رۆژنامەی (سەفیر)ی لوبنانی بڵاوی كردەوە كە دادگایەكی لوبنانی بڕیاریداوە فەیروزی خانمە هونەرمەندی ناسراوی لوبنانی سزا بدات بە پێدانی بڕی زیاتر لە یەك ملیۆن دۆلاری ئەمریكی بە سێ كەس لە لوبنان و ئەمریكا بەهۆی ناكۆكییەكی نێوانیان دەربارەی سازكردنی ئاهەنگێكی گەورە لە ناوچەی كونیتیكت لە ئەمریكا.
لەم بارەوە خانمە دەرهێنەری لوبنانی ریما رەحبانی كە كچی (فەیروز)ـە، بێدەنگی خۆی شكاند و ئەم كێشەیەی بە فیلمێكی ئەمریكی – ئیسرائیلی وەسف كرد. ریما لە ئەكاوەنتی خۆی لەفەیسبووك نووسیویەتی: ئەمە فیلمێكی ئەمریكی- ئیسرائیلی درێژە، لە ئەمریكا نەبێت لە هیچ شوێنێكی دیكە درووست نابێت، هەتا نەیبینن نازانن چەند ئاشكرایە كە چۆن درووستكراوە؟
ریما هەروەها دەڵێت: كاتێك ئێمە لە ئەمریكا ئاهەنگمان پێشكەش دەكرد، لەناكاو كەسێك دەركەوت كە ئێمە نایناسین و لە ژیانماندا نەمانبینیوە و پێی وتین من بەڵێنم پێدراوە كە فەیروز لەگەڵ خۆ ببەم بۆ ئەمریكا بۆ سازكردنی ئاهەنگێك بێ ئەوەی بزانین ئاهەنگی چی و چۆن و بۆچی و بۆ كێ و بەپێی چ بەڵێنێك؟ ئەمانە هەموویان درۆ بوون درووستی كردن و تەنیا خۆی دەزانێت.
لەكۆتاییدا ریما دەڵێ: ئێستا كە ئێمە لەكۆتاییەكانی 2016داین دووبارە دەركەوتۆتەوەو فیلمەكە دووبارە دەكاتەوە، بەڵام ئێمە دڵنیاین كە دادگای لوبنانی دەتوانێت راستییەكان دەربخات و حوكمی راست دەربكات.