چونكە شەوەكەی بە كەنەفتی و شەكەتییەوە سەرمان لەسەر سەرین نابوو، بۆیە شەو سپێدەمان بە یەك تەقەڵ بەیەكدییەوە گرێدابوو، كوردانی پێشینییان فەرمووبوویان: «كە خەو هات، پێخەفی ناوێ و برسێتیش پێخۆری ناوێ».
دوای بەرچایی، دەستە دەستە میوانان سەردانیان كردین و جوان هەستیان نواند، یەكێ لەو میوانانە (كاك سەعدوڵڵای درەخشانی) بوو، گەنجێكی رۆشنبیرو شارەزا لە مێژوودا، پێشتر ماوەیەك بێژەری رادیۆی دیموكراتی بوو. ئیستەرەی لێكردین بگوێزرێینەوە بۆ ئەو ئەپارتمانەی بەكرێی گرتبوو، منیش پەسندم كرد، هەرچەندە ماڵی (جەلال بەگ) پێیان خۆش نەبوو، بۆیە لە تەك سوپاس كردنا، تكای رێگاپێدانم لێكردن، چونكە دەمزانی ماڵەكە قۆناخ بوو، بەردەوام میوانان روویان تێدەكردن، بۆیە نەدەبوو ببینە بارگرانی بەسەریانەوە، ئەمەش بۆ رۆژو دوو رۆژ نەبوو، مەگەر تەنیا ئەو خودایە بیزانیایە، ئەو بارە هەتا كەنگێ دەخایەنێ.
پاش نیوەڕۆ شڕوشیتاڵیان پێچایەوەو سەركەوتینە ئەپارتمانەكە. دەستبەجێ جێگای خۆمان سازكرد، شوێنێكی گەرموگوڕ بوو، ئامێری (شۆباش)ی هەبوو، كە جگە لە ئاوی گەرم سەرجەم فەرشی شوێنەكەی داغ دەكرد. دیارە (كاك سەعدوڵڵا) وا راهاتبوو هەمیشە سەماوەرەكەی گیزەی بێ و چای ئامادە بێ، بۆیە دیژلەمە بە دوای دیژلەمەدا فڕمان دەكرد.
پەیتا پەیتا رۆشنبیران و ئەدیبانی كورد سەردانیان كردم، سەرەتا نووسەرو شاعیری كوردپەروەر (مامۆستا حەمەی حەمە باقی) كە هەرگیز ئەو مەردایەتییەیم لەبیر ناچێتەوە، هەروەها مامۆستای مێژوونووس (مامۆستا میرزا رەئوفی تەوكەلی). پاش دوو رۆژ ئێمە سەردانی بەڕێز (مەجید خانی بانەمان) كرد، لەناو سەدان كتێبی مێژوودا، پیاوێكی هۆشیار و زانام لەنزیكەوە ناسی. هەر لەو رۆژانەدا بوو چەند رۆشنبیرو هونەرمەندێك لە(ئیرشادی ئیسلامی) و (ئەنجومەنی ئەدیبان)ـەوە سەردانیان كردم، برادەرێكی فارسیان لەگەڵدا بوو، پسپۆڕی (بۆدی تەكنیك) بوو، ناسیم كە لە یەكێ لە كۆششەكانیدا كاتێ لە پارێزگای (سنە - كوردستان) بوو، توانیبووی (68) جۆر هەڵپەڕكێی میللی كوردی تۆمار و پۆلبەند بكات. هەر ئەم بەڕێزە داوایكرد، باسێكیان لەسەر شانۆ بۆ پێشكەش بكەم، منیش بە چاكم زانی و لەكاتی دیاریكراودا لەهۆڵی (ئیرشادی ئیسلامی) پێشكەشم كرد، پتر لە دوو سەعاتی خایاند، دواتر پرسیاریان لێكردم: ئایا دەكرێ تۆمار بكرێ؟
: بۆنا، زۆر چاكە، پێمخۆشە.
پاشان هەواڵی كۆڕەكەم بیستەوە: «هەستمان بە كات نەكرد، لەبەر دەدوا، جگە لە زمانی كوردی، یەك حەرفی بێگانەی نەگوت».
چەند رۆژێكی نەبرد، خانەخوێیەكەمان هاتەسەرەوەو پێی راگەیاندم میوانێكی تایبەتیم لە (تەهران)ـەوە هاتووە، منیش خێرا جامانەكەم بەست و چوومە پێشوازی، گەنجێكی مێزەری رەش لەسەرو ریشێكی جوانی هێشتبوویەوەو عەبایەكی رەشی بەشانەوە بوو، ژمارەیەك پاسەوانی لەتەكدا بوو.
