دیموكراتی پەروەرم، ئەو پارتەی بۆ ئەو ئایندە جوانە خەبات دەكات كە لە سای كۆمەڵگەیەكی دیموكراتیدا خەونەكانی نەتەوە بێنێتەدی. كاتی خۆی ناحەقی نەبوو (ئەیسن)ی نەرویجی، داهێنەری شانۆی (ریالیزم)ی، لە كۆتایی سەدەی نۆزدەهەم و لە شانۆی (دوژمنی گەل) لەسەر زاری (دكتۆر ستۆكمان) پاڵەوانی شانۆییەكە دەڵێ: «من لەگەڵ ئەو دیموكراتییەتە نیم كە زۆربەیەكی نەزان لەخۆ بگرێ، بەپێچەوانەوە لەگەڵ كەمایەتییەكی ژیر و هۆشمەندم.»
دیارە دیموكراتییەت وادەی خۆی هەیە، بۆیە لەو شانۆیەدا زۆر بە دژی راو بۆچوونی (دكتۆر ستوكمان) دەوەستنەوە، كە ژەهراوی بوونی گەرماوەكان دەسەلمێنێ، واتە هەر شتەو بە وادەی خۆی، هەر شتەو رێخۆشكەری خۆیشی گەرەكە، شۆڕش، بەر لە چەك و سەرجەم ستراتیژیەتەكان، پێویستی بە هۆشیاری شۆڕشگێڕی هەیە، ئەو هۆشیارییەش پێویستی بە رەوشتی شۆڕشگێڕی و دەستنیشانكردنی هۆیەكانی گەیشتن بە ئاوات لەسەر بنەمای فەلسەفەی شۆڕشگێڕی هەیە، بۆ ئەم لایەنەش دەبێ رەچاوی گشت رووداوێ بكرێ، چونكە شۆڕش جەنگی هێرش و پاشەكشەی نییە، دەبێ پێویستت بە كۆمەكی وڵاتانی نەیارت نەبێ، دەنا دەستەمۆ دەبیت و مەبەستەكەت لە دەست دەدەیت. كەواتە نابێ پشت بەو قووڵاییە ستراتیژیەتە ببەسترێ كە هی خۆت نییە. ئەوا ئێمە لە گەرمەی هەڵمەتی هەڵبژاردندا بووین، رۆژانە هەڕەشەی كوشتن لە بێژەر و كارمەندانی كەناڵەكەمان دەكرا. لێرەدا حەزدەكەم ئەو سەربوردەیە بهێنمەوە یاد. كاتێ لەو رۆژانەدا سەرقاڵی فلیمی سینەمایی (شیرۆ) بووین، كە لە دەرهێنانی هونەرمەند (هونەر سەلیم) بوو، گروپی كارەكەی ئیتاڵی بوون، ئەوان لە ئوتێلی (ئەبو سەنا) بوون، منیش لە گەڵیانا باسمان لە كارنامەی رۆژی دوایی دەكرد، كاتژمێر (10)ی شەو بوو، لە پرسگەی ئوتێلەكەوە بۆ تەلەفۆنكردن بانگیان كردم، بەقوربانە نەییتەوە ماڵێ، ژنانی گەڕەك پێیان زایبوو، كە لە كەلاوەكەی سەروو كۆڵانەكەمان كەمینێكیان بۆ ناویتەوە، ئێمەش تەلەفۆنمان بۆ هێزی هاوبەش كرد، هاتن و بردیان و چەكی (B.K.C)یان دابەستبوو، چوار پێنج گەنجیان سەرخۆش كردبوو، بۆ ئەوەی دەستڕێژ لە هەمووان بكەن، دانیان بە تاوانكارییەكەیاندا نا. پاش ئارامبوونەوەی بارەكە گەڕامەوە ئەو بەڵگەنامەی دانپیادانانەم وەرگرت، ئەوەی سەرپەرشتی دەكردن (ع)ی ناو بوو،پاش چوار رۆژ كاندیدكراوەكانی (پارتی) بۆ هەولێر بانگكراین و لە بارەگای لقی (2) بەڕێز جەنابی سەرۆك بارزانی ئامادە بوو، پاشان باس هاتە سەر دزێوە دیاردەو دەستدرێژی، تاوەكو