فێستیڤاڵی (تایه‌ر تۆفیق) بە سەركەوتوویی كۆتایی پێ هات
ماوەی 2 ڕۆژ بوو شاری كۆیە، تێكەڵ بە دەنگی (عەدنان كەریم و برادەر) و چەندین تیپی میووزیكی دیكەی كوردستان ببوو، كە بە گۆرانی و لۆغان و چەندین لایەنی دیكەی هونەریی، شارەكەی خاڵە (تایه‌ر)ـیان جوانتر كرد و بە گوێرەی گوتەی ئەو كەسانەی ئامادەی فێستیڤاڵیش بوون، ڕۆژی هەینی بە شێوەیەكی زۆر ڕێكوپێك كۆتایی بە بەرنامەی 2 ڕۆژی فێستیڤاڵەكە هات.
ئەوەی مایەی نیگەرانی بوو لە لای ئامادەبووانی فێستیڤاڵ، نەبوونی میوانخانە بوو لە شارۆچكەی كۆیەدا، چونكە بە سەدان كەس داوەت كرابوون، كەچی هەموویان كێشەی خەوتنیان هەبوو، هۆكارەكەیشی نەبوونی میوانخانە بوو، بۆیە داوا كرا دروستكردنی چەندین میوانخانە بكرێتە بواری جێبەجێ كردنەوە.
هەروەها نەبوونی هۆڵێكی تایبەتی هونەری بۆ خۆی كێشەیەكی دیكە بوو، چونكە تاوەكوو ئێستا هۆڵێكی تایبەت بە بۆنەی هونەری لەو شارۆچكەیەدا بوونی نییە و كردنەوەی فێستیڤاڵێكی لەو شێوەیەیش، كە میوانانی لە هەموو شارەكانی كوردستان و تەنانەت دەرەوەی وڵاتیش هەبوو، كەچی لەناو هۆڵی زانكۆی كۆیەدا، كە تایبەت بوو بە فێستیڤاڵ، كێشەی دانیشتن هەبوو و جێگەی هەموو ئامادەبووان نە دەبووەوە.
لەو ماوەیەی بۆ فێستیڤاڵ دیاری كرابوو، تواندرا بە گوێرەی توانا هونەر و كەسایەتی (تایه‌ر تۆفیق) لە ڕووی هەستی نەتەوایەتی و نیشتیمانپەروەری بۆ ئامادەبووان بخەنە ڕوو، ئەمە جگە لەوەی وەكوو ڕێزگرتنێك لەو هونەرمەندە گەورەیە، لە لایەن (ئەمیری كەبابچی)، 2 سیدی لە مەقام و گۆرانییەكانی بەسەر ئامادەبوواندا دابەش كرا، ئەوەی ئامادەبووانیشی دڵخۆش كرد، هەندێك لە گۆرانی نێو 2 ئەلبوومەكە تازە بوون و پێشتر بڵاو نەكرابوونەوە.
ئەگەرچی هەموو ساڵێك یادی هونەرمەندی ناوبراو دەكرێتەوە، وەلێ هیچ ساڵێك وەكوو ئەمساڵ گرنگی پێ نەدراوە، بۆ نموونە هیچ ساڵێك وەكوو فێستیڤاڵ ئەو یادە نەكراوەتەوە و لە ڕووی دابینكردنی بودجەیشەوە ئەو گرنگییەی ئێستای پێ نەدراوە، هەروەها داوەتكردنی چەندین تیپی میووزیكی كوردستان، كە بەشێوەیەكی بەرنامەڕێژ و تایبەت خۆیان بۆ ئەو فێستیڤاڵە ئامادە كردبوو و چەندین بەرهەمیشیان پێشكەش كرد، وەكوو (تیپی كیژانی سلێمانی، تیپی میووزیكی دهۆك، تیپی میووزیكی كەركووك)، كە ئەم تیپانە پێشتر لەو یادەدا بوونیان نەبووە.
گۆرانی و میووزیك هەمیشە بەردەوامی هەبووە و، گوێچكەی ئامادەبووان بە گۆرانی خاڵە تاهیر و چەندین گۆرانیبێژی دیكە دەزرینگایەوە، چەند لێكۆڵینەوەیەكیش لەسەر ژیان و بەرهەماكانی ئەنجامدرا و ئاماژە درا، بەوەی ئەو جگە لەوەی هونەرمەندێكی گەورە بووە، نیشتیمانپەروەرێكی گەورەیش بووە و گۆرانی و سروودەكانیشی گەواهیدەری ئەو ڕاستییەن.
