Serokomarê Tirkiyê Recep Tayyîp Erdogan îro li Koşka Serokomariyê ya li Enqerê, pêşwazî li Serokê Herêma Kurdistanê Nêçîrvan Barzanî kir.

Li daxuyaniya Serokomariya Tirkiyê, Recep Tayyîp Erdogan îro Çarşemê, 02/02/2022, li Koşka Serokomariyê ya li Enqerê pêşwazî li Serokê Herêma Kurdistanê Nêçîrvan Barzanî kir.

Peywendiyên dualî

Li gor daxuyaniya Serokomaroya Tirkiyê, di civînê de peywendiyên di navbera Hewlêr û Enqerê de hatin gotûbêjkirin.

Serokatiya Herêma Kurdistanê jî derbarê vê serdana fermî ya Nêçîrvan Barzanî bo Enqerê de daxuyanî da.

Qayîmkirina peywendiyên bazirganî

Li gor daxuyaniyê, di civîna Erdogan û Nêçîrvan Barzanî de, peywendiyên Iraq û Herêma Kurdistanê yên li gel Tirkiyê hatin gotûbêjkirin û tekezî li ser girîngî û daxwaza herdu aliyan a ji bo qayîmkirina peywendiyên bazirganî û aborî hat kirin.

Alîkariya hevbeş, rewşa siyasî ya Iraqê û dawîn pêşhatên li navçeyê bi giştî, mijarên din ên civînê bûn û civîn demjimêr 19.30 bidawî hat.

 

 

Dawî civîna Serokê Herêma Kurdistanê Nêçîrvan Barzanî li gel Serokomarê Tirkiyê Recep Tayyîp Erdogan, Îlona 2020an li Enqerê bû û Nêçîrvan Barzanî di wê serdanê de jibilî, Erdogan li gel Wezîrê Derve yê Tirkiyê Mevlut Çavuşoglu jî civiyabû.

Di wê civînê de jî tekezî li ser pêşxistina liv û tevger û danûstandina bazirganî ya di navbera Herêma Kurdistan û Tirkiyê de hatibû kirin.

Di wê civînê de Serokomarê Tirkiyê amadebûna welatê xwe ji bo her cor “alîkarî û hevkariya” Herêma Kurdistanê ragihandibû û tekez kiribû, “em dê hemû pêdawîstiyên tendirustî û pizîşkî pêşkêş bikin.”

 

 

Rudaw