فیلمێکی کوردی لە فیستیڤاڵی فەجر نمایشکرا
فیلمی سینەمایی "ئێل کلاسیکۆ" لە دەرھێنانی ھەڵکەوت مستەفا کە لە لایەن ھەرێمی کوردستان و وڵاتی نەروێژەوە بەرھەمھاتووە لە نوێترین بەشداریی نێودەوڵەتی خۆیدا بە ئامادەبوونی ئەم سینەماکارە کوردە لە چەندین سانسی جیاوازدا لە بەشی "سینەمای سەعادەت" واتە پێشبڕکێی فیلمە بڵیندە سینەماییەکان لە سی و چوارەمین خولی فیستیڤاڵی جیھانی فیلمی فەجر لە کۆمەڵەی سینەمایی پەردیسی چارسووی شاری تاران چووە سەر پەردەی سینەماکان و بڕیاروایە لە زانکۆی سینەمایی ئێرانیش بۆ قوتابیانی سینەمایی نمایش بکرێت. '
"ئێل کلاسیکۆ" لە رۆژی یەکەمی ئەم فیستیڤاڵەدا کاتژمێر ١ی نیوەڕۆی رۆژی چوارشەممە ٢٠ی ئەپرێلی ٢٠١٦ لە ھۆڵی ژمارە ٥ی کۆمەڵەی سینەمایی پەردیسی چارسووی شاری تاران نمایشکرا و لە درێژەدا لە کاتژمێر ١٥/٧ی ئێوارەی رۆژی ھەینی ٢٢ی ئەپرێلی ٢٠١٦ لە ھۆڵی ژمارە ٤ی کۆمەڵەی سینەمایی پەردیسی چارسوو و لە دوایین سانسدا بە ئامادەبوونی سینەماکاریی کوردیی دانیشتووی وڵاتی نەرویژ ھەڵکەوت مستەفا، دەنگھەڵگری فیلمەکە بەھمەن ئەردەلان و ھەروەھا ھەندێک لە ستافی تەکنیکی فیلمەکە لە کاتژمێر ٤٥/٤ی دوانێوەڕۆی رۆژی شەممە ٢٣ی ئەپرێلی ٢٠١٦ لە ھۆڵی ژمارە ١ی کۆمەڵەی سینەمایی پەردیسی چارسووی شاری تاران چووە سەر پەردەی سینەماکان.
ھەڵکەوت مستەفا لە رۆژانی مانەوەی لە ئێران لەگەڵ رۆژنامەنووسان و پەیامنێرانی سینەمای ئەم وڵاتە دیدار و چاوپێکەوتنی ئەنجامداوە و کاتژمێر ١١ی شەوی رابردوو بە کاتی تاران بە شێوەی راستەوخۆ لە بەرنامەی سینەمایی "رخنەی ٤" لە کەناڵی ٤ی تەلەفیزیۆنی ئێران ئامادەبوون و وڵامی پرسیارەکانی پێشکەشکاریی بەرنامە عەلیڕەزا شوجاع نووری و ئەکتەری بەئەزموونی سینەمای ئێرانی دایەوە.
"ئێل کلاسیکۆ" لەگەڵ چەند فیلمی سینەمایی دیکە لە وڵاتانی جۆراوجۆری جیھان، لەوانە: لیتوانیا، رۆمانیا، فەڕەنسا، ئێران، ئستۆنیا، پۆڵەندا، مەکسیک، فینلەندا، رووسیا، ئۆکڕاینا، ئیسلەندا، نەرویژ، دانیمارک، ئیسپانیا، تورکیا و قەتەر بۆ بەدەستھێنانی خەڵاتی تەندیسی زێڕین و تەندیسی سیمینی ئەم فیستیڤاڵە لە بەشی پێشبڕکێیدایە.
فیلمی سینەمایی "ئێل کلاسیکۆ" چیرۆکێکی ئەویندارنەی بێھاوتایە لە نێوان ئالانی لاو و گۆنای خۆشەویستیدا. رووداوێکی سەرنجڕاکێش، ئالان بە ھاوڕێیەتی لەگەڵ براکەیدا سەفەرێکی مەترسیدار دەپێون لە ھەرێمی کوردستانەوە تاکوو ئیسپانیا بۆ بینینی کریستیانۆ رۆناڵدۆ و بردنی پێڵاوی کڵاش بۆ ئەم ئەستێرە ناودارەی یەنەی ریال مەردرید. ئەم سەرفەر دوور و درێژە بۆ بەدەستھێنانی دڵی باوکی گۆنایە کە یەکێکە لە ھەوادارە قورسەکانی یانەی ریال مەردریدی ئیسپانی و ... .
بەشێک لە ستافی ٩٥ خولەکی فیلمی سینەمایی "ئێل کلاسیکۆ" بریتین لە: دەرھێنەر: ھەڵکەوت مستەفا، سیناریۆ: ھەڵکەوت مستەفا و ئاندرێس فەرھۆڵت، بەڕێوەبەریی وێنەگرتن: چیل واسدال، مونتاژ: نەلیزە لا نەفت، دەنگھەڵگر: بەھمەن ئەردەلان و مریتە مونستاد، موزیک: ترۆند بیرکنێس، ئەکتەرەکان: وریا ئەحمەد، دانا ئەحمەد، کامەران رەئووف و رۆژین شەریفی و بەرھەمھێنەر: ھەڵکەوت مستەفا.
