Rojhilat – Li Ormiyê şanoya Dewrêşê Evdî tê lîstin
Li gorî agahiyên BasNewsê, ji sibê ve şanoya “Dewrêşê Evdî” li bajarê Ormiyê tê lîstin.
Şanoya han dê hefteyekê li ser dikê û bi kurdî (kurmancî) bê lîstin û ev çend roj in bilîtên wê tên firotin.
Şanoya “Dewrêşê Evdî” ji aliyê derhênerê kurd Resûl Bangî ve hatiye nivîsandin û derhênertiya wê jî dê ji aliyê wî ve were kirin.
Lîstikvanên şanoya “Dewrêşê Evdî” ev in: Elî Bangîn, Şebnem Yûsifî, Ceifer Pakniya, Kêyhan Husênî, Mecîd Dervîşzade
Mûzîka wê jî ji aliyê Riza Hinare ve hatiye çêkirin.
Çîroka Dewrêşê Evdî:
Derwêşê Evdî destaneke kurdî ye. Li gor ku ji dengbêj û lêkolînerên dîrokê tê zanîn, Derwêşê Evdî di sedsala 18an de li herêma Wêranşarê jiyaye û berxwedaneke mezin li dijî Dewleta Osmanî û eşîrên Ereban nîşan dayê. Wê demê Temir Paşayê Milî di sala 1780î de dibê serokê eşîrên kurd ê kîkan, milan û eşîrên êzdiyan li Beriya Wêranşarê û Derwêşê Evdî jî ji bêr jîrekiya xwe dibê serleşkerê Temir Paşayê Milî. Di şerekî sala 1790î di navbera eşîrên Temir Paşayê Milî û Osmanîyên û eşîrên Ereban de Derwêşê Evdî tê kujtin.
Wekî din evîna Derwêşê Evdî, ku bi eslê xwe kurdê êzdî bû û Edûlê ku bi eslê xwe kurdeka misilman bû di nava civaka kurd de tê naskirin. Di nav kurdên de gelek stran û çîrok bi awayên cûda li ser Derwêşê Evdî hatine gotin.
Basnews