لە یەكەم ڕۆژی فێستیڤاڵدا، كە وەزیری ڕۆشنبیری و لاوانی حكوومەتی هەرێمی كوردستان (د.كاوە مەحموود) و ئەندامی ئەنجوومەنی نوێنەرانی عیڕاق (د.فوئاد مەعسوم) ئامادەی بوون، جگە لە بەخێرهاتنی میوانان و باسكردن لە گرنگی هونەرەكەی خاڵە (تاهیر)، داوا كرا ڕێز لەو هونەرمەندانەیش بگیرێت، كە لە ژیاندا ماون و خزمەتی بەرچاویان كردووە و ئێستا فەرامۆش كراون.
جگە لەوەی چەندین گۆرانی و میووزیك پێشكەش كرا، دیاری تایبەتی تیپی میووزیكی (باواجی كۆیە) پێشكەش بە هونەرمەند (باكووری) كرا، كە دامەزرێنەری تیپی ناوبراو بووە و هەروەها خەڵات بە خانەوادەی (تاهیر تۆفیق) و هاوكارانی فێستیڤاڵ درا.
سەر لە بەیانی ڕۆژی دووەمی فێستیڤاڵ، لە لایەن هەردوو هونەرمەندی ناوداری كورد (مەزهەری خالقی و ئەنوەر قەرەداغی)، لێكۆڵێنەوەیەك لەسەر گۆرانی و مەقاماتەكانی (تاهیر تۆفیق) كرا و (مەزهەر) ئاماژەیدا، لە ڕۆژهەڵاتی كوردستان زۆر حەزیان بە دەنگی ئەو هونەرمەندەیە و ئەو توانی بە هونەرەكەی پێشمەرگە بێت و چەندین هۆنراوەی كردووە بە گۆرانی كە پێشتر هۆنراوەكان بە دزییەوە لە ماڵان دەخوێندرانەوە، وەلێ ئەو نەترساوە و بە گۆرانی چڕیویەتی.
ئەو دوو هونەرمەندە جگە لەوەی باسیان لە گرنگی دەنگی و ئاواز و ئەو هۆنراوانە كرد، كە خاڵە (تایه‌ر) چڕیویەتی، باسیان لەوەیش كرد، كە چەندین گۆرانیبێژ لەسایەی دەنگی ئەودا، یاخود لەبەر كاریگەریی دەنگی ئەو بوونە بە گۆرانیبێژ، واتە ئەو توانی چەندین گۆرانیبێژ لە دوای خۆی دروست بكات.
هەر لە ڕۆژی دووەمی فێستیڤاڵدا هونەرمەند (عەدنان كەریم) هاوتا لەگەڵ تیپی (باواجی كۆیە) چەندین گۆرانی و میووزیكی پێشكەش كرد و بەر لەوەی گۆرانیش بڵێت گوتی: "لە زۆرێك لە بۆنە و فێستیڤاڵە تایبەتەكاندا دەواتم دەكەن، وەلێ من ڕەتم كردووەتەوە، بەڵام نەمتوانی لەم فێستیڤاڵەدا بەشداریی نەكەم، چونكە (تایه‌ر تۆفیق) هونەرمەندێكی مەزن و گەورەیە لە لای من."
لە كۆنسێرتەكەدا، (عەدنان) 2 گۆرانی تازەی پێشكەش كرد، كە هەردوو گۆرانییەكە هۆنراوەكەی لە لایەن شاعیری ناوداری كورد (عەونی)ـەوە دانرابوو و ئاوازەكانیش خۆی داینابوو و چەندین گۆرانی خاڵە (تایه‌ر)ـیشی پێشكەش كرد، كە بووە جێگەی دڵخۆشی ئامادەبووان.
هەر لە هەمان ڕۆژدا تیپی میووزیكی كەركووك، بە گۆرانی و میووزیك بەشدارییان كرد.
(ئارەزوو ئیسماعیل) یەكێك بوو لەو ئاوازدانەرانەی، ئامادەی فێستیڤاڵەكە بوو و گوتی: "من یەكەم كەسم كە توانیومە تێزی دكتۆراكەم لەسەر (تایه‌ر تۆفیق) بێت و بەر لە من كەسی دیكە ئەو كارەی نەكردووە." ئەو باسی لە گرنگی هونەری هونەرمەندی ناوبراو كرد، بۆیە دكتۆراكەی خۆی بۆ تەرخان كردووە.
