لە وتاری پێشوودا، بە كورتی ئاماژەم بۆ حیكمەت و مەعریفەتی ڕیشەداری خەڵكی میسر كرد، كە لە بنەڕەتەوە كەلەپووری لێكقەبووڵكردن و پشوودرێژی و خۆڕاگری و دان بەخۆڕاگرتنی خوڵقاندووە.
چەند رۆژی هەوەڵی لێدەرچێ كە ئاڵۆزی و توندوتیژی و كوشتار و برینداربوونی ئاوێتەبوو، ئیتر لە دوو هەفتەی دواییدا راپەڕینی گەنجانی میسر بە هێمن و ئارامی و رێكوپێكی بەڕێوەچوو، سوپا و هێزە ئەمنییەكانیش كەوتنە پاڵ بزووتنەوەكە، سەرۆكایەتی سیاسی و حكومەتی میسریش دانی بەخۆیاگرت و كەوتە دیالۆگ و لێكۆڵینەوە تا رێگە چارەسەری دەستوورییان دۆزییەوە و كەوتنە بواری جێبەجێكردنەوە.
تا ئێستا واپێدەچێت كە رێگەش لە بزوتنەوەی(ئیخوان موسلمین) و هێز و گرووپە توندڕەوەكان بەستراوە، جووڵەی چاكسازیی بەئارامی بەرەو سەركەوتنی دیموكراسی و دادپەروەری و ئاشتی گشتیی و كۆمەڵایەتی دەڕوا، كە لەمەودا قۆناخی هەرە زەحمەت دێتە پێش، ئەویش چۆنییەتی وەڵامدانەوەی خواست و داخوازیی كۆمەڵایەتی و پیشەیی كرێكاران و هەژاران و بێكاران و توێژە بەشخوراوەكانە.
چاكسازییە دەستوورییەكان بە ڕووتبوونەوەی حوسنی موبارەك لە زۆربەی دەسەڵاتەكانی(بەڵكو لە واقیعدا هیچ دەسەڵاتێكی واقیعی بەدەستەوە نەما) ڕێگە بۆ گۆڕانكاریی فراوانی هەردوو بواری سیاسی و كۆمەڵایەتی خۆشدەكەن.
لە ڕووی سیاسییەوە: بۆ ئامادەسازیی زەمینەی هەڵبژاردنی ئازاد و پێكهێنانی دامودەزگای دیموكراتی، لە ڕووی كۆمەڵایەتیشەوە: بۆ چاككردنی باری گوزەرانی ژیان و كەمكردنەوەی بێكاری، چارەسەری گرفتی چینی لاوان و خوێندكاران و كرێكاران.
دەشبینین كە بە درێژایی ئەم دوو سێ هەفتە هەرە دژوار و ئاڵۆزەی خەڵكی میسر كە پتر لە هەشتا ملیۆن كەس دەبن، هەموو لایەكیان: گەنجان و ئۆپۆزسیون و حكومەت و سوپا، «بونیاتی دەوڵەتیان» پاراست و نەیهانهێشت زیان بەر كەیان و رۆحی دەوڵەتەكەیان بكەوێت.
ئەگەر ژمارەیەك قوربانی و زیانی ماددی لێدەربكەین، ئیدی دەتوانین بڵێین كە، تا ڕادەیەكی بەرز، گەل و دەوڵەتی میسر بە سەلامەتی لەم قەیرانە دەرباز بوونە، هەر چەندە هێشتاش ماویەتی، بەتایبەتی ململانێی سیاسی هێزە ئۆپۆزسیۆنەكان لەنێوان خۆیاندا.
دەسەڵاتی لەپێشە، هەر بۆیەش (ئیخوان موسلمین) لەلایەك و هێزە علمانییەكان و جەماوەری خەڵك لەلایەكی دیكەوە، دەكەونە پێشبڕكێ بۆ گەیشتن بە دەسەڵات.