لە كۆبوونەوەكان بە روویاندا بدەینەوە، ئەوسا ناچارمام بەڵگەكەی تەنكەی باخەڵم دەرهێناو بردمە خزمەتیان و سەراپای پیلانەكەم بەیان كرد. هەر لەو رۆژانەدا بوو بەسەر وێنەگرەكانەوە گەڕان هەر یەكێ وێنەی منی دانابووبێ، بە هەڕەشەلێكردنەوە پیێان لادابوو. یەكێ لەو ستۆدیۆ فۆتۆگرافیانە ستۆدیۆی (فەتحی) بوو، دڵی نەهاتبوو وێنەكەم لابدات، ناچار قفڵێكی لەو جامخانەیە دابوو، هەتا ئەو رۆژەی ستۆدیۆكەی نەما، هەر بەو شێوەیە مابوویەوە. خۆیشم سەرم سوڕمابوو، ئایە بۆچی ئەم دوژمنایەتییەی من دەكەن؟! هەر لەبەر پارتی بوونم! ئایە ئەمە رەوایە؟ ئەوەی یەك تۆزقاڵ ویژدانی هەبووبێ، دەبێ ئەوەی لەبەرچاوبووبێ، رۆژانێ بوو، واتە لە كۆتایی هەشتاكاندا، پاش كیماباران و ئەنفال. تەنیا شانۆیەكی پێشمەرگە، كە هەر تفەنگەكەی سەروخوار نەكردو، هەر سوار و لەسەر پێ بوو لە قەرە واڵەشییەوە تەنیا نیشانەی دوژمنە سەرەكییەكەی نەتەوەكەمان بوو، ئەو بەرهەمانەم گەواهی راستبێژو هەمیشە زیندوون. هەر لەسەر هەمان بابەت، لە كاتی شەڕی خۆكوشتندا، شاندێكی هاوبەشی پەرلەمانی هاتینە سلێمانی، سەردانی هەڵەبجەمان كرد و گەڕاینەوە لە ئوتێل بووین، (شەهید كاكە شەوكەت حاجی موشیر) سەردانی كردم و وتی: جەنابی (كاك جەبار فەرمان) دەیەوێت سەردانت بكات. منیش وتم: نەخێر من خۆم دەچمە دیداری، ئەوە بوو ئۆتۆمبێلەكەی پارێزگاری سلێمانی (كاك سالار عەزیز)یان بۆ هێنام، كە گەیشتینە بارەگاكەی خوالێخۆشبوو (كاك جەبار فەرمان) كە لە شوێنی بارەگای (لقی 4)ی پارتیدابوو، بە سڵاوی شەرەفی سەربازی و بە پێشوازی (كاك جەبار فەرمان) زۆر بە گەرمی و بە رێزەوە بەخێرهاتنیان لێكردم، خوالێخۆشبوو منی پێش خۆی دا، پاشان بە كامیرای فۆتۆگراف و ڤیدیۆ، دەیان وێنەی دووقۆڵییان گرتین، منیش وتم: ئەرێ قوربان ئەوە خێرە؟ وەرامی دامەوە: چی لەگەڵ ئەو خەڵكە بێویژدان و خودانەناسانەدا دەكرێ، هەزار و یەك پڕوپاگەندە و بوختانی هەڵبەستراویان بۆ كردووم، گوایە من، ئەحمەد سالارو ماڵ و منداڵیم كوشتووە، ئیتر هەزار گازەندەم لە دەرەوە هاتۆتە سەر، بۆیە دەبێ ئەو وێنانە بە دونیادا بڵاوبكەمەوە، دڵنیابە من هەرگیز دەستم ناچێتە وەرزشوان و هونەرمەندان. دڵنیاشم ئەوانە پارتی نین، بەڵكو پۆخڵەواتەكانی رژێمن.
پاشان بۆ گەڕاندنەوەشم بە ئۆتۆمبێلی تایبەتی خۆی گەیاندمیەوە ئوتێلەكە. كەواتە خوا ئەوانە بگرێ كە كاریان گێرەشێوێنییە و شەڕەنگێزن و دەستیان لە بەرۆكی ئەم گەلە نابێتەوە.