Hunermenda Kurd, Narîn Feqe piştgiriya xwe bo Hêzên Pêşmerge yên Kurdistanê di şerê li dijî DAIŞ’ê de anî ziman û daxwaza yekrêziya gelê Kurd kir.

Di şerê Hêzên Pêşmerge yên Kurdistanê de li dijî çekdarên Dewleta Îslamî ya İraq û Şamê (DAIŞ), hunermendên Kurd bi awayên cuda piştgiriya xwe bo Pêşmergeyan tînin ziman.

Narîn Feqe di vê derbarê de nameyeke piştgiriyê belav kir ku got: “Ji ber ku Kurdistan di qonaxeke hestiyar re derbas dibe û rewşek aloz niha heye, ez ji dil hêviya serkeftinê bo Hêzên Pêşmerge dixwazim di bergiriya wan de li axa pîroz a Kurdistanê.”

Narîn daxwaz ji gelê Kurd li her çar aliyên Kurdistanê kir ku bibin yek û dest bidin dest hev, ji ber ku dema yekhelwestî û hevgirtina Kurdan e. Hunermenda Kurd bal kişand ser rewşa Şingalê jî û wiha axifî: “Şingal ne bê xwedî ye, Şingal rûmeta Kurdistanê ye. Her bijî Kurd û her bijî Kurdistan.”

Basnews