(عەبدولڵا گویل) سەرەك كۆماری توركیا گۆرانی كوردیی(ئاگر كەتییە دلێ من) لەگەڵ گۆرانیبێژی ئەرمەنی(بەدری ئەیسەلی) دەڵێتەوە.
دوو نیشانە بە بەردێك. گۆرانییەكی كوردی و هونەرمەندێكی ئەرمەنی...
لەگەڵ سەرۆك گویل لە ئامەد(دیاربەكر) یەكدەگرنەوە، وەكو بڵێی دەوڵەتی توركیا بیەوێ بڵێ كە وەختی هاتووە دەرگای داخراوی ئاشتبوونەوەی گشتی بكرێـتەوە، تا ئەم سێ نەتەوەیە: كورد و ئەرمەن و تورك بتوانن بە ئارامی و دڵنیایی پێكەوە لەگەڵ گەلانی دیكە درێژە بە ژیان بدەن.
لە توركیادا، هەر لە وەختی دەوڵەتی عوسمانییەوە، مێژوویەكی سەختی پڕ لە مەینەت و خوێنڕێژی و خەفەت رابردووە، خۆ دەبێ لە خاڵێكەوە ئیتر ئەو تراژیدییایە رابگیرێ و ئاسۆیەكی نوێ بكرێتەوە.
یەكەم هەنگاڤ ئەوەیە یەكتر قبووڵبكەن، بە فەرهەنگ و زمان هەبوونی یەكدییەوە.
چی لەوە باشتر كە لە هونەرەوە دەستپێكەن؟!
هونەر و فەرهەنگ هەمیشە سادەترین و،لە هەمان كاتدا، گرنگترین پردە لەنێو گەلاندا، كەوابێ گۆرانیی(ئاگر كەتییە دلێ من) كلیلی دەسپێكی ساڕێژبوونەوەی(كول و دەردانە). بە كرداری چاك دەبێ بڵێین چاكە و، دەستان نەڕزێ.
تا دوێنێ هونەرمەندان، بەڵكو مێردمنداڵانی كوردیش، لەبەر گوتنەوەی گۆرانی و سروودی كوردی دەسگیر و سزاش دەدران. ئەشكەنجەشیان دەچێژی.
ئێستا سەرۆك گویل بە زاری خۆی گۆرانی خۆشی كوردی دەڵێتەوە، وەكو ئەوەیە پەیامی هاوچەرخ بۆ گەلی كوردی بنێرێ، ئەویش لە باژێری دیرۆكیی ئامەدا، كە كورد هەر هەبووە و، زمان و موزیك و كەلەپوور و تایبەتمەندیی خۆی هەیە.
گویل، لەسەرەتاوە بە گەرمی پشتیوانی كردنەوەی كەناڵی(TRT6)ی بە زمانی كوردی بووە و بەرامبەر بەو لایەنەی ناو دەوڵەت و كۆمەڵگەی توركیا، كە ویستوویانە كەناڵەكە دابخرێت، بەرگریی لە مانەوە و بەردەوامبوونی كردووە.
خوالێخۆشبوو توركوت ئۆزال، سەرۆكی پێشووی توركیا كە ساڵی 1993 كوتوپڕ ماڵاوایی لێكردین، دەسپێشخەری كرانەوەی ئاشتیانەی دەوڵەت و حكومەتی توركیایە بەرامبەر بە نەتەوەی كورد و دۆزە رەواكەی.
چڕینی گۆرانیی كوردی(ئاگر كەتییە دلێ من) سومبولی پەیامێكی نوێیە كە بەم گۆرانییە دەریبڕیووە، وەلی رەنگە سەدان لاپەڕەی نووسین و شیكردنەوە، وەك ئەم گۆرانییە بە دەنگی هونەرمەندی ئەرمەنی لە ئامەدی پایتەختی دیرۆكی كورد، كاریگەری خۆی بە جێنەهێڵێت، ئەوە رێگەیەكی ئەزمووندارە بۆ چەسپاندنی دۆستایەتی كورد و تورك و گشت گەلان. بەر لە چەند مانگیش وەزارەتی كەلتووری توركیا دوو هەزار و پێنجسەد دانەی دیوانی (مەم و زینی) ئەحمەدی خانی فەیلەسوفی هزری كوردی لە چاپدایەوە و دایبەشاند، كە لە ساڵی 1923ـەوە چاپ و بڵاوبوونەوەی ئەم دیوانە، لە توركیا قەدەغە بووە.
دیارە هێڵە سوورەكان، وەك دیواری بەرلین، یەك لە دوای یەك، دەڕوخێن و پەنجەرە و دەرەكان بەڕووی سروەی شارستانیی سەردەم بۆ نێو كۆمەڵگەی تورك و كورد دەخرێنە سەرپشت.
رووناكبیران و خەڵكی كورد، بە ئومێد و خۆشباوەڕییەوە، دەڕواننە ئەو بزاڤە كەلتوورییانە، كە چاوەڕانن لە بواری رامیاری و كۆمەڵایەتی و دەستووریش رەنگبدەنەوە.
دیارە رێگەكە هەمووارنییە، كەندولەند و تەگەرە لە پێشدا هەنە و دەمێننەوە نەیارانی گەلی كورد مینی زیادیان ناشتووە و بۆسەی جۆر بەجۆریان ناوەتەوە.
وەلی رێڕەوی كرانەوەی ئاشتیانە و پێشڕەوتی مەسەلەی میللی كورد هەر دەبێ بەسەر مەنزڵ بگەن، لێرەدایە كە كورد دەبێ بەرامبەر هەر هەنگاڤێكی كرانەوە، چەندین شەقاو بنێ و، بە گەشبینییەوە رووبەڕووی پێشهاتەكان ببێتەوە و، دەس بە بڕواو ئومێدەوە بگرێت. واتە: كورد نابێ هەر چاوەڕوانی هەنگاڤی پۆزەتیڤانەی بەرامبەرەكەی بێ، كە گەل و دەوڵەتی توركیایە، بەڵكو دەبێ كورد بەخۆیشی گەشبین بێ و پێشوازی لە ئاشتی و ئازادی بكات و، دەسپێشخەریی خۆێ بنوێنێ.
بەردەوامبوون و پاراستنی دۆخی ئاگربەسی نێوان هەردوولا لە توركیادا وەڵامێكی پۆزتیڤی گونجاوی بارودۆخەكەیە، كورد دەبێ هەنگاڤی گەورەتر بچێتە پێش تا ئاگربەسی كاتیی ئێستا ببێ بە ئاگر بەسی سەقامگیر و ئاشتی هەمیشەیی تا بە ئازادی و سەربەرستی گۆرانییەكان بچڕنەوە و هیوا جوانەكان سەوزببن.
دەمخۆش سەرۆك گویل!