پێویستە هەمووتان پەند و وانە لە هەڵوێست و كردەوە و قوربانییەكانی پێشەوای گەلی كوردستان ژەنەڕاڵ مستەفا بارزانی وەربگرن، كە بێ بەرانبەر هەموو ژیانی لە پێناو داكۆكیكردن لە ماف و بەرژەوەندییە ڕەواكاندا بەسەر برد، ئەو دەیزانی نیشتمانخوازیی ڕاستەقینە و كاركردن لەپێناو گەل و بەهێزكردنی ئینتیما بۆ كوردایەتی، تەنیا بە گوتار نایەتە دی، هەروەها بە قسەو پێداهەڵگوتنی ڕازاوە و بریقەدار نییە، بەڵكو ڕەفتار و كردارە.

 

 

ئیدی با بەس بێت باسكردنی هەڵوێست و قوربانیدان و كردەوەتان لە ڕابردوودا، میللەت لەو چیرۆك و سەربوردانە تێر بووە، دەبێت ئەوە بزانن كە ئێوە لە گۆڕەپانی خەباتدا بە تەنیا نەبوون، بەڵكو هەموو گەلی كوردیش لەگەڵ ئێوە بووە، ئەوانیش قوربانییان بە هەموو شتێكی پیرۆزی خۆیان داوە.

ئەوە گرنگ نییە گەنجێك بڵێت من لە ڕابردوودا چۆن بووم، یان باوكم لەپێناو گەلدا قوربانیی داوە، گەلی كورد كردەوە و دەستكەوتی لێتان دەوێت بۆ بنیادنانی كۆمەڵگەیەكی پتەوی ئازاد و یەكگرتوو لە سایەی سیستەمێكی دیموكراسیی پاك و بێگەرددا.

ئەو نەوەیەی ئێستا هیچ پەیوەندیی بەو كردەوە و شتانەوە نییە كە ئێوە لە ڕابردوودا ئەنجامتان داوە، كێشە سیاسی و ناكۆكییەكانتان مەخەنە ئەستۆ و سەرشانی گەلی كورد، لە قەبارەی مەترسییەكانی دەوروبەری هەرێمیش زۆر زێدەڕۆیی مەكەن، چونكە سیستمە دیموكراسییەكان سیستمگەلی پارێزبەندن، گەلەكانیان پارێزگارییان لێ دەكەن، بۆیە هەرگیز هەرەس ناهێنن و پارچە پارچە نابن، مەگەر لە حاڵەتێكدا كە گەلەكانیان وازیان لێ بهێنن.

دوژمنانی دەرەكی ناتوانن نیشتمانێكی ئازاد پارچە پارچە بكەن، ئەگەر هەلومەرجی خودی و بابەتییان لەبەر دەست نەبێت، چونكە هەڵوەشاندنەوەی ژێرخانی كۆمەڵایەتی و لەدەستدانی بەها نیشتمانییەكان و گیانی قوربانیدان بە هۆی بڵاوبوونەوەی گەندەڵیی دارایی و ئیدارییەوە، هەروەها پارچەپارچەبوونی نیشتمان بۆ دەرەبەگایەتیی سیاسی، ئەمانە هۆكارن بۆ ڕووخانی سیستمە سیاسییەكان و دواجار كۆنتڕۆڵكردنیان لەلایەن دوژمنانەوە.

- لەوەتەی دوای ڕاپەڕینە میللییەكەوە دەسەڵاتتان گرتووەتە دەست، ڕۆڵی هەندێك لە سەركردایەتیی سیاسی و كۆمەڵایەتیی كوردستانی بریتی بووە لە لەبەریەك هەڵوەشاندنەوەی تەبایی و درزخستنە نێو یەكگرتنی ڕیزەكانی میللەتەوە، جگە لە گورزوەشاندن لە گیانی ئەو قوربانییەی كۆمەڵگەی كورد و داكۆكیكردنی لە دەستكەوتەكانی ڕاپەڕین، كە ئەمە ئەوپەڕی وەلائو قوربانیدان و دڵسۆزی بوو بۆ كوردستان، بەڵام ئەوەی دوای چەند مانگێك ڕووی دا، بە هۆی پابەندبوون بە بەرژوەندیی تەسكی حزبایەتی و بەرژەوەندییە تاكە كەسییەكان، ئەویش دابەشكردنی كوردستان بوو بۆ زۆن و كەرت، كە تەنیا شەڕی ناوخۆی بە دوای خۆیدا هێنا.

- نیشتمانخوازیی ڕاستەقینە و كاركردن لەپێناو گەل و بەهێزكردنی ئینتیما بۆ كوردایەتی، تەنیا بە گوتار نایەتە دی، هەروەها بە قسە و پێداهەڵگوتنی ڕازاوە و بریقەدار نییە، بەڵكو ڕەفتار و كردارە، پێویستە هەمووتان پەندو وانە لە هەڵوێست و كردەوە و قوربانییەكانی پێشەوای گەلی كورد «ژەنەڕاڵ مستەفا بارزانی» وەربگرن، كە بێ بەرانبەر هەموو ژیانی لە پێناو داكۆكیكردن لە ماف و بەرژەوەندییە ڕەواكاندا بەسەر برد.

