بەپێی راگەیێندراوێكی ناوەندی ئەمریكا بۆ چاودێری ماڵپەڕە ئیسلامییەكان ، رێكخراوی قاعیدە رۆژی شەممە 8ی تشرینی دووەمی 2014 هەوڵێكی شكستخواردووی خۆی راگەیاندووە كاتێك پلانی كوشتنی باڵیۆزی ئەمریكایان لە سەنعا داڕشتبوو.

بەپێی سەرچاوەیەك كە لە ئەنساری شەریعە نیوز، باڵی راگەیاندنی رێكخراوی قاعیدە ئەوەی گواستووەتەوە كە رێكخراوەكە رۆژی پێنجشەممە 6ی تشرینی دووەم دوو بۆمبی چێندراویان لە بەرامبەر ماڵی عەبد رەبە مەنسور هادی، سەرۆكی یەمەن داناوەتەوە، بەڵام پێش دوو خولەك لە تەقاندنەوەی، ئاشكرا كراوە.
بڕیار وابووە ئەو دوو بۆمبە چێندراوە لەو كاتەدا بتەقێندرێتەوە، كاتێك ماتیۆ تیلەر، باڵیۆزی ئەمریكا لە سەنعا لە ماڵی عەبد رەبە مەنسور بچێتە دەرەوە.

یەمەن هاوپەیمانی سەرەكی ویلایەتە یەكگرتووەكانە لە جەنگی دژ بە قاعیدە، بەبۆنەی ئەوەی سەنعا رێگەی بە واشنتن داوە بە یارمەتی فڕۆكەی بێ فڕۆكەوان، هێرش لە دژی رێكخراوە تووندڕەوەكان لە وڵاتەكەی ئەنجام بدات.

واشنتن رێكخراوی قاعیدە لە دوورگەی عەرەبی كە لە یەمەن خۆی حەشارداوە، بەلقێكی ترسناكی دەزانێت لە نێو لقە ئیسلامیە تووندڕەوەكانی دیكە، كە لە لیستی رەشی ئەمریكادان، هەروەها واشنتن بڕی 45 ملیۆن دۆلاری وەكو پاداشت داناوە بۆ هەركەسێك كە شوێنی 8 لە سەركردەكانی قاعیدە لە نێویشیاندا "ناسر وەحشی" سەركردەی رێكخراوەكە لە یەمەن، ئاشكرا بكات.









رووداو