نەك بۆ ترسناندن یا دوودڵی خستنەوە، بەڵكو بۆ وریابوون و هۆشداری دبێژم: رووداوە چاوەڕوانكراوەكان وەكو خۆیان ببینین، تا ئامادەی پێشهاتێك ببین كە تەوەری سەرەكی و بنەڕەتی خەباتی ئەڤرۆیە.
سێزدەهەمین كۆنگرەی پارتی، لە رێگای پەیامی سەرۆك بارزانییەوە، لایەنی كەم (3) بابەتی گرنگی وروژاندوە:
یەك- مافی كورد لە دیاریكردنی چارەنووسی خۆی.
دوو- پشتگیری لە هەوڵی هەر كۆمەڵە خەڵكێكی عێراق بۆ دامەزراندنی هەرێمی فیدرالیی خۆیان.
سێ- بەستنی كۆنفرانسی نوێنەرانی گشت لایەنە سیاسییەكانی هەموو پارچە و هەرێمەكانی كوردستان و دەرەوە.
هەر سێ بابەت لە یەك تەوەردا چڕ دەبنەوە ئەویش سنووری هەرێمە، كە مادەی (140)یش لە هەمان تەوەردایە. كێشەی سەرەكیی پێش گەلی كوردستان و گرنگترین پێشهات مەسەلەی سنووری باشوورمانە، كە نە بەس باشووری ئەم هەرێمەیە، بەڵكو سنووری باشووری كوردستانی گەورەیە.
بە لێكدانەوەیەكی هێمن و لەسەرخۆ بەوە دەگەین كە مەسەلەی دەسنیشانكردنی سنووری هەرێم بەخۆی دێتە پێش، ئەگەریش ئێمە لێی بێدەنگ ببین. هۆی ئەوەش بەرەوپێشچوونی بیری سیاسیی سیستەمی فیدرالییە لە عێراقدا.
ئێمە كە پشتگیری خەڵكی عێراق دەگرین تا هەرێمی خۆیان دابمەزرێنن لە واقیعدا خۆمان بەو راستییە دەگەیەنین كە سنووری هەرێم ئیتر دەبێ دیاریبكرێت، چونكە بە چارەسەری گرفتی كەركووك و خانەقین و مەندەلی و شێخان و زەمار و ناوچەكانی دیكە كێشەی سنووریش چارەسەر دەبێ. گەر بە ئاشتی لەگەڵمانا نەیەنە پێش ئەوە جەنگ لە پێشە.
مەبەستم لەم تێبینییە ئەوەیە كە بە پێكهێنانی هەرێمێكی دراوسێی هەرێمی كوردستان، بمانەوێ و نەمانەوێ، راستەخۆ و بەگەرم و گوڕی كێشەی سنووری باشوور دێنێتە پێش. دراوسێكەشمان (هەرێمی سوننی عەرەب) دەبێت، كە ئێستا كەتوونەتە هەوڵی دامەزراندنی هەرێمی خۆیان چونكە، ئیتر وەك جاران دەستیان بە دەسەڵاتی مەركەزی بەغدا ناگات، مەگەر بەشێكی كەم قبووڵبكەن. رەنگە سیاسەتی شیعەی عەرەب، ئەوە بێ سوننە تۆزێك رازی بكات. گەرنا ئەمان بە جیدی لە بیری هەرێمی خۆیان كە نەخشەكەی هاوسنووری نەخشەی كوردستانە، واتە: سنوورەكەیان هەمان سنوورەكەی ئێمەیە، جا مەگەر لەمە بەدوا وریا و هۆشیار ببین لە شێوەی دانانی ئەو سنوورە كە لە باكووری موسڵەوە تا پارێزگای باقووبە (دیالا) دەگرێتەوە.
سنووری هاوبەشی هەر دوو هەرێمی كوردستان و سوننەی عەرەب بەناو جەرگەی ئەو ناوچەدا دەڕوات كە مادەی (140)ی بۆ دانراوە.
دەوڵەتی توركیا یەكەمین سوودمەند دەبێ، چونكە ئەم هەرێمەش هاوسنووریەتی، هەر بۆیەش پشتی دەگرێت. كەواتە: توركیا لە رێگەی هەرێمی كوردستان و هەرێمی سوننی عەرەبەوە لە نزیكەی 75% رووپێوی عێراق (بە رەمادی/ ئەنبارەوە) كاریگەر دەبێت. جەنگی داهاتوو لە دەوروبەری سنوور دەبێ مەگەر ئاشتیانە لەگەڵمان رێكبكەون.
ئەمە ئەگەر بارودۆخی عێراق و رۆژهەڵاتی ناوەڕاست لە ئاست و هاوسەنگیی ئێستا بمێنێتەوە. وەلی ئەگەر پێشهاتی كتوپڕی گەورە لە رۆژهەڵات و جیهاندا رووبدات.. ئەوە باسێكی دیكەیە.