كەواتە: ئەگەر خۆنیشاندان و قەڵەباڵغی شەقام و بازاڕەكان بەو چاكسازییە دەستوورییانە ببڕێتەوە ئەوە ململانێی توند بەرەو(3) بواری سیاسی و كۆمەڵایەتی دەگوێزێتەوە.
1- هەوڵدان بۆ وەرگرتنی دەسەڵاتی داهاتوو، كە مایەی بەرزبوونەوەی ململانێی هێزە ئۆپۆزسیۆنەكان و توێژو چینەكانی كۆمەڵگەیە.
2- بەرزبوونەوەی داخوازیی كۆمەڵایەتی پیشەیی كرێكاران و هەژارانی شارو دێهات و توێژە جیاجیاكانی كۆمەڵگای میسر.
3- مافی كەمایەتییە ئایینی و نەتەوەیی و كەلتوورییەكان، مەسیحییە قیبتییەكان خۆیان رێكدەخەن بۆ داوای مافی فراوانی نەتەوەیی و ئایینی و كەلتووری، كە نزیكەی 8-9 ملیۆن كەس دەبن و خاوەن توێژێكی بەرزی ڕووناكبیر و شارەزا و پسپۆرن، دەیانەوێ لە دەوڵەت و سیاسەت و كۆمەڵگادا رۆڵی بەرزتریان هەبێ.
هەروەها ماف و داخوازیی بەهایی و شیعە و ئەمازیغ و چین و توێژی بەشخوراوی دیكە هەنە كە ئازادییان دەوێ، ڕەنگە مەسیحییەكان و ئەم كەمایەتیانە ئەنجوومەنێكی باڵای فرەلایەن پێكبهێنین بۆ ڕێكخستنی داواو مافەكانیان.
واتە: دەرگای چاكسازیی لە چەندین لاوەخراوەتە سەرپشت.
لە دەرەنجامێكی كورتتدا دەڵێم: كە براوە، عەقڵ و حیكمەت و مێژووی میسر بوو، دەشبینین كە ڕۆحی شارستانیی دێرینی میسر دەبووژێتەوە و چەند ساڵی دیكە وڵاتێكی جیاواز بەناوی میسرەوە دەبینین.
تێبینیەك دەمێنێتەوە سەبارەت بە تەمەڵی و ڕارایی ڕۆحیەتی نیگەتیڤی دواخستنی كاری ئەمڕۆ بۆ سبەینێ، كە خەسڵەتی زۆربەی حوكمڕانان و خەڵكی رۆژهەڵاتە.
لەمە بەدواوە جەدەل و لێكوڵینەوەی زیاد دەربارەی راپەڕین و ئەنجامی ڕووداوەكانی میسر دەكرێت، هەیە دەپرسین:
چ دەبوو ئەگەر رۆژێك زووتر ئەو چاكسازییانە ئەنجام بدرابان؟! خۆ دەتوانرا 10-15 ساڵ زووتر بكرابان؟
زیاتر لە شەش ساڵە بڕیاردراوە عومەر سولەیمان بە جێگری حوسنی موبارەك دابنرێت، بۆچی دواكەوتن لەم بڕیارە؟ ئەگەر زووتر دەسەڵاتی چاكسازی بەعومەر سولەیمان یا هەر جێگرێكی دیكە بدرایا ئەوە هەموو ئەو قوربانی و زیانانەی پێویست نەدەبوو؟
دیارە گۆڕانكاری یاسای ژیانەوە ، لەم سەردەمەدا رەوتی خێراتری وەرگرتووە و رای گشتی نێودەوڵەتیش پشتی دەگرێ.
كەوابێ، ئەزموونی میسر باشترە ببێ بە پەند و وانە بۆ حوكمڕانانی رۆژهەڵات، تا بەدەستی خۆیان چاكسازی بكەن لە جیاتی ئەوەی ناچار بكرێن!
ئەزموونی بەرزی میسر، لێكۆڵینەوە و وردبوونەوەی زیاد هەڵدەگرێ.