بۆ ماوەیەكی كورت، بەغدا نیمچە حكومەتێكی دانایەوە، ئەو كاتە مەڵبەندی رۆشنبیری زانكۆی سلێمانی جارانیان كردبووە بارەگای پارێزگا، ژمارەیەك هونەرمەندیان بانگهێشت كردبوو بۆ ئەوێ، پاشان زانیم ئەوانە (لە بێ خەبەران كەشكەك سەڵەوات)، دیارە (نە بایان دیوە، نە باران)، دەنا كەی كاتی ئەوەیە بیر لە بۆنەی (رۆژی سلێمانی)، یان رۆژی پارێزگای سلێمانی بكەنەوە. چوومە ژوورێ چوار پێنج ریز كورسییان لە دوای یەك ریز كردبوو، بەرامبەر مێزێك كە لە پشتیەوە پارێزگاری ئەو كات و یەك دوو عەرەب دانیشتبوون، دیار بوو یەكێكیان كە لە دەستی راستی پارێزگارەوە بوو، بەرپرسی (ئەمن) بوو، منیش رووم لە دوایین ریز كرد و بێدەنگ لێی دانیشتم، پارێزگار بەخێرهاتنی كردو لەبەرم هەستاو فەرمووی چوونەپێشەوەی لێكردم و بە عەرەبی بە دەستە راستەكەی وت: ئەوە فڵانە كەسە كە دەبوو لەسەرووی ئێمەوە دانیشێ. ئیتر خوا هەڵناگرێ ستایشێكی زۆری كردم.
دیارە ئەو پیاوە لە بنەماڵەیەكی هەرە بەرزی خانەدانی وڵاتەكە بوو، لەوانەی بە رێز و شەرەفمەندی گوش دەكرێن، بەڵام ئەگەر بەخت یاری بوایە لەو رۆژانەدا ئەو ئەركە گرانەیان پێ نەدەسپارد، ئەمە وەك ئەوە دەهاتە بەرچاوم، كە باشترین كەشتیوانی هەواڵە بیابانێكی وشك و برنگ بكەیت و فەرمانی دەستبەكاربوونی پێدەیت، جەناب حەز دەكەم بزانن گەر بتانەوێ تەنانەت زۆڕناژەن و دەهۆڵژەنێك لە چوارقوڕنەوە بهێنن، مەحاڵەو لێت دەبنە (هەناری شیرینە)، كەواتە هەرلێی گەڕێن باشترە، چونكە پیاوێكی بە ئەزموون و دونیادیدە بوو، خێرا لە مەبەستەكەم حاڵی بوو، ئیدی لەسەری نەڕۆیشت و كۆتایی پێهێنا، پاش چەند رۆژێ بۆ جارێكی دیكە حكومەتەكەی بەغدایان قڵپ كردەوە و ئیدی ئەو شەقەی لە قوونی خۆی هەڵدا، ببڕای ببڕە نەهاتەوە.
سەر لە نوێ لەلایەنی بەرەی نیشتمانییەوە كاروباری هەرێم بەڕێوەچوو، پەرەمان دا بە رێكخراوی هونەرمەندانی كوردستان و لە ماوەیەكی كورتدا سەرانسەری كوردستانی گرتووەو بووە گەورەترین رێكخراوی هونەرمەندان كە جگە لە هونەرمەندانی پارتی دیموكراتی كوردستان، هونەرمەندانی حزبی شیوعی و پاسۆك و حسك و لایەنانی دیكەشی لە خۆگرت.
لەسەر داوای هەڤاڵ (نێچیرڤان بارزانی) داوای سەردانی سەركردایەتیم لێكرا، كاتێ بە دیداریان گەیشتم، پێشنیاریان وابوو ئەركی بەرپرسیاریەتی تەلەفزیۆنی كوردستان تی ڤی (K.TV) لەئەستۆ بگرم، منیش تكام لێكردن بەو مەرجانە ئامادەم:
یەكەم: بۆ هیچ كەسێك نەبێ دەست بخاتە كارەكەمەوە، یان رێنماییم بكات.
دووەم هیچ بابەتێكم بەسەردا نەسەپێنن.
سێیەم: كەناڵەكە لە بابەتی توندوتیژی و یادكردنەوەی شەڕ و كوشتار بپارێزم.
