شارۆخان كە بە شای بۆڵیۆد ناسراوە، هاوخەمیی خۆی بۆ خانەوادەی هاووڵاتییەكی ویلایەتی غۆجارتی هیندی دەربڕی كە لە وێستگەی شەمەندەفەڕی ناوچەكە گیانی لە دەستدا و هۆكاری مردنەكەشی بۆ شارۆخان گەڕێندرایەوە بە هۆی وەستانی شەمەندەفەڕەكەی لە وێستگەكە.
خان بە شەمەندەفەڕ گەشتێكی ئەنجامدا، بەم گەشتەش مشتومڕێكی زۆری نایەوە، چونكە كاتێك شەمەندەفەڕەكە لە وێستگەی غۆجارت وەستا و ژمارەیەكی زۆری هاووڵاتیان كە لە وێ بوون كۆبوونەوەو روویان لە شەمەندەفەڕەكە كرد بۆ بینینی و لە ئاكامدا پیاوێكی بە تەمەن كە لە ناوچەكە ناسراوە كەوتە ژێر دەست و پێی خەڵكەكەو جەڵدەی دڵ لێیدا و لە ئەنجامدا هەر لەوێ گیانی لەدەستدا، بەم بۆنەیەوە شارۆخان بروسكەیەكی ماتەمێنی ئاراستەی خانەوادەكەی كرد و كاتێك گەیشتەوە دلهی بە رۆژنامەنووسانی راگەیاند: زۆر بەداخەوە ئەمڕۆ پیاوێك گیانی لە دەستدا، سەرەخۆشی لە خانەوادەكەی دەكەم.
شارۆخان هەروەها وتی: تیمی ئێمە بەردەوام لەوێ بوون، ئەوەی روویدا كارەساتێكی ناخۆش بوو، بەداخەوە ئەم رووداوانە تائێستا روودەدەن، تیمەكەی ئێمە لە ناشتنی و پرسەكەیشی ئامادەبوون.