- بێگومان هەمووتان چاك دەزانن كە سەركردە تێكۆشەرەكان هەرگیز باسی قوربانیدانی خۆیان ناكەن و ناشیكەن بە منەت بەسەر خەڵكەوە، چونكە گەل خۆی ڕێز لە ڕابردووی سەركردە دەگرێت و قوربانییەكانی لەبەرچاو دەگرێت، ئەمەش كە هەموو كاتێك لە ڕەفتاری خەبات و تێكۆشانی خۆی بەردەوام دەبێت، تەنانەت دوای ئەوەی دەسەڵات دەگرێتە دەست، چونكە كاتێك دەبینین كە خەباتگێڕی ڕاستەقینە لەپێناو گەلدا دەستبەرداری قوربانیدان نابێت، ئەو كاتە گەل ناوی بەرز ڕادەگرێت، تەنانەت دوای كۆچی دواییشی هەر یادی دەكاتەوە، هەر وەك ئەمڕۆ دەبینین چۆن یادی شەهیدان و سەركردە مەزنەكانمان دەكەینەوە لەسەروویانەوە پێشەوا و سەركردەی گەلی كوردستان ژەنەڕاڵ مستەفا بارزانی.

- كاتێك سەركردەی حزبی، یان بەرپرسێكی حكوومی قوربانییەكانی گەلەكەی پشتگوێ دەخات، یان دەسەڵاتەكەی خۆی بۆ خزمەتی بەرژەوەندیی تایبەتی و بنەماڵەكەی بەكار دەهێنێت، ئەو كاتە كۆمەڵگە هیچ گرنگی و بایەخێك بە ڕابردوو و قوربانییەكانی ئەو سەركردەیە نادات، تەنانەت لەسەر ڕەفتار و هەڵسوكەوت و كردەوەكانی ئێستای لێپرسینەوەی لەگەڵدا دەكات، نەوەی تازە و تەنانەت كۆنیش، سیستمێكی حوكمڕانیی دەوێت، كە كار بۆ خزمەتكردن و دابینكردنی ئایندەی بكات، سیستەمێكی ناوێت كە ببێتە موڵكی كۆمەڵێك دەستڕۆیشتوو كە تەنیا كار بۆ بەرژەوەندییەكانی خۆیان دەكەن و بە قوربانی و قارەمانێتییەكانی ڕابردوویان منەت بەسەر گەلەوە دەكەن.

- سوودی چییە ئەگەر شانازی بە ڕابردووی دێرینەوە بكەن، گەل دەیەوێت سەركردە سیاسی، یان كارگێڕییەكان ببینن، كە توانای ئەوەیان هەبێت نەخشە دابڕێژن و دیدگەیان بۆ ئایندە بەو شێوەیە بێت كە چارەنووسی گەلەكەیان دیاری بكەن، بۆ بنیادنانی كۆمەڵگەیەكی ئازاد و بێگەرد كە ژیان و گوزەرانێكی شایستە بۆ ڕۆڵەكانی فەراهەم بكەن.

- ئەوەی هەندێ حزبی سیاسی پەیڕەوی دەكەن، كاتێك دێن سەنگەر لە یەكدی دەگرن بۆ دەرخستنی هەڵە و كەموكووڕییەكانی یەكدی، یان گلەیی و گازاندە و ڕەخنەی توند دەگرن، یانیش بەڵێنی ناڕاست و چەواشەكار دەدەن، تەنیا گازاندە لە حكومەت دەكەن، هەرچی هەڵە و كەموكوڕییەكان هەیە، دەیانخەنە ئەستۆی حكومەتەوە، جگە لەوەی تانە لە دەستوورییەتی دامەزراوەكانی هەرێم دەدەن، هاوكات دێن دەستبەرداری هەموو دەستكەوتەكان دەبن، وەك هەندێ ڕەفتاری چینی حوكمڕانی ئەندەلووس وایە كە هۆكار بوون بۆ هەرەسهێنانی حوكمڕانیی ئەمەوییەكان لەو وڵاتەدا.

- ویژدان بكەن بە حەكەم و خوێنی شەهیدان لە بیر نەكەن، بە هۆش خۆتاندا وەرنەوە، كار لە پێناو بنیادنانی كۆمەڵگەیەكی پتەو و یەكگرتوو بكەن، هەندێك واز لە بەرژوەندییە تایبەتییەكانی خۆتان بهێنن، چونكە سیستمە سیاسییەكان بە هۆی گەندەڵییەوە هەرەس دەهێنن، تەنیا گەندەڵكار و هەلپەرستان پێی دەحەسێنەوە، هاووڵاتیانیش لە ژیانێكی ئاسوودە بێبەش دەبن.

- جام كە پڕ بووە و وا لێی دەڕژێت، پرسیارتان لێ دەكەم، وەڵامەكەش لای ئێوەیە، ئایا سەنگەر لە یەكدی گرتن و تۆمەت بەخشینەوە و هەوڵدان بۆ ئەوەی بەرپرسیارێتییەكە بخرێتە سەر شانی بەرانبەر، جگە لەوەی مانۆڕكردنە لەگەڵ دوژمنانی گەلی كورد و هەوڵدان بۆ هەڵوەشاندنەوەی دامەزراوە دەستوورییەكان لە هەرێمی كوردستان، ئەمانە هەموویان خزمەت بە گەلی كوردستان دەكەن؟ ئایا ناتوانن ڕووبەڕووی ڕاستیی مەترسییەكان ببنەوە كە ڕوویان لە هەرێمەكان كردووە، یان هەر لەژێر پەردەدا خۆتان حەشار دەدەن بۆ ئەوەی ڕاستییەكان بشارنەوە؟

بەڕێزان. تا ئێستا ئێمە لە نێو یەك كەشتیداین، ئەگەر كون بێت هەموومان پێكەوە دەخنكێین، بەمەش مێژوو هەتا هەتایە نەفرەتمان لێ دەكات.