دلبەر جزیری یەكێكە لەو كچە گۆرانیبێژانەی كە لە دەرەوەی وڵات دەستی بە كاری هونەری كردووەو سەرەڕای بچووكی تەمەنی توانیی لەو كارانەی پێشكەشی كردوون سەركەوتن بەدەست بهێنێت، دلبەر جزیری بە سەركەوتوویی توانیی فۆلكلۆر و نوێگەرایی لە كارەكانی تێكەڵ بكات.
دلبەر لە بارەی بارودۆخی كوردستان دەڵێ: ئێستا بارودۆخی هەموو پارچەكانی كوردستان تایبەت و ناسكە لە هەموو روویەكەوە، هەر كاتێك كورد دەست بخەنە نێو دەستی یەكتر من زۆر خۆشحاڵ دەبم و هەست بە سەربەرزییەكی زۆر دەكەم، روون و ئاشكرایە هەر كاتێك یەكگرتوو بن و پشت و پەنای یەك بن ئەو كاتە كوردستان وەك قەڵایەكی پۆڵایین هیچ كاتێك ناكەوێت و دوژمنان ناتوانن ریزەكانمان لاواز بكەن و بە ئاواتی خۆیان ناگەن، پێویستە تاكی كورد خۆی بە كوردستانی بزانێت و ئینتیما و خۆشەویستیی بۆ كوردستان بێت و كوردستان بە ئێمەوە سەربەرز و ئاڵاكەی گەشاوە دەبێت.
سەبارەت بە ئەركی هونەرمەندان لەو ساتەوەختەدا جزیری دەڵێ: پێویستە ئێمە ئەو كەسانە لە یاد نەكەین كە گیانی خۆیان كردۆتەوە قوربانی ئەو خاكە پیرۆزە و هیچ كات لە یادیان نەكەین، رێز و حورمەتم بۆ خانەوادەی ئەم قارەمانانە هەیە، هیوادارم گەلی كورد لە دوای كۆتایی هاتنی ئەو شەڕە نەگریسەوە ریزەكانی گەلی كورد پتەوتر و قایمتر بێت و هەموومان لە پێناو كوردستان و ئاوەدانكردنەوەی كوردستان خەبات بكەین.