پاش ئەوەی بە دڵ گوێی لە مەرجەكانم گرت، فەرمووی: ئەوە بۆ یەكەم مەرج لەگەڵتم، بۆ دووەمیان حەز دەكەم پتر روون بێت، ئەوە سەبارەت بە سێیەمیان ئەوەشی رەوایە، سوپاسم كرد و دەربارەی دووەم مەرجیش گوتم: رەنگە زۆر جیاوازی لە نێوانی روانگەی من و سیاسەتمەداردا هەبێت، چونكە من لە چاوی فراوانترین جەماوەرەوە لە بابەتەكان دەڕوانم، بەڵام سیاسەتمەدار پتر پەیوەستە بە پەیامە تایبەتییە حزبییەكەوە، یان پوخت بەرژەوەندیی حزبییەكە، رەنگە ئەو بە رەوای بینی پتر كاتەكە تەرخانی سەركردە و رابەرێك بكەم، هەرچۆن جاران دەمانبینی (لە داڵەوە بۆ داڵ)، من وا ناكەم ئەوە شاعیرێكی دێرینی (عەرەب) لە شیعرێكدا گوتوویەتی كە بە كوردی وا دەگەیەنێ: (ئەگەر شەوانەش خۆر ببینرایە رەنگە بایەخی لە دەست بدایە). هەروەها لە بارەی شەڕ و ئاشۆب و بینراوی توندوتیژییەوە، دەبێ هەتا بكرێ پیشان نەدرێ، نامەوێ شەڕ و كوشتار بخزێنە نێو بنمێچی ماڵەكانەوە، ژن و پیر و منداڵ چ گوناهێكیان كردووە هەتا ئەو سزایە بدرێن؟ تەنانەت (ئەنفال) و كیمیاباران و رەشبكوژی. ئێمە هەر لە سەرەتای سەرهەڵدانی شۆڕشەوە هەتا راپەڕین هێندە تاوانی (جینۆساید)مان بینیوە، چەندین نەوەی گرفتاربوومان بە چەشنەها نەخۆشیی دەروونی لێدروست بووە، دەسا با نەهێڵین و بەربەست بین لەبەردەم وەیشومەی ئەو هەستە ژەهراوییە بۆ نەوەی دوای راپەڕین. بە رای من جگە لە لایەنی رۆشنبیر و پەروەردەكردن لە رێگای تەلەفزیۆنەوە، دەبێ بە چاكی رەچاوی چێژی خۆشی بەخشین بە بینەران بكرێ، كەواتە هەندێ باری سیاسەت هەیە هەر نەبێ دەبێ لە پاشكۆدا جێگای ببێتەوە. بەڕێزیان سەرەی رەزامەندی بۆ لەقاندم، ئێدی منیش گوشاد بووم بە ئاكام و ئایندەمان.
كەناڵەكەمان كەوتە كار و ئەو دەمەش رۆژانی گەرموگوڕیی هەڵبژاردن بوو، شەو و رۆژی حەڤدە سەعات پەخشمان دەكرد، ناچار بووین (ئیركۆندیشن) لە پشتیەوە دابنێین بۆ ئەوەی نەسووتێ، هەرچەندە جاروبارەش كارەباكەیان بە دەستی ئەنقەست دەكوژاندەوە، ناچار كەوتینە دۆزینەوەی و ئاشكرامان كرد، بەداخەوە زۆر كردەوە رۆژ بە رۆژ قوت دەبوویەوە، گشتیان دەبوونەوە كەمكردنەوەی پیرۆزی خەرمانەی خەباتی گەلەكەمان.. بە داخەوە.
هەر لە بارەی كەناڵەكەمانەوە شەوێكیان چەند هەڤاڵێكی سەركردایەتیمان سەردانی سلێمانییان كرد و بۆ شەوێ لە ماڵی هەڤاڵ كاكە (دكتۆر رۆژ) میوان بوون، درەنگ وەختانی فەرموویان بۆ سەردانی بنكەی پەخشی تەلەفزیۆنەكە نەكەین، وتمان سەرچاو، هەڤاڵان شەهید سامی عەبدولڕەحمان و شەهید شەوكەت شێخ یەزدین و هەڤاڵ كاك قادر قادر و شەهید خاڵە عەفان بەرەو گۆیژە چووین و سوپاسی ئەو رێكوپێكی و پاسەوانییە باشەیان كرد كە بەتاڵیۆنێكی هۆزی (مەنمی) لە ئەستۆیان گرتبوو، بەڕێز هەڤاڵ (د. رۆژ) ئافەرینی ئاراستەی هەمووان كرد.
هەر بەم بۆنەی خەمی تەلەفزیۆنییەوە، حەز دەكەم رووی زارم بكەمە برا و خوشكە میدیاكارەكانم و بڵێم: هەر شتە بە خۆی و خوێش بەمەعنا، نە زیاد نە كەم، (شكسپیر) لەسەر ئەو فەلسەفەیە شانۆیی (ئۆتێللۆ)ی داڕشتووە (هەر شتە لە رادەی خۆی بەدەر بێ، بەپێچەوانەوە دەشكێتەوە)، كەواتە (نە شیش بسووتێ نە كەباب)، (لە داڵ هەتا دڵەكەی) سەردەمی رژێم مەهێننەوە ئارا، با سەرەكەكانمان بپارێزین و لە شكۆیان كەم نەكەینەوە، یان با جڵە بۆ خەستكردنەوەی شتەكان راگرین و لە بڕی داڵ هەتا داڵ، نەگۆڕین بە (لە داعشەوە هەتا داعش) با نەهێڵین خوا نەخواستە بینەرانمان لێ بڕەنجێ.