عەدنان و ئاكۆ هەولێر جوانی باران دەكەن
ئا/ تاریق كارێزی
ئەم پیشانگایە لە چەند روویەكەوە تایبەتمەند بوو. هەردوو هونەرمەند لەوە دەچێ وەك پرۆژەیەكی هاوبەشی هونەری كاری هەماهەنگییان كردبێت. هەردووكیان ژمارەیەكی زۆر لە تابلۆی ئاوڕەنگیان كێشابوو، بابەتی تابلۆكانیش بە گشتی سروشتی كوردستان بوو. سەرباری ئەوە، عەدنان كەریم وەك گۆرانیبێژێكی خاوەن هەواداری زۆر، جۆرێك لە ئامادەبوونی سیمبولیانەی بە پیشانگاكە بەخشیبوو. ئەم هونەرمەندە ئەگەرچی لە رووی ئەكادیمییەوە دەرچووی شێوەكارییەو لەكۆلیژی هونەرە جوانەكانی زانكۆی سلێمانیدا مامۆستای شێوەكارییە، بەڵام پتر وەك سترانبێژێك ناسراوە. واتە بەشی هەرە زۆری جەماوەری هونەر دۆستی پیشانگاكەی هەولێر، بە خەیاڵی دەنگ و سەدای عەدنان كەریمەوە بۆ پیشانگاكە هاتن.
كارەكە سەبارەت بە ئاكۆ غەریب بە جۆرێكی دیكەیە. ئەو زۆر دەمێكە وەك نیگاركێشێكی ریالیست ناسراوە، كە بە مۆركێكی كوردانە كاردەكات، تا ئێستاش پێنج پیشانگای تایبەتی كردووەتەوە، تابلۆكانی ئەو لەو زۆر شوێندا هەن، بە شێوەیەكی بەربڵاو لە لایەن هەوادارانی هونەری شێوەكارییەوە بیندراون. پێكەوە ئامادە بوونی ئەم دوو بەهرەیە، سەنگێكی زۆری بەو نمایشە هاوبەشە دا.
پەیوەست بە ناوەڕۆكی پیشانگاكە، ئێمە دەبینین هەردوو هونەرمەند لەچێوەی رەهەندەكانی جوانیی نێو چیا و سروشتی كوردستاندا كاریان كردووە. كەرەستەی كاركردنەكەشیان لەیەكەوە نزیكە، جۆرە كاغەزێكی تایبەتی نیگارو ئاوڕەنگ. هەردوو هونەرمەند لە رووی بابەت و ناوەڕۆكەوە، ویستوویانە هەستی خۆشەویستی و جوانبینانەی خۆیان بۆ سروشتی كوردستان دەرببڕن. ئەوان لە سۆنگەی عەشقێكی قووڵەوە بۆ نیشتیمان كاریان كردووە، بۆیە سەلیقەی كار كردنیان بە ئاوڕەنگ و لە تابلۆی قەبارە جیاجیادا پیشان داوە، لە هەمان كاتدا هەردوو هونەرمەند كارامەییەكی زۆریان لە رووی بەكار هێنانی ئەم تەرحە رەنگە و دەرخستنی توانا و بڕستی جوانییەكانی نواندووە، كە لە هەر رووبەرێكی تابلۆدا، ئەم رەنگە لە یەك جار زیاتر دەمی فڵچە قبووڵ ناكات. واتە دەبێئەندازەی پێكهاتەی تابلۆ بە تەواوی لە زەینی هونەرمەنددا چەسپی بێت، جا چ سكێچی بۆ بكێشێت یان نا، ئەوا بە دەست و پەنجەیەكی گەرم و چالاكانەوە، دەكەوێتە كار كردن بۆ تەواو كردنی ئەو دیمەنەی زەین لە سروشتەوە وەریگرتووە، پاشان تێكەڵ بە هەست و نەستی ستاتیكاییانەی هونەرمەند بووە، دواتر سەرەنجامی تێكەڵەیەكی واقیع و خەیاڵ، چ لە رووی فۆرمەوە، یان لە رووی رەنگەوە، لە تابلۆیەكی جوان و سەرنجڕاكێشدا خۆی دەنوێنێ.
