Berpirsa karûbarên jinan li eyaleta Sine ya Rojhilatê Kurdistanê eşkere kir ku bikaranîna madeyên hişber di nav jinan de pir zêde bûye û 2 caran qasî rêjeya par bûye.

Li eyaleta Sine ya Rojhilatê Kurdistanê bi taybet li bajarê Sine, rêjeyek mezin ji welatiyan, ji ber sedemên cuda cuda, madeyên hişber bikar tînin û rêjeya bikaranîna madeyên hişber jî roj bi roj zêde dibe.

Berpirsê karûbarên jinan li eyaleta Sine Leyla Ajîr eşkere kir ku nexweşiyên civakî di nav jinan de pir zêde bûye û derbên giran li malbatê dixe.

Leyla Ajîr anî ziman ku yek ji wan nexweşiyan, bikaranîna madeyên hişber e ku li gorî par, rêjeya jinên ku madeyên hişber bikar tînin du caran zêde bûye, ev jî mirov dilgiran dike û ditirsîne.

Ajîr diyar kir ku yek ji sedemên zêdebûna rêjeya bikaranîna madeyên hişber ji aliyê jinan ve, ew e ku jin haya wan zêde ji ziyanên madeyên hişber tine lewma divê sazî û navendên pêwendîdar bi taybet medya û navendên ragihandinê di agahdarkirina jinan de rolek aktîv bilîzin.

Berpirsê Encumena Nehîştina Madeyên Hişber a Sine, Selîm Kerîmî par gotibû, %9ê bikarberên madeyên hişber ên Sine, jin in. Li gorî gotinên Leyla Ajîr û Kerîmî, niha li Sine derdora %20ê kesên ku madeyên hişber bikar tînin, jin in.

Rudaw