کتێبێک لەبارەی بارزانییەوە لە ئێران بڵاودەکرێتەوە
بەھرام وەلەدبەیگی رۆژنامەنووس و نووسەری کتێبی "لەسەرووی تۆفان؛ مەلا مستەفا بارزانی بە گێڕانەوەی چاپەمەنییەکانی ئێران لە ساڵی ١٣٢٤ تا ١٣٥٨" سەبارەت بەم کتێبە بە زاگرۆسی راگەیاند: ئەم کتێبە ھەوڵێکی توێژینەوەییە کە لە ماوەی سێ ساڵدا ھاتۆتە ئەم قۆناغەی ئێستا کە دەتوانێت سەرەنجی رۆژنانووسان، توێژەران و مێژوونووسانی ئێرانی بۆلای خۆی رابکشێشێت تاکوو لە توێژینەوەیەکی مێژوویی ـ رۆژنامەوانیدا لەگەڵ ئەندێشەکانی خواڵێخۆشبوو مەلا مستەفا بارزانی ئاشنا ببن.
گوتیشی: ئەرشیڤی چاپەمەنییەکانی ئێران پڕ و لێوانلێوە لە بەڵگە و سەنەدی چاپەمەنیی سەبارەت بە بزووتنەوەی کوردستان بە رێبەرایەتیی ژەنەڕاڵ بارزانی. لەم کتێبەدا، تەنیا وتووێژەکان و چاوپێکەوتنەکانی بەڕێزیان لەگەڵ دەزگاکانی راگەیاندنیی ئەووورپی و ئەمەریکی چاپکراوە کە لە چەپەمەنییەکانی ئێراندا چاپ و بڵاوکراوەتەوە؛ چونکە ئەو بابەتانەی کە پەیوەندیی بە بەڕێزیان و بزووتنەوەی کوردستان لە چەپەمەنییەکانی ئێراندایە ھەزاران لاپەڕە لەخۆدەگرێت و لە داھاتوودا بە شێوەی پسپۆڕانە لە توێی چەندین کتێبی دیکەدا بڵاودەکرێتەوە.
وەلەدبەیگی لە درێژەدا گوتی: ئەم کتێبە ٩٠٠ لاپەڕەییە قەوارەکەی مێژوویەکی نووسراوەیە لە ھەوڵ و تێکۆشانی رۆژنامەنووسانی ئێرانی کە سەبارەت بە بزووتنەوەی کوردستان بە رێبەرایەتیی مەلا مستەفا بارزانی گێڕاویانەتەوە و لێرەدا بە سوپاس و پێزانین لەوان دەبێت ئاماژە بکەم کە ئەم مێژووە ھەرمانە، لەگەڵ خۆیدا پەیامێکی بەمانای ھەیە ئەویش تێکەڵاویی ئێرانە لەگەڵ بزووتنەوەی کوردستان و یەکگریی و گەڕانەوە بە مێژووی کۆن و ھاوبەشی ئاریایی ناوچەکەیە.
نووسەری کتێب ئەوەیشی خستەڕوو: ئەم کتێبە بە ھۆی بایەخی ناوەرۆکە مێژوییەکەی و لە پێناو بەردەوامی ھەوڵەکانی رۆژنامەنووسانی ئێران لە بزووتنەوەی کوردستان لە داھاتوویەکی نزیکدا وەردەگێڕدرێتە سەر زمانەکانی کوردیی، عەڕەبی، ئینگلیزی و تورکی و لە ھەرێمی کوردستان، تورکیا، ئەورووپا و ئەمەریکا چاپ و بڵاودەبێتەوە.
گوتیشی: کتێبی "لەسەرووی تۆفان؛ مەلا مستەفا بارزانی بە گێڕانەوەی چاپەمەنییەکانی ئێران لە ساڵی ١٣٢٤ تا ١٣٥٨" شەش بەشی لەخۆگرتووە کە بە دەمژمێریی بزووتنەوەی کوردستان و ژیان و خەباتەکانی بارزانی دەستپێدەکات و لە درێژدەدا ئاماژە بە بوونی بەڕێزیان لە کۆماریی کوردستان دەکات و پاشان سەیریی رێپێوانی مێژوویی ئەو لە مەھابادەوە تاکوو لێوارەکانی ئاراس دەکات و لە ساڵی ١٣٢٤ی ھەتاوی واتە ١٩٤٥ی زاینیی تاکوو ساڵی ١٣٥٨ی ھەتاوی واتە ١٩٧٩ی زاینیی بارزانی بە گێڕانەوەی چاپەمەنییەکانی ئێرانی وێنەکێشاوە، لە کۆتاییشدا چەندین نامە و نووسراوەی بارزانی لەگەڵ سەرۆک کۆمارەکانی ئەمەریکا و عێراق و ھەروەھا بە ھەندێک راپۆرت لە بەڕێکردنیی تەرمی بەڕێزیان کۆتایی پێیدێت.
ئەو رۆژنامەنووس و نووسەرە کوردە سەبارەت بە کەڵک وەرگرتن لە سەرچاوەی چاپەمەنییەکانی ئێران بۆ نووسینی کتێبەکە گوتی: لە لێکۆڵینەوە لە چاپەمەنییەکانی ئێراندا سەبارەت بە بزووتنەوەی کوردستان، چەندین گۆڤار و رۆژنامە، لەوانە: کەیھان، کوردستان، کوھستان، ئێران ما، ئەرەس، باختەر، تەرەقی، ئاتەش، ئایەندەگان، مەردوم، خاک و خون، سپید و سیاە، ئاسیای جەوان، ئومید ئێران، خواندنی ھا، تێھران موسەوەر و جیھانی پاک زۆرترین بەشیان ھەبوو و ھەروەھا رۆژنامەی ئیتلاعات بە زۆرینەی بابەت پێگەی یەکەمی لەم کتێبەدا بە خۆی تەرخانکردووە.
وەلەدبەیگی لە کۆتایی ئەم چاوپێکەتنەدا گوتی: لێرەدا بە پێویستی دەزانم سوپاسی محەمەد عەلی جەعفەرییە بەرپرسی دەزگای "نەشری سالس" بکەم بۆ چاپ و بڵاوکردنەوەی ئەم کتێبە.