دەبێ ئەوەش بڵێین، كە كارێكی چاوەڕوانكراوە بەرهەمی هەردوو هونەرمەند، وێڕای هەموو وێكچوونەكان لە رووی بابەت و كەرەستەی كاركردنەوە، بە دوو ستایل و تەرحی جیاوە تابلۆیان نەخشاندووە، ئەمەش زادەی ئەو راستییەیە كە دەڵێ: هونەر بەرهەمی ئاوێتەیەكی هەست و نەستی هونەرمەندە، لەم گۆشەیەوە هەر زاتە چاوگی ئاوێتەیەكی تایبەتمەندی هەست و نەستی مرۆییە، تابلۆ و بەرهەمی هونەری رەنگدانەوەی كەسایەتیی هونەرمەندەكەیە. لەم گۆشەنیگایەوە دەكرێ بە كورتی لە بارەی بەرهەمەكانی هەردوو هونەرمەند، وردە هەڵسەنگاندنێك بخەینە روو.
ئەگەرچی سروشتی كوردستان بابەتی سەرەكیی پیشانگاكە بوو بە گشتی، بەڵام عەدنان كەریم كۆمەڵێك تابلۆی هەردوو ژینگەی كوردستان و ژینگەی تاراوگە (سوید)ی پیشان دا، كە جیاوازیی ژینگەی هەردوولا لە رێی تابلۆكانی عەدنانەوە، دەخوێندرێتەوە. لە ژینگەی تاراوگەدا روانگە و تێكڕای دیمەنی تابلۆ لە رووبەر و مەودایەكی كەمی جوگرافیدا خۆی دەنوێنێ، بۆ نموونە تەنیا قەدی چەند دارێك لەگەڵ بەشێكی كەم لە لق و گەڵاكانیان لە تابلۆیەكدا دەبینی، چونكە سروشتی سوید دارستانی چڕ دایپۆشیوە، لە كەشێكی تەماویدا كەمتر بوار بە وردەكاریی ستاتیكی لە دیمەنی دوور و رەهەندی داكشاو بەرەو دوورایی قووڵ دەڕەخسێنێ. لە هەمان كاتدا كوردستان وەك وڵاتێكی گەرم و چیایی، لە رووی تۆپۆگرافیاشەوە تێكەڵەیەك لە خاك و سەوزایی خۆی دەنوێنێ، وەرزی بەهاری لێ دەربچێت، خاكی رووتەن لە دیمەنەكانی سروشتدا زیاتر خۆی دەنوێنێ، هەڵبەت لە زستاندا بەفر و رەنگی سپیی تێكەڵ بە رەنگی هەمەچەشنی بەردینی شاخ، زاڵ دەبێت. لەم نێوەندەدا تابلۆكانی عەدنان بە گشتی چەشنێك لە تام و بۆ، مۆركی هونەری ئەوروپا و كەشی ساردو هێمنیان پێوە دیارە. ئەو سروشتی كوردستانی لەبەر رۆشنایی كەشی ستاتیكاییانەی ئەوروپا كێشاوە. ئەمەش بۆ ئەوە دەگەڕێتەوە كە ساڵانێكی زۆر چاوی بە بەرهەم و تابلۆی نێو گەلەری و مۆزەخانەكانی هونەر لە ئەوروپا زاخاو داوە، هەروەها ژینگەی ئەوێش لە زەینی ئەودا تا ئەندازەیەك نەخشی كێشاوە و چەسپیوە.
ئاكۆ غەریب وردتر لە پێكهاتەی سروشتی كوردستان و جوانییەكەی روانیوە، بە ستایلێكی پتر خۆماڵییانە و نزیك لە ئەزموونی هونەرمەندانی دیكەی سروشتخوازی كوردستانەوە كاری كردووە. ئەو دەرفەتی زیاتری هەبووە، كە بەرانبەر بە جوانیی چیا و وردەكاریی رەنگ و پێكهاتەی خاك و تۆپۆگرافیای سروشت ورد بێتەوە. دەست كراوەتر كاری كردووە. تابلۆكانی ئەو دیمەنی جیاجیای سروشت لە وەرزی جیاجیا دەخەنەڕوو، هەندێ جار بواری بە روانگە داوە قووڵ بچێتە نێو دیمەنێكی دەیان كیلۆمەتر درێژەوە، هەندێ جاریش دیمەنی شكۆداری لووتكە یان لاپاڵی بەردین و شاخی بە زمانی دیدەیی گواستووەتەوە. بێ سڵەمینەوە و بە ئەزموونێكی باشەوە، ئاوڕەنگی خستووەتە خزمەت گەڵاڵەكردنی گوتارێكی ستاتیكی، ئەو گوتارەی زادەی بەشێك لەجوانی و بەخشندەیی خاكی نیشتمانێكن كە ناوی كوردستانە.
ئەم پیشانگایە وەك گەواڵە هەورێكی پڕ لەجوانیی بەهار بوو، لەهۆڵی میدیاوە هەولێری جوانی باران كرد.
