گەڕانەوە بۆ مێژوو
هیوا ئەحمەد مستەفا
(مسعود بارزانی)ـیم بینی لە (ڕوسیا) چۆتە زیارەتی ئەو شوێنەی سەرۆكی نەتەوەیی كورد (مەلا مستەفای بارزانی) لێی ژیاوە، ناچار بووم ئەم چەند دێڕە بنووسم، ئاخر (مستەفا بارزانی) مێژووی دروست كرد، دوای ئەوەی لە كوردستانی باشور شۆڕشی بارزان نەیتوانی ئامانجە سیاسیەكانی خۆی بە ئەنجام بگەینێ، ئەو كات (بەریتانیای مەزن) دەستەڵاتی عێراقی بە كردەوە لەدەست دابوو و حوكمی پاشایەتی دەستكرد لە عێراق دا پیادە دەكرا، بارزانی، زانی لە ڕۆژهەڵاتی كوردستان واتە بە دیاریكراوی لە (مهاباد) قازی محمد و شۆڕشگێڕانی ئەوێ پێویستسان بە خۆی و هێزی شۆڕشگێڕی چەكداری كوردە بارزانییەكان دەبێ، لەژێر ڕابەرایەتی (شێخ ئەحمەدی بارزانی) رەحمەتی برا گەورەیدا گەیشتە مهاباد، (مستەفا بارزانی) لەبەر ئەوی جێگەی بڕوای سەد لە سەدی كۆماری كوردستان بوو بۆیە بوو بە (جنڕال) لە هێزی كۆماری كوردستان دا و بە كردەوە ڕابەرایەتی لەشكری شۆڕشگێڕی كوردستانی دەكرد، دوای ئەوە، ڕوسیای ئێستا و سۆڤیەتی ئەوكات، لە پێناو گەیشتنی بە هەندێ بەرژەوەندی ستراتیجی ئابوری ژێر زەوی لەگەڵ دەوڵەتی شاه بە تایبەتی (قوام السلطەنە) ئەوكات كە بەلێهاتوویی خۆی ڕوسیەكانی فریودا، ئیتر ڕوسیەكان (سۆڤیەتیەكانی) ئەوكات پشتیان لە كۆماری كوردستان و كۆماری ئازەربایجان كرد و دەستی شای ئێرانیان كردەوە بۆ ئەوەی پاشماوەی هێزەی چەكدارەكانی دوای جەنگی جیهانی دووەم كۆبكاتەوە و پەلاماری ئەو كۆمارە بدات.
لە كۆماری مهاباد بە تایبەتی بەرەی (سەقز) كە بارزانییەكان لەوێ بوون شەڕێكی هێندە سەخت و خوێناوی كرا، پێشمەرگە بارزانییەكان ئەوەندە خەڵكیان لە ئەرتەشی شای ئێرانی گۆڕبەگۆڕ كوشت، ئەگەر ئەو شەڕەی بارزانییەكان لەو بەرەیە كردیان پێشمەرگە و عەشایری كوردستان لە گشت بەرەكانی شەڕ ئەو بەرنگاری و قارەمانێتی و فیداكاریانەیان ئەنجام دابا، كۆماری كوردستان بەو دەردەی كە دەیبینن نەدەچوو، بە شێوەیەك لە شێوازەكانی چارەنووسی كۆمار و قازی محمدیش دەگۆڕا.
سەرئەنجام ئەرتەشی ئێران دوای شەڕی سەختی بارزانیەكان مهابادیان داگیر كرد و قازی محمدیان لە سێدارەدا.
بارزانی و بارزانییەكان، كە زۆربەیان ژن و مندالیشیان لەگەڵدابوو، لەسەر ڕێنمایی شێخ ئەحمەدی بارزانی، شێخ ئەحمەد و ماڵ و مناڵ و ژن گەڕانەوە بۆ عێراق و (مەلا مستەفا) خۆی نزیكەی (512)كەسی لە هاوەڵانی، ڕێگای سەختی نادیاری گرتەبەر و بەرەو ڕوسیا رۆیشتن، ئەو ڕۆیشتنە هەر بە قسە و نووسین خۆشە، ئێستا بە هەر یەكێك لە ئێمە پێمان بڵێن دەبێ (6)سەعات بە پێ بڕۆی ئایا بۆمان ئاسانە؟! خوێنەر با كەمێك وەرزش بكات ئینجا ئەو دیمەنە بێنێتە بەر چاوی خۆی دەیان ڕۆژ و شەو ڕۆیشتنی بە شاخ و كێودا، بە پێی پێخواس و بە برسیەتی و بە شەڕ لەگەڵ (ئێران + توركیا + عێراق) پاشان پەڕینەوە لە ڕووباری سەرسەخت و بە تەوژم و بە لێشاوی (ئاراس) بۆ ئەوەی بگەنە خاكی ڕوسیا هێندە ئاسان بووە؟
بێگومان نەخێر، (مەلا مستەفا) و هێزە شۆڕشگێڕەكەی تەنها یەك هیوایان هەبوو، ئەویش هیوای ئەوەی ڕۆژێك دێ ئازادی كوردستان، ئەگەر بۆ خوودی خۆشیان نەبێ، بۆ ڕۆلەكانی نەتەوەی كورد بە دەست دێنن، وەیان لایەنی كەم (مێژوو)ی نەتەوەكەیان ئەو نەبەردی و سەربەرزی و قارەمانێتی یەی ئەوان لە بیرناكات و بە نەمری دەگێڕێتەوە.
