ئەمڕۆ یەکشەممە 19/1/2025، مەسرور بارزانی، سەرۆکی حکوومەتی هەرێمی کوردستان بەسەردانێکی فەرمی گەیشتە ئوردن و لەگەڵ شا عەبدوڵلای دووەم، شای شانشینی ئوردەن کۆبووەوە و لە دیدارێکدا گفتوگۆ لەبارەی پەرەپێدانی هاریکاری و هاوئاهەنگیی نێوان ئوردن و هەرێمی کوردستان و دەرفەتەکانی فراوانکردنی لە بوارە جیاوازەکاندا کرا.

هەروەها لای خۆیەوە شا عەبدوڵڵای دووەم، سڵاو و ڕێز و پێزانینی خۆی بۆ جەنابی سەرۆک مەسعود بارزانی دەربڕی.

هەر لە دیدارەکەدا لە جەخت لە گرنگیی پتەوکردنی پەیوەندیی دۆستانەی ئوردن لەگەڵ هەرێمی کوردستان و عێراق لە هەموو بوارەکاندا کرایەوە.

هەروەها سەرۆکی حکوومەت هەوڵەکانی شانشینی هاشمیی ئوردنی بە ڕێبەرایەتی خاوەن شکۆ شا عەبدوڵڵای دووەم، بۆ بەدیهێنانی ئاشتی و سەقامگیری لە ڕۆژهەڵاتی ناوەڕاست، بەرز نرخاند.

سەبارەت بە بارودۆخی سووریاش، سەرۆکی حکوومەت دووپاتی کردەوە کە ئاسایش و سەقامگیری سووریا، بۆ سەقامگیریی ناوچەکە زۆر گرنگە و هەروەها جەختی لە گرنگیی بەردەوامبوونی ڕێککەوتنی ئاگربەست لە کەرتی غەززە و گەیشتن بە ئاشتییەکی گشتگیر لە سەرتاسەری ناوچەکەدا کردەوە.