بەعەرەبی (فصیح) كەوتە قسەكردن و، داوای لێكردم كە بچمە تەهران و رێزێكی تایبەتیم لێدەنێن، منیش بە دڵ سوپاسم كردو ژمارەیەك هۆكارم هێنایەوە، كە ئەو كارەم بۆ ناكرێ و هێندە نابات دەگەڕێینەوە كوردستانێكی ئازاد و دەبێت ئەركێكی زۆر چاوەڕوانمان بێ. ئەو بەڕێزە ناونیشان و ژمارەی تەلەفۆنی بۆ دانام، پاشان بەو پەڕی رێزەو بەڕێمانكرد، نەیهێشت تا خوارەوە لە دیداریا بم، گەڕانمیەوە، زانیم ئەمە برازای گەورە بەرپرسێكی كۆماری ئیسلامی ئێرانە.
لە گشت شوێنێكەوە روویان تێدەكردین، چ لە شارەوە هاتبن، یان لە دەوروبەرەوە، رۆژانە هەر دەرفەتم بوایە كەمێك دەچوومە دەرەوە، زۆر جار بە جێبە ئەمەریكییە سەر بەتاڵەكەی كاك (سەعدوڵڵا)، بەتایبەتیش سەرم لە برای رۆماننووس مامۆستا (عەتای نەهایی) دەدا، كە نووسەرێكی زرنگ و دەستباڵایە.
رۆژێ لەگەڕانەوەمدا، برای نووسەرم (كاك فوئاد حەمەئەمین سەراج)م بینی بە ماڵ و منداڵەكانیەوە بوو، بردمیەوە ماڵێ، كاك (فوئاد) هەمیشە خۆشەویستم بووە. نەخێر، بەبێ ئەوەی بمانەوێ عەجایەب دیوەخانێكمان سازكردبوو، رۆژی چوومەوە، ژنێك و منداڵەكانی لەوێ بوون، مێردەكەی بە تراكتۆر باری دەگوێزایەوە، تۆمەس پاش ئەو گشت تەمەنە لەگەڵ مێردەكەی نەسازاوەو تۆراوەو لای منی بە ماڵەباوان دانابوو، سەرچاوم لێكرد، دیاربوو مێردەكەی، كورد وتەنی (لێفە نوێكردنەوە بوو) بۆیە هیچ خەمی لە تۆرانی ژنەكەی نەبوو، دیارە مرخی لە ئافرەتێكی گەنج خۆش كردبوو، (هین) دەرفەتانە تۆرانی ژنەكەی قۆزتەوەو مارەی كرد، پاش ماوەیەك منداڵێكم بینی هەواڵی باوكیانم لێپرسی، لە وەڵامدا وتی: عومری درێژی بۆ ئێوە بەجێهێشتبێ، ئەو ئەمری خوای كرد، لەدڵی خۆمدا گوتم: دیارە، چونكە زۆر تامەزرۆ بووە، هەبێ و نەبێ شامەرگ بووە.
پتر لە مانگ و نیوێكمان لە شاری (بانە) بەسەر برد، ئەو گشت رێزو خۆشەویستییەی نواندیان، بەدڵ دەرهەقی خەڵكی ئەو شارە هەر دەمگوت: چەندە شیعە پەیوەستە بە پیرۆزی خاكی (كەربەلای پیرۆزەوە)، بۆ ئەنجامدانی (فەریزەی) نوێژیان، ئەو بەردە مۆرەی لە كڕنووشدا ناوچەوان دەخەنەسەر، منیش نە گوناهدەكەم نە زیادەڕۆیی، گەر بڵێم، رەوایە لە رووی ئەمەكدارییەوە خاكی ئەم هەوارە بە بەردە مۆری خۆم بكەم.
دیارە ئەو هەستە لێوانلێوەی كوردپەروەری و رێزلێگرتنە لە سەرانسەری هەوارەكانی رۆژهەڵاتدا باو بووەو هەمووان خوویان پێوە گرتووە. هەمیشە نزام لە قاپی پەروەردگاردا ئەوە بووە، بیانپارێزێ و هەرگیز بەو مەرەیەی ئێمە نەچن، رەنگە ئێمە نەتوانین لە ئاستی ئەواندا بین.