دوای پەڕینەوە لە (ئاراس) و گەیشتنی بە خاكی ڕوسیا حكومەتی ئەوكاتی سۆڤیەت بارزانیەكانی لێك پەرت و بڵاو كرد بەشی زۆریان بە زەحمەت یەكتریان دۆزیەوە و لەو كاتانە (مستەفا بارزانی) ڕابەر بەردەوام زەختی لە حكومەتی سۆڤیەت و لە مەكتەبی ستالین دەكرد كە دەیەوێ لەگەڵ پێشمەرگەكانی بە یەكەوە هەموویان كۆببنەوە و پێكەوە بژین، وە جگە لەوەش چەندین یاداشت نامەی دەدا بە سۆڤیەتی زڵ هێزی ئەو كات كە بە شەڕ كورد ناتوێتەوە و باشترە هاوكاری كورد بكەن بۆ گەیشتن بە مافی ڕەوای خۆی.
(12)ساڵی خشت بەڵێ (12) ساڵ هەر بە قسە خۆشە، هەر ساڵێك (365)ڕۆژە هەر ڕۆژێك (24) سەعاتە، دابڕان لە ژیان و لە دایك و باوك و خوشك و برا هێندە ئاسان بوو؟!
ئەوكات تەكنەلۆجیا وەك چارەگی چارەگی ئێستاش نەبوو، ئێستا ئەوانەی ڕۆلەیان لە دەرەوەی وڵاتە، وەك بەر لە (15) ساڵ لەمەو بەر ناڕەحەتن؟ بێگومان نەخێر (15)ساڵ بەر لە ئێستا كوا تەلەفۆن و ئامێری بێتەل و تەكنەلۆجیا وەك ئێستا بوو؟
ئەی ئەبێ (60 – 70) ساڵ لە مەو بەر چۆن بووبێ؟ نەتەوەی كورد لە كوردستانی (عێراق + ئێران + توركیا + سوریا) بەگشتی، چیڕۆكی ڕۆیشتنی بارزانی و هاوەڵانیان دەزانی و وەك داستانی گەورە، گەورەی مێژوویی دەیان لاوك و حەیران و هەڵبەستیان بۆ بارزانی دەووتەوە و هەموو ماڵ منداڵ و گەورە و بچووكی كوردستان بە تایبەتی و ئازادیخوازانی گەلانی تریش، بارزانیان وەك ڕەمزی نەتەوەی كورد ناسی و بوو بە ڕەمزی بەرەنگار بوونەوە و فیداكاری و قارەمانێتی، نەتەوە ژێر دەستەكان و ئەو ڕێ ڕۆیشتنەی بارزانی بە هەمان مەسیرە و ڕێ ڕۆیشتنی(ماتسی ئۆنگ)ـی ڕابەری چینیەكان وەسف دەكرێ.
مستەفا بارزانی دوای (12)ساڵ لە دابڕان و نەبوونی هیچ هەوالێكی راستەوخۆ لە ناوەوەی وڵات، لەدوای شۆڕشی (14)ـی تەمموزی (1958) كە خوالێخۆش بوو عبدالكریم قاسم حوكمی پاشایەتی و كۆلۆنیالیستی بەریتانی ڕوخاند، ئیتر ئەو كات وەك ئازادیخوازێك لێبوردنی گشتی دەركرد و ئازادی حیزبە سیاسیەكان هاتە ئاراوە و (پارتی دیموكراتی كوردستان) مۆڵەتی یاسایی وەرگرت و ( مستەفا بارزانی) و هاوەڵەكانیشی بە كەشتی تایبەتی لە ڕوسیاوە دوای سەردانی (جەمال عبدولناصر)ی سەرۆكی نەتەوەی عەرەب و میصر لە (6/10/1958) گەیشتەوە عێراق.
عێراقیەكان بە كورد و عەرەب و توركمان و كلدان و ئاشوری و ئەرمەنی یەوە ملیۆنان كەس ئاهەنگیان بۆ بارزانی و هاوەڵانی گێڕاو و گەڕانەوەی ئەو بوو بە فاكتەری برایەتی كورد و عەرەب و نەتەوەی تر.
ئەگەر بۆ ئێمەی تاكی كورد گەڕانەوەی ئەو مێژووە سەرمەستمان بكات دەبێ بۆ كەسێكی وەك هێژا (مسعود بارزانی) و نەوەكانی، چەند دیمەنێكی سەرنج ڕاكیش بووبێ؟ دەبێ ئەوكاتەی كاك (مسعود بارزانی) چۆتە شوێنی دانیشتن و حەوانەوەی جەنەڕالی مەزنی نەتەوەكەمان چ هەستێك لە ناخی كۆرپەیەكی مناڵی ئەوكات و مندال كارێكی كاتی هاتنەوەی باوكی و پێشمەرگەیەكی شوێن كەوتووی ڕابەرێك و میراتگرێكی سیاسی و ڕۆحی، بارگران لە دەروونی ئەو زاتەدا خولقا بێ؟ كە دونیایەك جەنجاڵی و ناپەسەندی و ئاوەژوو بونەوەی ئاكاری كاری مرۆڤەكان، كە تەنیا بۆ مەرامی سیاسی ناحەزان مێژوو دەشێوێنن و دایگرتبێ؟! بەڵام هەر ڕاستیەكان سەردەكەون ئەویش بە ئارامی.
