3ی‌ ئاب/ ئۆگۆست (گوڵان میدیا)- سەرۆك كۆماری ئێران مەحموود ئەحمەدەی نەژاد كە بریارە رۆژی یەك شەممە پۆستەكەی رادەستی سەرۆك كۆماری نوێی ئێران حەسەن رۆحانی بكات، لە میانەی گوتارێكی خۆی كە لە مەراسمی رۆژی قودس لە بەردەم زانكۆی تاراندا پێشكەشی كرد رایگەیاند كە تاقمە ئیسلامییە توندرەوەكان هیچ جۆرە پەیوەندییەكیان بە ئیسلامەوە نییە.

لەم بارەیەوە ماڵپەڕی جیهان نیوزی ئێرانی بڵاوی كردووەتەوە كە سەرۆك كۆماری ئێران مەحموود ئەحمەدی نەژاد رایگەیاندووە كە هیچ پەیوەندییەكی گرووپە توندرەوە ئیسلامییەكان بە ئیسلامەوە نییە و ئەم جۆرە گرووپانە مرۆڤەكان هەڵدەخەڵەتێنن تا مرۆڤی بێگوناه و بێ تاوان بكوژن و ئەمەیش بە پێچەوانەی ئاینی ئیسلامە.

ناوبراو هەروەها ئاماژەی بەوە كردووە كە ئەو كەسانە كە بە ناوی ئیسلامەوە خۆیان دەتەقێننەوە و دەبنە هۆكاری كوشتن و گیان لە دەستدانی خەڵكی مەدەنی بێ عەقڵن.

ئەحمەدی نەژاد هەروەها هۆشداری داوەتە توركیا و چەندین وڵاتی دیكەی رۆژهەڵاتی ناوەراست و گوتی: متمانە بە وڵاتانی ئیمپرایالیست نەكەن، چونكە ئەم وڵاتانە پلانی مەترسیداریان بۆ ئێوە هەیە و لە داهاتوودا دەكەنە ژێر مەترسییەكانی ئەم پلانەوە.