Piştî ku Saziya Endambexşînê di roja 01.12.2013’ê de bi awayekî fermî destûra yasayî ji Fermangeha Rêxistinên Sivîl wergirt, di çend mehên borî de 90 kes bûne endamên vê saziyê û biryar dane piştî mirinê endamên laşê wan pêşkêşî xelkê bên kirin.

Saziya Saziya Endambexşînê wek rêxistineke sivîl li Herêma Kurdistanê hatiye damezrandin. Her kesê/a bibe endam, divê 2 forman tije bike, yek ji wan awayê endamtiyê û forma duyem ew e ku pêwist e 5 edamên malbata kesê endam li ser bexşîna endamên laşê wî razî bin, piştre lîjneya pizîşkî bexşîna endamên laşê wî kesî/ê qebûl dike.

Serokê Saziya Endambexşînê ya Kurdistanê Ferhad Mihemd, ji BasNewsê re ragehand ku heta niha 90 kesan biryar daye piştî mirinê endamên laşê xwe pêşkêşî xelkê bikin û form tije kirine. Li gor mercan divê piştî mirina kesê/a endam, aliyên peywendîdar ji aliyê malbata kesê mirî ve bên agahdar kirin û piştre di nexweşxaneyeke taybet de endamên laşê wî bo nexweşekî bên veguhestin ku pêwistiya wan pê heye.

Ferhad Mihemed da zanîn ku her sê parlamentarên Kurdistanê Zana Ebdulrehman, Dr. Rêwas û Heyat Mecîd ligel Rêveberê Kargeha Çîmentoya Silêmaniyê, çend hunermend û rewşenbîrekî forma bexşîna endamên laşê xwe tejî kirine. Herwiha ragehand ku ew kar ji aliyê xelkê ve bi başî tê pêşwazî kirin û hêvî heye hejmareke zêde ya xelkê endamên laşê xwe bibexşin.

Mihemed wiha axifî: ‘‘Ew kar xizmeta mirovahiyê dike û pêwistî bi hişyariya civakî heye, ji ber wê jî me dest bi xebateke pir alî kiriye û roja 13.03.2014’ê bi parlamentoyê re jî axifîn, da proje yasayeke taybet ji bo vî karî pesend bike, wan jî soz dane me. Lê heta niha tu rayedar, wezîr û berpirsên mezin ên hikûmetê biryara endamtiya di saziya me de nedane û mixabin beşek ji wan nizanin saziya me çiye.’‘

Navbirî wiha dirêjî bi axaftina xwe da: ‘‘Heta niha ev kar ji aliyê Wezîrê Tendirûstî, Yekîtiya Zanayên Olî û Desteya Bilind a Fetwayê û beşek ji parlementaran ve bi başî hatiye pêşwazî kirin. Herwiha biryare Desteya Bilind a Fetwayê di daxuyaniyeke nivîskî de girîngiya karê me ji xelkê û raya giştî re rabighîne.’‘

Endamê Desteya Fetwaya Kurdistanê Mihemed Wertî jî bo BasNewsê wiha axifî: ‘‘Li gor baweriya olî divê kesên ku piştî mirinê endamên laşê xwe dibexşin bi rezamendiya wan û mîratgirên wan be. Ligel wan hemû egeran jî beşeke zanayan li ser meselê nerazî ne.’‘

Basnews